ਨਵੀਂ ਦਿੱਲੀ, 20 ਮਈ – ਪ੍ਰਵਾਸੀ ਮਜ਼ਦੂਰਾਂ ਨੂੰ ਬੱਸ ਮੁਹੱਈਆ ਕਰਵਾਉਣ ਦੇ ਮੁੱਦੇ ‘ਤੇ ਉੱਤਰ ਪ੍ਰਦੇਸ਼ ਕਾਂਗਰਸ ਤੇ ਯੋਗੀ ਸਰਕਾਰ ਆਹਮੋ-ਸਾਹਮਣੇ ਹਨ। ਇਸ ਦੌਰਾਨ ਕਾਂਗਰਸ ਦੀ ਜਨਰਲ ਸੈਕਟਰੀ ਪ੍ਰਿਯੰਕਾ ਗਾਂਧੀ ਨੇ ਪ੍ਰੈੱਸ ਕਾਨਫਰੰਸ ਕੀਤੀ ਤੇ ਯੋਗੀ ਸਰਕਾਰ ‘ਤੇ ਕਈ ਇਲਜ਼ਾਮ ਲਾਏ। ਉਨ੍ਹਾਂ ਕਿਹਾ ਕਿ ਜੇ ਭਾਜਪਾ ਝੰਡੇ ਲਾਉਣਾ ਚਾਹੁੰਦੀ ਹੈ ਤਾਂ ਲਾ ਲਵੇ ਪਰ ਬੱਸਾਂ ਚੱਲਣ ਦੇਵੇ। ਇਸ ਨਾਲ 92 ਹਜ਼ਾਰ ਲੋਕਾਂ ਦੀ ਮਦਦ ਹੋਵੇਗੀ। ਸਾਡੀਆਂ ਬੱਸਾਂ ਅਜੇ ਖੜ੍ਹੀਆਂ ਹਨ ਪਰ ਯੋਗੀ ਸਰਕਾਰ ਚੱਲਣ ਦੀ ਇਜਾਜ਼ਤ ਨਹੀਂ ਦੇ ਰਹੀ। ਦੱਸ ਦਈਏ ਕਿ ਕਿ ਕਾਂਗਰਸ ਤੇ ਉੱਤਰ ਪ੍ਰਦੇਸ਼ ਸਰਕਾਰ ਦਰਮਿਆਨ ਬੱਸਾਂ ਨੂੰ ਲੈ ਕੇ ਪਿਛਲੇ ਕੁਝ ਦਿਨਾਂ ਤੋਂ ਇਲਜ਼ਾਮ ਤੇ ਜਵਾਬੀ ਵਿਰੋਧ ਚੱਲ ਰਹੇ ਹਨ। ਦੋਵਾਂ ਪਾਸਿਆਂ ਤੋਂ ਇੱਕ ਦੂਜੇ ਨੂੰ ਬਹੁਤ ਸਾਰੇ ਪੱਤਰ ਲਿਖੇ ਗਏ। ਉੱਤਰ ਪ੍ਰਦੇਸ਼ ਸਰਕਾਰ ਦਾ ਕਹਿਣਾ ਹੈ ਕਿ ਕਾਂਗਰਸ ਵੱਲੋਂ ਮੁਹੱਈਆ ਕਰਵਾਈਆਂ ਗਈਆਂ 1000 ਤੋਂ ਵੱਧ ਬੱਸਾਂ ਦੇ ਵੇਰਵਿਆਂ ਵਿੱਚ ਕੁਝ ਦੋ ਪਹੀਆ ਵਾਹਨ, ਐਂਬੂਲੈਂਸਾਂ ਤੇ ਕਾਰ ਨੰਬਰ ਸ਼ਾਮਲ ਹਨ।
ਇਸ ‘ਤੇ ਕਾਂਗਰਸ ਨੇ ਕਿਹਾ ਕਿ ਦਿੱਤੀ ਗਈ ਲਿਸਟ ਵਿੱਚ ਉੱਤਰ ਪ੍ਰਦੇਸ਼ ਸਰਕਾਰ ਨੇ ਖ਼ੁਦ 879 ਬੱਸਾਂ ਦੇ ਸਹੀ ਹੋਣ ਦੀ ਪੁਸ਼ਟੀ ਕੀਤੀ ਹੈ ਤੇ ਹੁਣ ਉਨ੍ਹਾਂ ਨੂੰ ਇਹ ਬੱਸਾਂ ਚਲਾਉਣ ਦੀ ਇਜਾਜ਼ਤ ਦੇਣੀ ਚਾਹੀਦੀ ਹੈ।
ਪ੍ਰਿਅੰਕਾ ਗਾਂਧੀ ਨੇ ਅੱਜ ਇਹ ਵੀ ਕਿਹਾ ਕਿ ਜੇਕਰ ਸੂਚੀ ਵਿੱਚ ਕੁਝ ਗਲਤ ਹੈ ਤਾਂ ਅਸੀਂ ਸਹਿਮਤ ਹਾਂ ਪਰ ਜੋ ਬੱਸਾਂ ਹਨ, ਉਨ੍ਹਾਂ ਨੂੰ ਚੱਲਣ ਦਿਓ। ਇਹ ਰਾਹ ਵਿੱਚ ਲੋਕਾਂ ਨੂੰ ਮਦਦ ਮਿਲੇਗੀ। ਅਸੀਂ ਬੱਸਾਂ ਦੀ ਇੱਕ ਹੋਰ ਸੂਚੀ ਦੇਣ ਲਈ ਤਿਆਰ ਹਾਂ।
ਪ੍ਰਿਯੰਕਾ ਨੇ ਕਿਹਾ, “ਸੇਵਾ ਦੀ ਭਾਵਨਾ ਤੋਂ ਹੀ ਯੂਪੀ ਕਾਂਗਰਸ ਨੇ ਲੌਕਡਾਊਨ ਦੇ ਅਗਲੇ ਦਿਨ ਹੀ ਹਰ ਜ਼ਿਲ੍ਹੇ ਵਿੱਚ “ਕਾਂਗਰਸੀਆਂ ਦੇ ਸਿਪਾਹੀ” ਨਾਂ ਨਾਲ ਵਾਲੰਟੀਅਰ ਗਰੁੱਪ ਬਣਾਇਆ। ਅਸੀਂ ਹਰ ਜ਼ਿਲ੍ਹੇ ਵਿਚ ਹੈਲਪਲਾਈਨ ਨੰਬਰ ਜਾਰੀ ਕੀਤੇ। ਇਸ ਤੋਂ ਇਲਾਵਾ, ਅਸੀਂ “ਸਾਂਝੀ ਰਸੋਈ” ਖੋਲ੍ਹਿਆ, ਹਾਈਵੇ ਟਾਸਕ ਫੋਰਸ ਬਣਾਈ।”