ਪਾਕਿਸਤਾਨ ‘ਚ ਆਸਿਆ ਬੀਬੀ ਨੂੰ ਕੀਤਾ ਗਿਆ ਰਿਹਾਅ

ਪਾਕਿਸਤਾਨ ‘ਚ ਤੋਹੀਨੇ ਰਸਾਲਤ (ਈਸ਼ ਨਿੰਦਾ) ਕਾਰਨ ਲਗ-ਪਗ 8 ਸਾਲ ਜੇਲ੍ਹ ਕੱਟਣ ਅਤੇ ਮੌਤ ਦੀ ਸਜ਼ਾ ਤੋਂ ਬਾਅਦ ਸਬੂਤਾਂ ਦੀ ਘਾਟ ਦੇ ਕਾਰਨ ਬਰੀ ਕੀਤੀ ਜਾਣ ਵਾਲੀ ਇਸਾਈ ਸਮੁਦਾਏ ਦੀ ਆਸਿਆ ਬੀਬੀ ਨੂੰ ਪਾਕਿਸਤਾਨ ਦੀ ਜੇਲ੍ਹ ਤੋਂ ਰਿਹਾਅ ਕਰਨ ਮਗਰੋਂ ਹਾਲੈਂਡ ਰਵਾਨਾ ਕੀਤੇ ਜਾਣ ਦੀ ਖ਼ਬਰ ਪਾਕਿਸਤਾਨੀ ਮੀਡੀਆ ਵੱਲੋਂ ਦਿੱਤੀ ਗਈ ਹੈ। ਇਸ ਸੰਬੰਧ ‘ਚ ਪਾਕਿਸਤਾਨੀ ਅਖ਼ਬਾਰ ਰੋਜ਼ਾਨਾ ਜੰਗ ਅਖ਼ਬਾਰ ਨੇ ਖ਼ਬਰ ਦਿੱਤੀ ਹੈ ਕਿ ਸੁਪਰੀਮ ਕੋਰਟ ਵੱਲੋਂ ਆਸਿਆ ਬੀਬੀ ਨੂੰ ਬਰੀ ਕੀਤੇ ਜਾਣ ਤੋਂ ਬਾਅਦ ਉਸ ਨੂੰ ਮੁਲਤਾਨ ‘ਚ ਸਥਿਤ ਔਰਤਾਂ ਦੀ ਜੇਲ੍ਹ ਤੋਂ ਭਾਰੀ ਸੁਰੱਖਿਆ ਪ੍ਰਬੰਧਾਂ ਹੇਠ ਰਿਹਾਅ ਕਰ ਦਿੱਤਾ ਗਿਆ ਹੈ, ਉਸ ਨੂੰ ਇਕ ਵਿਸ਼ੇਸ਼ ਹਵਾਈ ਜਹਾਜ਼ ਰਾਹੀਂ ਇਸਲਾਮਾਬਾਦ ਹਵਾਈ ਅੱਡੇ ਤੋਂ ਹਾਲੈਂਡ ਦੇ ਰਾਜਦੂਤ ਆਪਣੇ ਨਾਲ ਹਾਲੈਂਡ ਲੈ ਗਏ ਹਨ।