ਫਰਿਜ਼ਨੋ (ਕੈਲੀਫੋਰਨੀਆ), 10ਫਰਵਰੀ (ਗੁਰਿੰਦਰਜੀਤ ਨੀਟਾ ਮਾਛੀਕੇ / ਕੁਲਵੰਤ ਧਾਲੀਆਂ) – ਇੰਟਰਨੈੱਟ ਨੇ ਅਜੋਕੇ ਸਮੇਂ ਵਿੱਚ ਇੱਕ ਤਰ੍ਹਾਂ ਦੀ ਕ੍ਰਾਂਤੀ ਪੈਦਾ ਕੀਤੀ ਹੈ। ਇਸ ਦੀ ਮੱਦਦ ਨਾਲ ਦੁਨੀਆਂ ਭਰ ਵਿੱਚ ਦੋਸਤ ਬਣਾਉਣ,ਆਪਣੇ ਵਿਚਾਰ ਪ੍ਰਗਟ ਕਰਨ, ਜਾਣਕਾਰੀ ਸਾਂਝੀ
ਕਰਨ ਅਤੇ ਕਈ ਹੋਰ ਉਦੇਸ਼ਾਂ ਦੀ ਪੂਰਤੀ ਕਰਨ ਲਈ ਸ਼ੋਸਲ ਮੀਡੀਆ ਦੀ ਵਰਤੋਂ ਕੀਤੀ ਜਾਂਦੀ ਹੈ। ਇਸ ਵਿੱਚ ਫੇਸਬੁੱਕ ਦੀ ਸ਼ੋਸਲ ਮੀਡੀਆ ਦੇ ਤੌਰ ਤੇ ਵਰਤੋਂ ਵੱਡੀ ਪੱਧਰ ‘ਤੇ ਕੀਤੀ ਜਾਂਦੀ ਹੈ। ਅਮਰੀਕਾ ਵਿੱਚ ਕੋਰੋਨਾ ਮਹਾਂਮਾਰੀ ਦੇ ਸਮੇਂ ਟੀਕਾਕਰਨ ਮੁਹਿੰਮ ਵਿੱਚ ਸਹਾਇਤਾ ਕਰਨ ਦੇ ਮੰਤਵ ਨਾਲ ਇਸ ਕੰਪਨੀ ਨੇ ਸੋਮਵਾਰ ਨੂੰ ਐਲਾਨ ਕਰਦਿਆਂ ਦੱਸਿਆ ਕਿ ਫੇਸਬੁੱਕ ਯੂ ਐਸ ਦੇ ਉਪਭੋਗਤਾਵਾਂ ਨੂੰ ਇਸ ਹਫਤੇ ਤੋਂ ਕੋਰੋਨਾ ਟੀਕਾ ਲਗਵਾਉਣ ਲਈ ਸਹੀ ਵੈਕਸੀਨ ਕੇਂਦਰਾਂ ਦੀ ਜਾਣਕਾਰੀ ਮੁਹੱਈਆ ਕਰਵਾਉਣ ਦੇ ਨਾਲ ਟੀਕਾ ਕਦੋਂ ਲਗਵਾਉਣਾ ਹੈ, ਦੇ ਬਾਰੇ ਵੀ ਦੱਸੇਗੀ। ਫੇਸਬੁੱਕ ਅਨੁਸਾਰ ਇਸਦੇ ਕੋਵਿਡ -19 ਜਾਣਕਾਰੀ ਕੇਂਦਰ ਦੇ ਹਿੱਸੇ ਵਜੋਂ, ਫੇਸਬੁੱਕ ਉਪਭੋਗਤਾਵਾਂ ਨੂੰ ਸਥਾਨਕ ਸਿਹਤ ਏਜੰਸੀ ਦੀਆਂ ਵੈਬਸਾਈਟਾਂ ‘ਤੇ ਨਿਰਦੇਸ਼ ਦੇਵੇਗੀ, ਜਿੱਥੇ ਉਹ ਟੀਕਾਕਰਨ ਲਈ ਉਨ੍ਹਾਂ ਦੀ ਯੋਗਤਾ ਬਾਰੇ ਜਾਣਕਾਰੀ ਪ੍ਰਾਪਤ ਕਰ ਸਕਦੇ ਹਨ।ਇਸਦੇ ਇਲਾਵਾ ਇਹ ਸਹੂਲਤ ਆਉਣ ਵਾਲੇ ਹਫ਼ਤਿਆਂ ਵਿੱਚ ਵਿਸ਼ਵ ਦੇ ਹੋਰ ਭਾਗਾਂ ਵਿੱਚ ਵੀ ਮੁਹੱਈਆ ਕਰਵਾਈ ਜਾਵੇਗੀ। ਇਹ ਕੰਪਨੀ ਵਿਸ਼ਵ ਭਰ ਦੀਆਂ ਸਿਹਤ ਏਜੰਸੀਆਂ ਨੂੰ 120 ਮਿਲੀਅਨ ਡਾਲਰ ਦੇ ਵਿਗਿਆਪਨ ਕ੍ਰੈਡਿਟ ਵੀ ਪ੍ਰਦਾਨ ਕਰੇਗੀ ਤਾਂ ਜੋ ਕੋਵਿਡ -19 ਟੀਕਿਆਂ ਬਾਰੇ ਮੁਹਿੰਮ ਚਲਾਉਣ ਵਿੱਚ ਮੱਦਦ ਮਿਲ ਸਕੇ। ਇਸਦੇ ਨਾਲ ਹੀ, ਕੰਪਨੀ ਨੇ ਵਿਸ਼ਵ ਸਿਹਤ ਸੰਗਠਨ ਨਾਲ ਮਿਲ ਕੇ ਕੋਰੋਨਾ ਵਾਇਰਸ ਨਾਲ ਜੁੜੇ ਝੂਠੇ ਦਾਅਵਿਆਂ ਦੀ ਸੂਚੀ ਨੂੰ ਵਧਾਉਣ ਲਈ ਵੀ ਕੰਮ ਕੀਤਾ ਹੈ ,ਜਿਹਨਾਂ ਨੂੰ ਫੇਸਬੁੱਕ ਦੁਆਰਾ ਹਟਾਇਆ ਜਾਵੇਗਾ। ਫੇਸਬੁੱਕ ਨੇ ਹੋਰ ਜਾਣਕਾਰੀ ਦਿੰਦਿਆਂ ਕਿਹਾ ਕਿ ਉਹ ਕੋਰੋਨਾ ਟੀਕਿਆਂ ਦੀ ਘੱਟ ਪਹੁੰਚ ਵਾਲੀਆਂ ਕਮਿਊਨੀਟੀਜ਼ ਵਿੱਚ ਸਪਲਾਈ ਨੂੰ ਯਕੀਨੀ ਬਣਾਉਣ ਲਈ ਜੋਨਜ਼ ਹਾਪਕਿੰਸ ਬਲੂਮਬਰਗ ਸਕੂਲ ਆਫ਼ ਪਬਲਿਕ ਹੈਲਥ ਨਾਲ ਵੀ ਸਾਂਝੇਦਾਰੀ ਕਰ ਰਹੀ ਹੈ।