ਬਠਿੰਡਾ, 5 ਜਨਵਰੀ (ਬਲਵਿੰਦਰ ਸ਼ਰਮਾ)-ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦਾ ਰੈਲੀ ਨੂੰ ਸੰਬੋਧਨ ਕੀਤੇ ਬਿਨਾਂ ਪਰਤ ਜਾਣਾ ਅੱਜ ਦੇਸ਼ ਲਈ ਵੱਡਾ ਮਸਲਾ ਰਿਹਾ, ਜਿਸ ‘ਤੇ ਮੋਦੀ ਜਾਂਦੇ ਸਮੇਂ ਪੰਜਾਬ ਦੇ ਅਧਿਕਾਰੀਆਂ ਨੂੰ ਤਾਅਨਾ ਮਾਰ ਗਏ ਕਿ ‘‘ਆਪਣੇ ਸੀ.ਐੱਮ. ਨੂੰ ਕਹਿਣਾ ਕਿ ਮੈਂ ਜਿੰਦਾ ਪਰਤ ਗਿਆ’’। ਜਿਸ ਤੋਂ ਉਨ੍ਹਾਂ ਦੇ ਗੁੱਸੇ ਤੇ ਰੋਸ ਦਾ ਅੰਦਾਜ਼ਾ ਲਗਾਇਆ ਜਾ ਸਕਦਾ ਹੈ।
ਜ਼ਿਕਰਯੋਗ ਹੈ ਕਿ ਅੱਜ ਪ੍ਰਧਾਨ ਮੰਤਰੀ ਨੇ ਫਿਰੋਜ਼ਪੁਰ ਵਿਖੇ ਰੈਲੀ ਨੂੰ ਸੰਬੋਧਨ ਕਰਨ ਲਈ ਪਹੁੰਚਣਾ ਸੀ। ਜਿਸ ਕਾਰਨ ਉਹ ਪਹਿਲਾਂ ਪੂਰੀ ਸਕਿਊਰਿਟੀ ਨਾਲ ਹਵਾਈ ਜ਼ਹਾਜ ਰਾਹੀਂ ਬਠਿੰਡਾ ਏਅਰਪੋਰਟ ’ਤੇ ਪਹੁੰਚੇ। ਜਿਸ ਤੋਂ ਪਹਿਲਾਂ ਵੀ ਇਥੇ ਸਕਿਊਰਿਟੀ ਪ੍ਰਬੰਧ ਮੁਕੰਮਲ ਸਨ। ਪੰਜਾਬ ਸਰਕਾਰ ਵਲੋਂ ਮੌਕੇ ’ਤੇ ਵਿੱਤ ਮੰਤਰੀ ਮਨਪ੍ਰੀਤ ਸਿੰਘ ਬਾਦਲ ਵੀ ਪਹੁੰਚੇ, ਜਿਨ੍ਹਾਂ ਪ੍ਰਧਾਨ ਮੰਤਰੀ ਦਾ ਬਕਾਇਦਾ ਸਵਾਗਤ ਵੀ ਕੀਤਾ। ਪਹਿਲਾਂ ਉਨ੍ਹਾਂ ਨੇ ਹੈਲੀਕਾਪਟਰ ਰਾਹੀਂ ਰੈਲੀ ਵਾਲੀ ਜਗ੍ਹਾ ‘ਤੇ ਪਹੁੰਚਣਾ ਸੀ। ਪ੍ਰੰਤੂ ਮੌਸਮ ਖਰਾਬ ਹੋਣ ਕਾਰਨ ਪ੍ਰਧਾਨ ਮੰਤਰੀ ਖਾਤਰ ਸੜਕੀ ਰੂਟ ਦਾ ਫੈਸਲਾ ਲਿਆ ਗਿਆ। ਫੈਸਲਾ ਲੈਣ ਵਿਚ ਪੰਜਾਬ ਤੇ ਕੇਂਦਰ ਦੀ ਸਕਿਊਰਿਟੀ ਸ਼ਾਮਲ ਸੀ।
ਫਿਰੋਜ਼ਪੁਰ ਰੈਲੀ ਵਿਚ ਜਾਣ ਤੋਂ ਪਹਿਲਾਂ ਪ੍ਰਧਾਨ ਮੰਤਰੀ ਨੇ ਸ਼ਹੀਦਾਂ ਅੱਗੇ ਨਤਮਸਤਕ ਹੋਣ ਖਾਤਰ ਹੁਸੈਨੀਵਾਲਾ ਵਿਖੇ ਪਹੁੰਚਣਾ ਸੀ। ਕਰੀਬ 30 ਕਿਲੋਮੀਟਰ ਪਹਿਲਾਂ ਮੁਜ਼ਾਹਰਾਕਾਰੀਆਂ ਨੇ ਉਨ੍ਹਾਂ ਨੂੰ ਇਕ ਪੁਲ ’ਤੇ ਰੋਕ ਲਿਆ ਗਿਆ। ਜਿਸਨੂੰ ਸੁਰੱਖਿਆ ’ਚ ਕਮਜ਼ੋਰੀ ਕਰਾਰ ਦਿੱਤਾ ਗਿਆ। ਕਰੀਬ 20 ਮਿੰਟ ਉਡੀਕ ਕਰਨ ਤੋਂ ਬਾਅਦ ਉਨ੍ਹਾਂ ਦਾ ਰੂਟ ਬਦਲਿਆ ਗਿਆ। ਅੰਤ ਫੈਸਲਾ ਲਿਆ ਗਿਆ ਕਿ ਪ੍ਰਧਾਨ ਮੰਤਰੀ ਵਾਪਸ ਬਠਿੰਡਾ ਏਅਰਪੋਰਟ ‘ਤੇ ਪਹੁੰਚਣਗੇ।
ਬਠਿੰਡਾ ਏਅਰਪੋਰਟ ’ਤੇ ਪਹੁੰਚ ਕੇ ਪ੍ਰਧਾਨ ਮੰਤਰੀ ਨੇ ਪੰਜਾਬ ਸਰਕਾਰ ਦੇ ਅਧਿਕਾਰੀਆਂ ਨੂੰ ਕਿਹਾ ਕਿ ‘ਆਪਣੇ ਪੀ.ਐੱਮ. ਨੂੰ ਕਹਿਣਾ ਹੈ ਮੈਂ ਜਿੰਦਾ ਪਰਤ ਗਿਆ’’। ਇਸ ਗੱਲ ਨੂੰ ਸੁਰੱਖਿਆ ਵਿਚ ਵੱਡੀ ਕਮਜ਼ੋਰੀ ਕਿਹਾ ਜਾ ਰਿਹਾ ਹੈ, ਜਿਸ ਨਾਲ ਪੰਜਾਬ ਸਰਕਾਰ ਦੀ ਬਹੁਤ ਕਿਰਕਿਰੀ ਹੋਈ ਹੈ।