ਅਮਰੀਕਾ ਵਿੱਚ ਪੈ ਰਹੀ ਗਰਮੀ ਲੈ ਰਹੀ ਹੈ ਲੋਕਾਂ ਦੀਆਂ ਜਾਨਾਂ

ਫਰਿਜ਼ਨੋ (ਕੈਲੀਫੋਰਨੀਆ), 30 ਜੂਨ (ਗੁਰਿੰਦਰਜੀਤ ਨੀਟਾ ਮਾਛੀਕੇ / ਕੁਲਵੰਤ ਧਾਲੀਆਂ) – ਅਮਰੀਕਾ ਦੇ ਕਈ ਖੇਤਰਾਂ ਵਿੱਚ ਨਿਵਾਸੀ ਜਬਰਦਸਤ ਗਰਮੀ ਦਾ ਸਾਹਮਣਾ ਕਰ ਰਹੇ ਹਨ। ਇਸ ਗਰਮੀ ਦੀ ਵਜ੍ਹਾ ਕਾਰਨ ਵਾਸ਼ਿੰਗਟਨ ਅਤੇ ਓਰੇਗਨ ਵਿੱਚ ਹੋ ਰਹੀਆਂ ਜਿਆਦਾਤਰ ਮੌਤਾਂ ਨੂੰ ਜਿਆਦਾ ਤਾਪਮਾਨ ਨਾਲ ਜੋੜਿਆ ਜਾ ਰਿਹਾ ਹੈ। ਮੌਸਮ ਵਿਭਾਗ ਅਨੁਸਾਰ ਸਿਆਟਲ ਅਤੇ ਪੋਰਟਲੈਂਡ ਵਿੱਚ ਮੰਗਲਵਾਰ ਨੂੰ ਤਾਪਮਾਨ ਵਿੱਚ ਥੋੜੀ ਗਿਰਾਵਟ ਰਹੀ ਪਰ ਅੰਦਰੂਨੀ ਸਪੋਕੇਨ, ਪੂਰਬੀ ਓਰੇਗਨ ਦੇ ਕਸਬਿਆਂ ਅਤੇ ਇਡਾਹੋ ਦੇ ਸ਼ਹਿਰਾਂ ਵਿੱਚ ਤਾਪਮਾਨ ਵਿੱਚ ਤੇਜ਼ੀ ਦੇਖਣ ਨੂੰ ਮਿਲੀ। ਰਾਸ਼ਟਰੀ ਮੌਸਮ ਸਰਵਿਸ ਦੇ ਅੰਕੜਿਆਂ ਅਨੁਸਾਰ  ਸਪੋਕੇਨ ਵਿੱਚ ਮੰਗਲਵਾਰ ਨੂੰ ਪਾਰਾ 109 F (42.2 C) ਤੱਕ ਪਹੁੰਚ ਗਿਆ ਸੀ। ਗਰਮੀ ਦੀ ਮਾਰ ਦੇ ਨਾਲ ਹੀ ਲੋਕਾਂ ਨੂੰ ਬਿਜਲੀ ਦੇ ਕੱਟਾਂ ਦਾ ਵੀ ਸਾਹਮਣਾ ਕਰਨਾ ਪੈ ਰਿਹਾ ਹੈ।ਕਿੰਗ ਕਾਉਂਟੀ ਦੇ ਮੈਡੀਕਲ ਮਾਹਿਰਾਂ ਨੇ ਦੱਸਿਆ ਕਿ ਦੋ ਵਿਅਕਤੀਆਂ ਦੀ ਸਿਆਟਲ ਅਤੇ ਵਾਸ਼ਿੰਗਟਨ ਵਿੱਚ ਹਾਈਪਰਥਰਮੀਆ ਕਾਰਨ ਮੌਤ ਹੋ ਗਈ ਹੈ ,ਭਾਵ ਉਨ੍ਹਾਂ ਦੇ ਸਰੀਰ ਜ਼ਿਆਦਾ ਗਰਮ ਹੋ ਗਏ ਸਨ।  ਇਸਦੇ ਇਲਾਵਾ ਮੰਗਲਵਾਰ ਨੂੰ ਵਾਸ਼ਿੰਗਟਨ  ਵਿੱਚ 51, 75 ਅਤੇ 77 ਸਾਲ ਦੇ ਤਿੰਨ ਵਿਅਕਤੀਆਂ ਦੀ ਉਨ੍ਹਾਂ ਦੇ ਘਰਾਂ ਵਿੱਚ ਗਰਮੀ  ਨਾਲ ਮੌਤ ਹੋ ਗਈ। ਇਸੇ ਤਰ੍ਹਾਂ ਤਕਰੀਬਨ ਦਰਜਨ ਦੇ ਕਰੀਬ ਹੋਈ ਲੋਕਾਂ ਦੀ ਮੌਤ ਲਈ ਪੈ ਰਹੀ ਗਰਮੀ ਨੂੰ ਵੱਡਾ ਕਾਰਨ ਮੰਨਿਆ ਜਾ ਰਿਹਾ ਹੈ।