ਨਵੀਂ ਦਿੱਲੀ, 15 ਜਨਵਰੀ- ਇੰਟਰਨੈਸ਼ਨਲ ਕ੍ਰਿਕਟ ਕੌਂਸਲ (ਆਈ. ਸੀ. ਸੀ.) ਨੇ ਅੱਜ ਆਈ. ਸੀ. ਸੀ. ਐਵਾਰਡਾਂ ਦਾ ਐਲਾਨ ਕਰ ਦਿੱਤਾ। ਇਨ੍ਹਾਂ ‘ਚ ਭਾਰਤੀ ਕ੍ਰਿਕਟ ਟੀਮ ਦੇ ਕਪਤਾਨ ਵਿਰਾਟ ਕੋਹਲੀ, ਰੋਹਿਤ ਸ਼ਰਮਾ ਸਣੇ ਕਈ ਕ੍ਰਿਕਟਰਾਂ ਦੀ ਅਹਿਮ ਐਵਾਰਡਾਂ ਲਈ ਚੋਣ ਹੋਈ ਹੈ। ਭਾਰਤੀ ਟੀਮ ਦੇ ਉਪ ਕਪਤਾਨ ਰੋਹਿਤ ਸ਼ਰਮਾ ਨੂੰ ਸਾਲ 2019 ‘ਚ ਜ਼ੋਰਦਾਰ ਪ੍ਰਦਰਸ਼ਨ ਲਈ ‘ਵਨਡੇ ਕ੍ਰਿਕਟਰ ਆਫ਼ ਦਾ ਈਯਰ’ ਚੁਣਿਆ ਗਿਆ ਹੈ। ਉੱਥੇ ਹੀ ਕਪਤਾਨ ਵਿਰਾਟ ਕੋਹਲੀ ਨੂੰ ਖੇਲ ਭਾਵਨਾ ਪੁਰਸਕਾਰ ਅਤੇ ਭਾਰਤੀ ਤੇਜ਼ ਗੇਂਦਬਾਜ਼ ਦੀਪਕ ਚਾਹਰ ਨੂੰ ਟੀ-20 ‘ਚ ਸਰਬੋਤਮ ਗੇਂਦਬਾਜ਼ੀ ਲਈ ਚੁਣਿਆ ਗਿਆ ਹੈ। ਰੋਹਿਤ, ਵਿਰਾਟ ਅਤੇ ਦੀਪਕ ਨੂੰ ਆਈ. ਸੀ. ਸੀ. ਪੁਰਸਕਾਰਾਂ ‘ਚ ਚੁਣੇ ਜਾਣ ਨੇ ਭਾਰਤ ਨੂੰ ਲੰਘੇ ਦਿਨ ਮੁੰਬਈ ‘ਚ ਆਸਟ੍ਰੇਲੀਆ ਦੇ ਹੱਥੋਂ 10 ਵਿਕਟਾਂ ਨਾਲ ਮਿਲੀ ਕਰਾਰੀ ਹਾਰ ਦੇ ਜ਼ਖ਼ਮਾਂ ‘ਤੇ ਮਲ੍ਹਮ ਦਾ ਕੰਮ ਕੀਤਾ ਹੈ।