ਫਰਿਜ਼ਨੋ (ਕੈਲੀਫੋਰਨੀਆ)(ਗੁਰਿੰਦਰਜੀਤ ਨੀਟਾ ਮਾਛੀਕੇ/ ਕੁਲਵੰਤ ਧਾਲੀਆਂ) – ਅਮਰੀਕਾ ਦੇ ਫਲੋਰਿਡਾ ਵਿੱਚ ਵਧ ਰਹੇ ਕੋਰੋਨਾ ਕੇਸਾਂ ਦੇ ਨਾਲ ਹੀ ਕੋਰੋਨਾ ਮੌਤਾਂ ਵਿੱਚ ਵੀ ਵਾਧਾ ਦਰਜ ਕੀਤਾ ਜਾ ਰਿਹਾ ਹੈ। ਸਟੇਟ ਵਿੱਚ ਕੋਰੋਨਾ ਕਾਰਨ ਮਰਨ ਵਾਲੇ ਲੋਕਾਂ ਦੀਆਂ ਲਾਸ਼ਾਂ ਨੂੰ ਰੱਖਣ ਵਾਲੇ 14 ਪੋਰਟੇਬਲ ਮੁਰਦਾਘਰ ਰਵਾਨਾ ਕੀਤੇ ਗਏ ਹਨ। ਵਾਇਰਸ ਸਬੰਧੀ ਅੰਕੜਿਆਂ ਅਨੁਸਾਰ ਫਲੋਰਿਡਾ ਵਿੱਚ ਪਿਛਲੇ ਹਫਤੇ ਵਾਇਰਸ ਕਾਰਨ 1,700 ਤੋਂ ਵੱਧ ਮੌਤਾਂ ਹੋਈਆਂ ਹਨ। ਇਸ ਦੌਰਾਨ ਕਈ ਹਸਪਤਾਲਾਂ ਵਿੱਚ ਮੁਰਦਾਘਰਾਂ ਦੀ ਸਮਰੱਥਾ ਖਤਮ ਹੋਣ ਕਿਨਾਰੇ ਹੈ। ਫਲੋਰਿਡਾ ਨੂੰ 14 ਪੋਰਟੇਬਲ ਰੈਫਰੀਜੇਰੇਟਿਡ ਮੁਰਦਾਘਰ ਪ੍ਰਾਪਤ ਹੋਣਗੇ, ਜਿਨ੍ਹਾਂ ਵਿੱਚੋਂ ਹਰੇਕ ਵਿੱਚ 12 ਲਾਸ਼ਾਂ ਸਟੋਰ ਕਰਨ ਦੀ ਸਮਰੱਥਾ ਹੋਵੇਗੀ।
ਫਲੋਰਿਡਾ ਵਿੱਚ ਇਹਨਾਂ ਮੁਰਦਾਘਰਾਂ ਨੂੰ 9 ਏਰੀਆ ਹਸਪਤਾਲਾਂ ਵਿੱਚ ਵੰਡਿਆ ਜਾਵੇਗਾ, ਜਿਨ੍ਹਾਂ ਵਿੱਚ ਐਡਵੈਂਟਹੈਲਥ ਅਤੇ ਓਰਲੈਂਡੋ ਹੈਲਥ ਸ਼ਾਮਲ ਹਨ। ਅੰਕੜਿਆਂ ਅਨੁਸਾਰ ਮਹਾਂਮਾਰੀ ਦੇ ਦੌਰਾਨ ਲਗਭਗ 44,000 ਫਲੋਰਿਡਾ ਨਿਵਾਸੀਆਂ ਦੀ ਮੌਤ ਦਰਜ ਹੋਈ ਹੈ।