ਹੁਸ਼ਿਆਰਪੁਰ, 31 ਅਗਸਤ 2023 – ਪੰਜਾਬ ਵਿਜ਼ੀਲੈਂਸ ਬਿਊਰੋ ਵੱਲੋਂ ਮਾਈਨਿੰਗ ਵਿਭਾਗ ਦੇ ਇੱਕ ਐਕਸੀਅਨ ਦੀ ਗ੍ਰਿਫਤਾਰੀ ਤੋਂ ਬਾਅਦ ਜ਼ਿਲ੍ਹੇ ਹੁਸ਼ਿਆਰਪੁਰ ਦੀ ਰਾਜਨੀਤੀ ਅਤੇ ਮਾਈਨਿੰਗ ਮਾਫੀਆ ‘ਚ ਭੁਚਾਲ ਆ ਗਿਆ ਹੈ, ਕਿਉਂਕਿ ਇਸ ਸਰਤਾਜ ਸਿੰਘ ਰੰਧਾਵਾ ਦਾ ਤਬਾਦਲਾ ਕੁੱਝ ਸਮਾਂ ਮਾਈਨਿੰਗ ਵਿਭਾਗ ਦੇ ਸੈਕਟਰੀ ਹੁੰਦਿਆਂ ਕ੍ਰਿਸ਼ਨ ਕੁਮਾਰ ਨੇ ਹੁਸ਼ਿਆਰਪੁਰ ਤੋਂ ਬਾਹਰ ਕਰ ਦਿੱਤਾ ਸੀ, ਲੇਕਿਨ ਆਪਣੀ ਸਿਆਸੀ ਪਹੁੰਚ ਦੇ ਚਲਦਿਆਂ ਇਹ ਦੁਬਾਰਾ ਹੁਸ਼ਿਆਰਪੁਰ ‘ਚ ਤਾਇਨਾਤ ਹੋ ਗਿਆ ਸੀ, ਪਰ ਵਿਜੀਲੈਂਸ ਵਿਭਾਗ ਨੂੰ ਪਿਛਲੇ ਕਈ ਦਿਨਾਂ ਤੋਂ ਲਗਾਤਾਰ ਸ਼ਿਕਾਇਤਾਂ ਮਿਲ ਰਹੀਆਂ ਸਨ, ਦੱਸਿਆ ਜਾ ਰਿਹਾ ਸੀ ਕਿ ਇਸ ਅਧਿਕਾਰੀ ‘ਤੇ ਹੁਸ਼ਿਆਰਪੁਰ ਤੋਂ ਆਮ ਆਦਮੀ ਪਾਰਟੀ ਦੇ ਮੰਤਰੀ ਅਤੇ ਮੌਜੂਦਾ ਇੱਕ-ਦੋ ਵਧਾਇਕਾਂ ਦੀ ਛਤਰ-ਛਾਇਆ ਮੌਜੂਦ ਸੀ। ਸੂਤਰਾਂ ਦੀ ਮੰਨੀਏ ਤਾਂ ਇਹ ਅਧਿਕਾਰੀ ਦਸੂਹਾ ਅਤੇ ਮੁਕੇਰੀਆਂ ਵਿਧਾਨ ਸਭਾ ਹਲਕੇ ‘ਚ ਪੈਂਦੇ ਨਾਜਾਇਜ਼ ਕਰੈਸ਼ਰਾਂ ਤੋਂ 1 ਲੱਖ ਪ੍ਰਤੀ ਕਰੈਸ਼ਰ ਲੈ ਰਿਹਾ ਸੀ। ਜਿਸ ਦਾ ਵੱਡਾ ਹਿੱਸਾ ਆਪਣੇ ਰਾਜਨੀਤਕ ਆਕਾਵਾਂ ਨੂੰ ਆਪਣੀ ਛਤਰ ਛਾਇਆ ਨੂੰ ਬਰਕਰਾਰ ਰੱਖਣ ਲਈ ਦੇ ਰਿਹਾ ਸੀ।
ਇਹ ਵੀ ਜਾਣਕਾਰੀ ਮਿਲੀ ਹੈ ਕਿ ਸ਼ਾਹੀ ਨਾਮ ਦਾ ਸਖਸ਼ ਸਾਰੇ ਕਰੈਸ਼ਰਾਂ ਤੋਂ ਉਗਰਾਹੀ ਕਰਕੇ ਮਾਈਨਿੰਗ ਵਿਭਾਗ ਦੇ ਇਸ ਅਧਿਕਾਰੀ ਨੂੰ ਦੇ ਰਿਹਾ ਸੀ। ਵਿਜੀਲੈਂਸ ਦੇ ਸੂਤਰਾਂ ਦੇ ਮੁਤਾਬਿਕ ਸਰਤਾਜ ਸਿੰਘ ਰੰਧਾਵਾ ਤੋਂ ਵਿਜੀਲੈਂਸ ਨੇ ਰਾਜਨੀਤਿਕ ਆਕਾਵਾਂ ਅਤੇ ਮਾਈਨਿੰਗ ਮਾਫੀਆ ਨਾਲ ਇਸ ਦੇ ਸੰਬੰਧਾਂ ਦੀ ਜਾਂਚ ਵੀ ਸ਼ੁਰੂ ਕਰ ਦਿੱਤੀ ਹੈ। ਜਿਸ ਨੂੰ ਲੈ ਕੇ ਹੁਸ਼ਿਆਰਪੁਰ ਦੇ ਮਾਈਨਿੰਗ ਮਾਫੀਆ ਅਤੇ ਆਪ ਦੇ ਨੇਤਾਵਾਂ ਅੰਦਰ ਖਲਬਲੀ ਮੱਚੀ ਹੋਈ ਹੈ। ਹਰ ਇੱਕ ਵਿਅਕਤੀ ਨੂੰ ਇਸ ਗੱਲ ਦਾ ਡਰ ਸਤਾ ਰਿਹਾ ਹੈ ਕਿ ਐਕਸੀਅਨ ਰੰਧਾਵਾ ਕਿਤੇ ਮੂੰਹ ਨਾ ਖੋਲ੍ਹ ਦੇਵੇ। ਪਿਛਲੇ 4 ਘੰਟਿਆਂ ਤੋਂ ਵਿਜੀਲੈਂਸ ਪੁੱਛਗਿੱਛ ਕਰ ਰਹੀ ਹੈ।
