ਫਰਿਜ਼ਨੋ (ਕੈਲੀਫੋਰਨੀਆ), 28 ਮਈ (ਗੁਰਿੰਦਰਜੀਤ ਨੀਟਾ ਮਾਛੀਕੇ / ਕੁਲਵੰਤ ਧਾਲੀਆਂ) – ਅਮਰੀਕਾ ਦੇ ਸ਼ਹਿਰ ਨਿਊ ਓਰਲੀਨਜ਼ ਵਿੱਚ ਬਾਰਾਂ ਅਤੇ ਰੈਸਟੋਰੈਂਟਾਂ ਉੱਪਰ ਲੱਗੀਆਂ ਕੋਰੋਨਾ ਪਾਬੰਦੀਆਂ ਸ਼ੁੱਕਰਵਾਰ ਨੂੰ ਖਤਮ ਹੋ ਰਹੀਆਂ ਹਨ, ਜਿਸ ਕਰਕੇ ਸ਼ਹਿਰ ਵਿੱਚ ਚੌਵੀ ਘੰਟੇ ਸ਼ਰਾਬ ਦੀ ਵਿਕਰੀ ਵਾਪਿਸ ਆ ਜਾਵੇਗੀ। ਇਹਨਾਂ ਪਾਬੰਦੀਆਂ ਦੇ ਖਤਮ ਹੋ ਜਾਣ ਨਾਲ ਡ੍ਰਿੰਕਸ, ਬਾਰਾਂ ਅਤੇ ਰੈਸਟੋਰੈਂਟਾਂ ਲਈ ਹੁਣ 6 ਫੁੱਟ ਦੀ ਦੂਰੀ ਤੇ ਟੇਬਲ ਨਹੀਂ ਲਗਾਉਣੇ ਪੈਣਗੇ ਜਦਕਿ ਲੋਕਾਂ ਨੂੰ ਬਾਰ ਵਿੱਚ ਖੜ੍ਹਨ ਦੀ ਆਗਿਆ ਵੀ ਦਿੱਤੀ ਜਾਵੇਗੀ। ਪਾਬੰਦੀਆਂ ਵਿੱਚ ਢਿੱਲ ਦੇ ਨਿਯਮ ਸਵੇਰੇ 6 ਵਜੇ ਤੋਂ ਲਾਗੂ ਹੋਣਗੇ। ਨਿਊ ਓਰਲੀਨਜ਼ ਦੀ ਇਹ ਘੋਸ਼ਣਾ , ਗਵਰਨਰ ਜੌਹਨ ਬੇਲ ਐਡਵਰਡਜ਼ ਦੁਆਰਾ ਜਾਰੀ ਇੱਕ ਐਗਜੀਕਿਊਟਿਵ ਆਦੇਸ਼ ਤੋਂ ਕੁੱਝ ਦਿਨ ਬਾਅਦ ਆਈ ਹੈ ਜਿਸ ਤਹਿਤ ਸੂਬੇ ਦੀਆਂ ਜ਼ਿਆਦਾਤਰ ਥਾਵਾਂ ਤੇ ਬਾਰਾਂ ਅਤੇ ਲਾਈਵ ਮਿਊਜ਼ਿਕ ਲਈ ਸਮਾਜਿਕ ਦੂਰੀਆਂ ‘ਤੇ ਪਾਬੰਦੀ ਖਤਮ ਕੀਤੀ ਗਈ ਹੈ। ਇਸਦੇ ਇਲਾਵਾ ਨਿਊ ਓਰਲੀਨਜ਼ ਨੇ 14 ਮਈ ਨੂੰ ਪੂਰੀ ਤਰਾਂ ਟੀਕੇ ਲਗਾਉਣ ਵਾਲੇ ਲੋਕਾਂ ਲਈ ਮਾਸਕ ਪਹਿਣਨ ਦੀ ਜਰੂਰਤ ਨੂੰ ਵੀ ਖਤਮ ਕਰ ਦਿੱਤਾ ਸੀ। ਲੂਈਸਿਆਨਾ ਦੇ ਸਿਹਤ ਵਿਭਾਗ ਦੇ ਅਨੁਸਾਰ, ਓਰਲੀਨਜ਼ ਵਿੱਚ ਵੀਰਵਾਰ ਤੱਕ 41% ਲੋਕਾਂ ਨੂੰ ਕੋਰੋਨਾ ਟੀਕੇ ਦੀਆਂ ਦੋਵੇਂ ਖੁਰਾਕਾਂ ਮਿਲ ਚੁੱਕੀਆਂ ਹਨ।