ਅਮਰੀਕਾ: ਬ੍ਰਾਜ਼ੀਲ ਭੇਜੀਆਂ ਜਾਣਗੀਆਂ ਜੌਹਨਸਨ ਐਂਡ ਜੌਹਨਸਨ ਦੀਆਂ 3 ਮਿਲੀਅਨ ਕੋਰੋਨਾ ਵੈਕਸੀਨ ਖੁਰਾਕਾਂ

ਫਰਿਜ਼ਨੋ (ਕੈਲੀਫੋਰਨੀਆ), 24 ਜੂਨ (ਗੁਰਿੰਦਰਜੀਤ ਨੀਟਾ ਮਾਛੀਕ / ਕੁਲਵੰਤ ਧਾਲੀਆਂ) – ਅਮਰੀਕਾ  ਦੁਆਰਾ ਇੱਕ ਖੁਰਾਕ ਵਾਲੇ ਜੌਹਨਸਨ ਐਂਡ ਜੌਹਨਸਨ ਦੇ ਕੋਰੋਨਾ ਵਾਇਰਸ ਟੀਕੇ ਦੀਆਂ 30 ਲੱਖ ਖੁਰਾਕਾਂ ਭੇਜ ਕੇ ਬ੍ਰਾਜ਼ੀਲ ਦੀ ਸਹਾਇਤਾ ਕੀਤੀ ਜਾਵੇਗੀ। ਬ੍ਰਾਜ਼ੀਲ ਵਿੱਚ ਕੋਰੋਨਾ ਵਾਇਰਸ ਕਾਰਨ 500,000 ਤੋਂ ਵੱਧ ਲੋਕਾਂ ਦੀ ਮੌਤ ਹੋਈ ਹੈ, ਜੋ ਕਿ ਅਮਰੀਕਾ ਤੋਂ ਬਾਅਦ ਦੂਜੀ ਸਭ ਤੋਂ ਵੱਧ ਮੌਤਾਂ ਦੀ ਗਿਣਤੀ ਹੈ। ਬ੍ਰਾਜ਼ੀਲ ਦੀ ਇਹ ਸਹਾਇਤਾ ਵ੍ਹਾਈਟ ਹਾਊਸ ਦੇ 80 ਮਿਲੀਅਨ ਟੀਕੇ ਦਾਨ ਕਰਨ ਦੇ ਮਿੱਥੇ ਹੋਏ ਟੀਚੇ ਦੇ ਹਿੱਸੇ ਵਜੋਂ ਕੀਤੀ ਜਾਵੇਗੀ।
ਵ੍ਹਾਈਟ ਹਾਊਸ ਦੇ ਅਨੁਸਾਰ, ਦੋਵਾਂ ਦੇਸ਼ਾਂ ਦੀਆਂ ਵਿਗਿਆਨਕ ਟੀਮਾਂ ਅਤੇ ਰੈਗੂਲੇਟਰਾਂ ਨੇ ਐਫ ਡੀ ਏ ਦੁਆਰਾ ਮਨਜ਼ੂਰਸ਼ੁਦਾ ਇਹਨਾਂ ਖੁਰਾਕਾਂ ਦੀ ਸਪੁਰਦਗੀ ਦੀ ਤਿਆਰੀ ਕੀਤੀ ਹੈ, ਜਿਸ ਤਹਿਤ ਵੈਕਸੀਨ ਦੀ ਖੇਪ ਵੀਰਵਾਰ ਦੀ ਸ਼ਾਮ ਨੂੰ ਅਜ਼ੂਲ ਏਅਰਲਾਇੰਸ ਦੀ ਫਲਾਈਟ ਰਾਹੀਂ ਫੋਰਟ  ਲਾਉਡਰਡੇਲ ਤੋਂ ਰਵਾਨਾ ਹੋਵੇਗੀ। ਇੱਕ ਸ਼ਾਟ ਵਾਲੀ ਇਸ ਵੈਕਸੀਨ  ਨੂੰ ਦੂਰ-ਦੁਰਾਡੇ ਇਲਾਕਿਆਂ ਵਿੱਚ ਟੀਕਾਕਰਨ ਦੀਆਂ ਦਰਾਂ ਨੂੰ ਵਧਾਉਣ ਲਈ ਇੱਕ ਮਹੱਤਵਪੂਰਣ ਸਾਧਨ ਦੇ ਰੂਪ ਵਿੱਚ ਦੇਖਿਆ ਜਾਂਦਾ ਹੈ। ਬ੍ਰਾਜ਼ੀਲ ਦੇ 210 ਮਿਲੀਅਨ ਲੋਕਾਂ ਵਿਚੋਂ ਸਿਰਫ 10 ਪ੍ਰਤੀਸ਼ਤ ਲੋਕਾਂ ਨੂੰ ਹੀ ਵਾਇਰਸ ਵਿਰੁੱਧ ਟੀਕੇ ਲਗਾਏ ਗਏ ਹਨ। ਇਸ ਲਈ ਉਮੀਦ ਹੈ ਕਿ ਅਮਰੀਕਾ ਦੁਆਰਾ ਦਿੱਤੀ ਜਾ ਰਹੀ ਇਸ ਸਹਾਇਤਾ ਨਾਲ ਬ੍ਰਾਜ਼ੀਲ ਵਿੱਚ ਜਿਆਦਾ ਲੋਕਾਂ ਦਾ ਟੀਕਾਕਰਨ ਕੀਤਾ ਜਾ ਸਕਦਾ ਹੈ।