ਫੋਰਡ ਨੇ 30,000 ਕਰਮਚਾਰੀਆਂ ਨੂੰ ਕੀਤੀ ਘਰ ਤੋਂ ਕੰਮ ਕਰਨ ਦੀ ਪੇਸ਼ਕਸ਼

ਫਰਿਜ਼ਨੋ (ਕੈਲੀਫੋਰਨੀਆ), 23 ਮਾਰਚ (ਗੁਰਿੰਦਰਜੀਤ ਨੀਟਾ ਮਾਛੀਕੇ / ਕੁਲਵੰਤ ਧਾਲੀਆਂ) – ਅਮਰੀਕਾ ਵਿੱਚ ਫੋਰਡ ਮੋਟਰ ਕੰਪਨੀ ਕੋਰੋਨਾ ਵਾਇਰਸ ਦੇ ਪ੍ਰਭਾਵ ਕਾਰਨ ਆਪਣੇ ਹਜ਼ਾਰਾਂ  ਕਰਮਚਾਰੀਆਂ ਨੂੰ ਅਣਮਿਥੇ ਸਮੇਂ ਲਈ ਘਰ ਤੋਂ ਕੰਮ ਜਾਰੀ ਰੱਖਣ ਦੀ ਆਗਿਆ ਦੇ ਰਹੀ ਹੈ। ਫੋਰਡ ਨੇ ਇਸ ਸੰਬੰਧੀ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਇਸਦੇ  ਤਕਰੀਬਨ 30,000 ਕਰਮਚਾਰੀ ਜੋ ਮਹਾਂਮਾਰੀ ਦੇ ਦੌਰਾਨ ਘਰ ਤੋਂ ਕੰਮ ਕਰ ਰਹੇ ਸਨ , ਭਵਿੱਖ ਵਿੱਚ ਵੀ ਘਰ ਤੋਂ ਕੰਮ ਜਾਰੀ ਰੱਖ ਸਕਦੇ ਹਨ।
ਇਹ ਯੋਜਨਾ ਕਰਮਚਾਰੀਆਂ ਨੂੰ ਪਿਛਲੇ ਹਫਤੇ ਸਟਾਫ ਦੀ ਮੀਟਿੰਗ ਦੌਰਾਨ ਪੇਸ਼ ਕੀਤੀ ਗਈ, ਜੋ ਕਿ ਸਿਰਫ ਦਫਤਰੀ ਕਰਮਚਾਰੀਆਂ ‘ਤੇ ਲਾਗੂ ਹੁੰਦੀ ਹੈ। ਫੋਰਡ ਦੇ ਵਿਸ਼ਵ ਭਰ ਵਿੱਚ 186,000 ਕਰਮਚਾਰੀ ਹਨ, ਜਿਨ੍ਹਾਂ ਵਿੱਚੋਂ 30,000 ਹਿਊਮਨ ਰਿਸੋਰਸ, ਇਨਫਰਮੇਸ਼ਨ ਤਕਨਾਲੋਜੀ ਅਤੇ ਅਕਾਊਂਟਿੰਗ ਵਰਗੇ ਖੇਤਰਾਂ ਵਿੱਚ ਵ੍ਹਾਈਟ ਕਾਲਰ ਜਾਂ ਪ੍ਰਬੰਧਕੀ ਭੂਮਿਕਾਵਾਂ ਵਿੱਚ ਹਨ।  ਕੰਪਨੀ ਦੇ ਅਮਰੀਕਾ ਦੀਆਂ ਫੈਕਟਰੀਆਂ ਵਿੱਚ ਹੋਰ 56,000 ਕਾਮੇ ਘੰਟਿਆਂ ਦੇ ਹਿਸਾਬ ਨਾਲ ਕੰਮ ਕਰਦੇ ਹਨ ਅਤੇ ਦੁਨੀਆ ਭਰ ਵਿੱਚ 65
ਮੈਨੂਫੈਕਚਰ ਪਲਾਂਟ ਹਨ। ਮਿਸ਼ੀਗਨ ਦੇ ਡੀਅਰਬਰਨ ਵਿੱਚ ਫੋਰਡ ਦਾ ਹੈੱਡਕੁਆਰਟਰ ਜੋ ਪਿਛਲੇ ਸਾਲ ਮਾਰਚ ਦੇ ਅੱਧ ਵਿੱਚ ਮਹਾਂਮਾਰੀ ਕਾਰਨ ਖਾਲੀ ਹੋ ਗਿਆ ਸੀ ਦੇ ਇਸ ਸਾਲ ਵੀ ਘੱਟੋ ਘੱਟ ਗਰਮੀ ਤੱਕ ਖਾਲੀ ਰਹਿਣ ਦੀ ਉਮੀਦ ਹੈ। ਫੋਰਡ ਦੇ ਪਲਾਂਟਾਂ ਵਿੱਚ ਕਰਮਚਾਰੀਆਂ ਨੇ ਮਹਾਂਮਾਰੀ ਦੇ ਦੌਰਾਨ ਵੀ ਸਾਈਟ ‘ਤੇ ਕੰਮ ਕਰਨਾ ਜਾਰੀ ਰੱਖਿਆ ਹੈ, ਪਰ  ਇਸ ਦੌਰਾਨ ਉਹ ਵਾਇਰਸ ਤੋਂ ਸਾਵਧਾਨੀਆਂ ਜਿਵੇਂ ਕਿ ਮਾਸਕ ਪਹਿਨਣਾ, ਕੋਵਿਡ ਟੈਸਟਿੰਗ ਆਦਿ ਦੀ ਪਾਲਣਾ ਕਰ ਰਹੇ ਹਨ।