21 ਫਰਵਰੀ2023- ਬੀਤੇ ਦਿਨੀਂ ਸੂਬਾ ਸਰਕਾਰ ਵੱਲੋਂ ਬਿਜਲੀ ਗਰਿੱਡਾਂ ਨੂੰ ਚਿੱਠੀ ਰਾਹੀਂ ਖੇਤੀ ਸੈਕਟਰ ਦੀ ਸਪਲਾਈ ਰਾਤ ਸਮੇਂ ਕਰਨ ਦੇ ਜਾਰੀ ਹੋਏ ਫੁਰਮਾਨ ਦੇ ਵਿਰੋਧ ਵਿੱਚ ਅੱਜ ਭਾਰਤੀ ਕਿਸਾਨ ਯੂਨੀਅਨ (ਏਕਤਾ) ਸਿੱਧੂਪੁਰ ਵੱਲੋੰ ਜਿਲਾ ਪ੍ਰਧਾਨ ਲਖਵੀਰ ਸਿੰਘ ਅਕਲੀਆ ਦੀ ਅਗਵਾਈ ਵਿੱਚ 220 ਕੇ ਵੀ ਗਰਿੱਡ ਠੂਠਿਆਂਵਾਲੀ ਦਾ ਘਿਰਾਓ ਕੀਤਾ ਗਿਆ ਅਤੇ ਮੌਕੇ ‘ਤੇ ਐਡੀਸਨਲ ਐਸ ਡੀਓ ਰਾਹੀ ਮੰਗ ਪੱਤਰ ਦਿੱਤਾ ਗਿਆ । ਇਸ ਇਕੱਠ ਨੂੰ ਸੰਬੋਧਨ ਕਰਦਿਆਂ ਕਿਸਾਨ ਆਗੂ ਨੇ ਕਿਹਾ ਕਿ ਸੂਬਾ ਸਰਕਾਰ ਦੇ ਫਸਲੀ ਵਿਭਿੰਨਤਾ ਦੇ ਪ੍ਰੋਗਰਾਮ ਨੂੰ ਲਾਗੂ ਕਰਦਿਆਂ ਕਿਸਾਨੀ ਨੇ ਵੱਡੀ ਪੱਧਰ ਉੱਤੇ ਸਬਜ਼ੀਆਂ ਦੀ ਕਾਸ਼ਤ ਕੀਤੀ ਹੈ ਪਰ ਸਰਕਾਰ ਦੇ ਇਸ ਹੁਕਮ ਨਾਲ ਕਿਸਾਨੀ ਨੂੰ ਰਾਤ ਸਮੇਂ ਫ਼ਸਲਾਂ ਨੂੰ ਪਾਣੀ ਦੇਣਾ ਬਹੁਤ ਮੁਸ਼ਕਿਲ ਹੈ । ਦੂਸਰਾ ਇਸ ਸਮੇਂ ਕਣਕ ਦੀ ਫਸਲ ਪੱਕਣ ਉੱਤੇ ਹੈ । ਜਿਸ ਕਰਕੇ ਸਹੀ ਮਾਤਰਾ ਵਿੱਚ ਪਾਣੀ ਦੇਣ ਲਈ ਸਡਿਊਲ ਬੱਧੀ ਬਿਜਲੀ ਸਪਲਾਈ ਦਿਨ ਸਮੇਂ ਕਿਸਾਨੀ ਦੀ ਲੋੜ ਹੈ । ਜਿਲਾ ਸਕੱਤਰ ਮੱਖਣ ਸਿੰਘ ਭੈਣੀ ਬਾਘਾ ਨੇ ਕਿਹਾ ਕਿ ਅੱਜ ਦੇਸ਼ ਦਾ ਅੰਨਦਾਤਾ, ਕੇਂਦਰ ਸਰਕਾਰ ਅਤੇ ਸੂਬਾ ਸਰਕਾਰ ਦੀ ਬੇਰੁਖੀ ਤੋਂ ਤੰਗ ਆ ਕੇ ਸੜਕਾਂ ਉੱਤੇ ਉਤਰਿਆ ਹੋਇਆ ਹੈ । ਸਰਕਾਰਾਂ ਨੂੰ ਕਿਸਾਨ ਅਤੇ ਦੂਸਰੇ ਵਰਗ ਜੋ ਖੇਤੀ ਨਾਲ ਜੁੜੇ ਹੋਏ ਹਨ, ਉਨ੍ਹਾਂ ਨੂੰ ਅਣਗੌਲਿਆਂ ਨਾ ਕਰੇ ਅਤੇ ਫੌਰੀ ਤੌਰ ‘ਤੇ ਸਰਕਾਰ ਇੰਨਾਂ ਮੰਗਾਂ ਵੱਲ ਗੌਰ ਕਰੇ । ਉਨ੍ਹਾਂ ਜ਼ੋਰ ਦੇ ਕੇ ਕਿਹਾ ਕਿ ਜੇਕਰ ਸਰਕਾਰ ਲੋਕਾਂ ਦੀਆਂ ਲੋੜਾਂ ਨੂੰ ਅਣਗੌਲਿਆ ਕਰੇਗੀ ਤਾਂ ਜਥੇਬੰਦੀ ਵੱਲੋਂ ਪੰਜਾਬ ਪੱਧਰ ‘ਤੇ ਵੱਡਾ ਸੰਘਰਸ਼ ਵਿੱਢਿਆ ਜਾਵੇਗਾ । ਇਸ ਮੌਕੇ ਜਗਦੇਵ ਸਿੰਘ ਕੋਟਲੀ ਕਲਾਂ, ਰੂਪ ਸਿੰਘ ਖਿਆਲਾ ਬਲਾਕ ਪ੍ਰਧਾਨ ਮਾਨਸਾ, ਗੁਰਚਰਨ ਸਿੰਘ ਉੱਲਕ ਬਲਾਕ ਪ੍ਰਧਾਨ ਝੁਨੀਰ, ਬਲਜੀਤ ਸਿੰਘ ਭੈਣੀ ਬਾਘਾ, ਰੂਪ ਸ਼ਰਮਾਂ, ਲਾਭ ਸਿੰਘ ਖਿਆਲਾ ਕਲਾਂ, ਗੁਰਾ ਸਿੰਘ ਭਲਾਈਕੇ, ਗਾਂਧੀ ਸਿੰਘ ਫਰਵਾਹੀ, ਕੇਵਲ ਸਿੰਘ ਹੀਰੇਵਾਲਾ, ਬਿੰਦਰ ਸਿੰਘ ਖੜਕ ਸਿੰਘ ਵਾਲਾ, ਮੱਖਣ ਸਿੰਘ ਅਤਲਾ ਕਲਾਂ, ਗੁਰਮੇਲ ਸਿੰਘ ਚਕੇਰੀਆਂ, ਮਹਿੰਦਰ ਸਿੰਘ ਹੀਰੋ ਕਲਾਂ, ਅਮਰਜੀਤ ਸਿੰਘ ਖਾਰਾ, ਰਾਜ ਸਿੰਘ ਖਿੱਲਣ, ਲੀਲਾ ਸਿੰਘ ਜੌੜਕੀਆਂ, ਅਜੈਬ ਸਿੰਘ ਰੜ੍ਹ, ਜਸਵੀਰ ਸਿੰਘ ਮਲਕਪੁਰ ਆਦਿ ਹਾਜ਼ਰ ਰਹੇ ।