ਮੁਫਤ ਬੱਸ ਸਫਰ ਦੀ ਸਹੂਲਤ ਨਾਲ ਔਰਤਾਂ ਵਿੱਚ ਖੁੁਸ਼ੀ ਦੀ ਲਹਿਰ

ਫਾਜ਼ਿਲਕਾ, 3 ਅਪ੍ਰੈਲ (ਰਿਤਿਸ਼) – ਸੂਬਾ ਸਰਕਾਰ ਵੱਲੋਂ ਮਹਿਲਾਵਾਂ ਲਈ ਬੱਸਾਂ ’ਚ ਮੁਫ਼ਤ ਸਫ਼ਰ ਦੀ ਸਹੂਲਤ ਨਾਲ ਔਰਤਾਂ ਵਿਚ ਖੁਸ਼ੀ ਦੀ ਲਹਿਰ ਪਾਈ ਜਾ ਰਹੀ ਹੈ।ਸਰਕਾਰ ਵੱਲੋਂ ਇਹ ਸੇਵਾ ਪੂਰੇ ਪੰਜਾਬ ਅਤੇ ਰਾਜਧਾਨੀ ਚੰਡੀਗੜ ਵਿਚ ਪਹਿਲੀ ਅਪਰੈਲ ਤੋਂ ਲਾਗੂ ਕੀਤੀ ਗਈ ਹੈ।
ਡਿਪਟੀ ਕਮਿਸ਼ਨਰ ਸ. ਅਰਵਿੰਦ ਪਾਲ ਸਿੰਘ ਸੰਧੂ ਨੇ ਕਿਹਾ ਕਿ ਪਹਿਲੇ ਦੋ ਦਿਨਾਂ ਵਿਚ ਜ਼ਿਲੇ ’ਚ 2463 ਔਰਤਾਂ ਨੇ ਇਸ ਸਰਵਿਸ ਦਾ ਲਾਭ ਲਿਆ। ਉਨਾਂ ਕਿਹਾ ਕਿ ਸਫ਼ਰ ਦੌਰਾਨ ਜੇਕਰ ਕਿਸੇ ਵੀ ਮਹਿਲਾ ਨੂੰ ਕੋਈ ਸਮੱਸਿਆ ਆਉਂਦੀ ਹੈ ਤਾਂ ਉਹ ਟੌਲ ਫ਼ਰੀ ਨੰਬਰ 181 ’ਤੇ ਸੰਪਰਕ ਕਰ ਸਕਦੇ ਹਨ। ਉਨਾਂ ਦੱਸਿਆ ਕਿ ਮੁਫ਼ਤ ਸਫ਼ਰ ਦੀ ਸਹੂਲਤ ਪੀ.ਆਰ.ਟੀ.ਸੀ., ਪਨਬੱਸ ਤੇ ਪੰਜਾਬ ਰੋਡਵੇਜ਼ ਬੱਸਾਂ ਵਿਚ ਦਿੱਤੀ ਗਈ ਹੈ।
ਇਸ ਬਾਰੇ ਵਧੇਰੇ ਜਾਣਕਾਰੀ ਦਿੰਦੇ ਹੋਏ ਸਬ ਡਿਪੂ ਫਾਜ਼ਿਲਕਾ ਸ੍ਰੀ ਪ੍ਰੀਤ ਸਿੰਘ ਸਟੇਸ਼ਨ ਸੁਪਰਵਾਈਜ਼ਰ ਨੇ ਦੱਸਿਆ ਕਿ ਸਬ ਡਿੱਪੂ ਫਾਜ਼ਿਲਕਾ ਦੀਆਂ ਕੁੱਲ 27 ਰੋਡਵੇਜ਼/ਪਨਬਸ ਬੱਸਾਂ ਹਨ, ਜੋ ਕਰੀਬ 8 ਰੂਟਾਂ ’ਤੇ ਚੱਲਦੀਆਂ ਹਨ। ਉਨਾਂ ਕਿਹਾ ਕਿ ਪਹਿਲੇ ਦਿਨ ਜ਼ਿਲੇ ਦੀਆਂ ਲਗਭਗ 939 ਔਰਤਾਂ ਅਤੇ ਦੂਜੇ ਦਿਨ 1524 ਔਰਤਾਂ ਨੇ ਮੁਫਤ ਬੱਸ ਸਫਰ ਦੀ ਸਹੂਲਤ ਦਾ ਲਾਭ ਲਿਆ। ਉਨਾਂ ਕਿਹਾ ਕਿ ਸਫ਼ਰ ਦੌਰਾਨ ਔਰਤਾਂ ਨੂੰ ਆਪਣਾ ਕੋਈ ਵੀ ਸ਼ਨਾਖ਼ਤੀ ਕਾਰਡ ਜਿਵੇਂ ਕਿ ਆਧਾਰ ਕਾਰਡ ਆਦਿ ਦਿਖਾਉਣਾ ਲਾਜ਼ਮੀ ਹੋਵੇਗਾ ਤਾਂ ਜੋ ਉਨਾਂ ਨੂੰ ਸਬੰਧਤ ਬੱਸ ਕੰਡਕਟਰ ਵਲੋਂ ਜ਼ੀਰੋ ਬੈਲੇਂਸ ਦੀ ਟਿਕਟ ਉਪਲੱਬਧ ਕਰਵਾਈ ਜਾ ਸਕੇ।
ਇਸ ਮੌਕੇ ਮਲੋਟ ਤੋਂ ਫਾਜ਼ਿਲਕਾ ਦਾ ਸਫਰ ਤੈਅ ਕਰਕੇ ਆਉਣ ਵਾਲੀ ਅੰਜੂ ਬਾਲਾ ਨੇ ਦੱਸਿਆ ਕਿ ਉਨਾਂ ਨੇ ਰੋਡਵੇਜ ਬੱਸ ਵਿਚ ਬਿਲਕੁਲ ਮੁਫਤ ਸਫਰ ਕੀਤਾ ਤੇ ਉਸਦਾ ਇਹ ਤਜ਼ਰਬਾ ਬਹੁਤ ਵਧੀਆ ਰਿਹਾ। ਉਨਾਂ ਕਿਹਾ ਕਿ ਇਹ ਸਰਵਿਸ ਔਰਤਾਂ ਲਈ ਬਹੁਤ ਲਾਹੇਵੰਦ ਹੋਵੇਗੀ। ਇਸ ਮੌਕੇ ਸਫਰ ਤੈਅ ਕਰਨ ਵਾਲੀਆਂ ਹੋਰਨਾਂ ਵੱਖ-ਵੱਖ ਔਰਤਾਂ ਨੇ ਆਪਣਾ ਤਜ਼ਰਬਾ ਸਾਂਝਾ ਕਰਦਿਆਂ ਆਖਿਆ ਕਿ ਪੰਜਾਬ ਸਰਕਾਰ ਦੀ ਇਸ ਸਹੂਲ਼ਤ ਨਾਲ ਉਨਾਂ ’ਤੇ ਹੁਣ ਬੱਸ ਸਫਰ ਦਾ ਵਿੱਤੀ ਬੋਝ ਨਹੀਂ ਪਵੇਗਾ।