ਹਲਕਾ ਫੂਲ ਵਿੱਚ ਕਾਂਗਰਸ ਅਤੇ ਅਕਾਲੀ ਵਰਕਰਾਂ ’ਚ ਹਿੰਸਕ ਝੜਪਾਂ,ਦੋ ਅਕਾਲੀ ਹਮਾਇਤੀ ਜਖ਼ਮੀ

ਰਾਮਪੁਰਾ ਫੂਲ – ਲੋਕ ਸਭਾ ਦੀਆਂ ਚੋਣਾਂ ਮੌਕੇ ਵਿਧਾਨ ਸਭਾ ਹਲਕਾ ਫੂਲ ਦੇ ਪਿੰਡ ਕਾਂਗੜ ਵਿਖੇ ਬੂਥ ਤੇ ਕਬਜ਼ਾ ਨੂੰ ਲੈ ਕੇ ਕਾਂਗਰਸੀ ਅਤੇ ਅਕਾਲੀ ਹਮਾਇਤੀਆਂ ਦਰਮਿਆਨ ਹਿੰਸਕ ਝੜੱਪਾਂ ਹੋ ਗਈਆਂ। ਜਿਸ ਦੇ ਨਤੀਜ਼ੇ ਵਜੋਂ ਦੋ ਅਕਾਲੀ ਹਮਾਇਤੀ ਬੁਰੀ ਤਰਾਂ ਜਖਮੀਂ ਹੋ ਗਏ ਜਿੰਨਾਂ ਨੂੰ ਸਥਾਨਕ ਸਿਵਲ ਹਸਪਤਾਲ ਵਿਖੇ ਇਲਾਜ਼ ਲਈ ਭਰਤੀ ਕਰਵਾਇਆ ਗਿਆ ਹੈ। ਕਾਂਗਰਸੀ ਹਮਾਇਤੀਆਂ ਦੀ ਗੁੰਡਾਗਰਦੀ ਇਸ ਹੱਦ ਤੱਕ ਵਧੀ ਹੋਈ ਸੀ ਕਿ ਉਨਾਂ ਜਖ਼ਮੀਂ ਅਕਾਲੀ ਵਰਕਰਾਂ ਨੂੰ ਇਲਾਜ਼ ਲਈ ਲੈ ਕੇ ਜਾ ਰਹੇ ਸਾਬਕਾ ਮੰਤਰੀ ਸਿਕੰਦਰ ਸਿੰਘ ਮਲੂਕਾ ਦੀ ਗੱਡੀ ਤੇ ਵੀ ਹਮਲਾ ਕਰਕੇ ਉਸ ਨੂੰ ਭਾਰੀ ਨੁਕਸਾਨ ਪਹੁੰਚਾਇਆ।
ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਸ੍ਰ: ਮਲੂਕਾ ਨੇ ਦੱਸਿਆ ਕਿ ਉਨਾਂ ਜ਼ਿਲਾ ਪ੍ਰਸ਼ਾਸਨ ਤੋਂ ਮੰਗ ਕੀਤੀ ਸੀ ਕਿ ਪਿੰਡ ਕਾਂਗੜ, ਭਾਈਰੂੁਪਾ ਅਤੇ ਦਿਆਲਪੁਰਾ ਨੂੰ ਸੰਵੇਦਨਸ਼ੀਲ ਇਲਾਕੇ ਮੰਨ ਕੇ ਸੀ.ਸੀ.ਟੀ ਕੈਮਰੇ ਅਤੇ ਪੈਰਾ ਮਿਲਟਰੀ ਫੋਰਸ ਦਾ ਪੁਖਤਾ ਇੰਤਜਾਮ ਕੀਤਾ ਜਾਵੇ। ਉਨਾ ਕਿਹਾ ਕਿ ਪੰਜਾਬ ਦੇ ਊਰਜਾ ਮੰਤਰੀ ਦੇ ਦਬਾਅ ਅਧੀਨ ਪ੍ਰਸ਼ਾਸਨ ਨੇ ਕੋਈ ਵੀ ਅਗਾਊਂ ਪ੍ਰਬੰਧ ਨਹੀਂ ਕੀਤੇ। ਜਿਸ ਸਦਕਾ ਹੀ ਇਹ ਘਟਨਾ ਵਾਪਰ ਗਈ।
ਉਨਾਂ ਦੱਸਿਆ ਕਿ ਇੰਨਾਂ ਝੜੱਪਾਂ ਵਿੱਚ ਅਕਾਲੀ ਦਲ ਦੇ ਵਰਕਰ ਪ੍ਰਮਜੀਤ ਸਿੰਘ ਅਤੇ ਸਰਬਜੀਤ ਸਿੰਘ ਨੂੰ ਭਾਰੀ ਸੱਟਾਂ ਲੱਗੀਆਂ ਹਨ। ਜਿਹੜੇ ਕਿ ਇਲਾਜ਼ ਅਧੀਨ ਹਨ। ਉਨਾਂ ਚੋਣ ਕਮਿਸ਼ਨ ਤੋਂ ਮੰਗ ਕੀਤੀ ਕਿ ਇੰਨਾਂ ਪਿੰਡਾਂ ਦੀ ਚੋਣ ਪ੍ਰਕਿਰਿਆ ਰੱਦ ਕਰਕੇ ਮੁੜ ਤੋਂ ਚੋਣ ਕਰਵਾਈ ਜਾਵੇ ਅਤੇ ਦੋਸ਼ੀ ਅਧਿਕਾਰੀਆਂ ਅਤੇ ਗੁੰਡਾ ਅਨਸਰਾਂ ਖਿਲਾਫ਼ ਬਣਦੀ ਕਾਰਵਾਈ ਕੀਤੀ ਜਾਵੇ।
ਇਸ ਸਬੰਧੀ ਐਸ.ਡੀ.ਐਮ. ਫੂਲ ਸ੍ਰ: ਖੁਸ਼ਦਿਲ ਸਿੰਘ ਨਾਲ ਸੰਪਰਕ ਕੀਤਾ ਤਾਂ ਉਨਾਂ ਇਸ ਗੱਲ ਤੋਂ ਇਨਕਾਰ ਕੀਤਾ ਕਿ ਬੂਥ ਕੈਪਚਰਿੰਗ ਦੀ ਕੋਈ ਘਟਨਾ ਹੋਈ ਹੈ। ਉਨਾਂ ਕਿਹਾ ਕਿ ਦੋਵਾਂ ਪਾਰਟੀਆਂ ਦੇ ਹਮਾਇਤੀਆਂ ਦੀ ਚੋਣ ਬੂਥ ਦੇ ਬਾਹਰ ਝੜੱਪ ਹੋਈ ਹੈ। ਜਿਸ ਸਬੰਧੀ ਬਣਦੀ ਕਾਰਵਾਈ ਕੀਤੀ ਜਾ ਰਹੀ ਹੈ।