ਅਮਰੀਕਾ: ਸੋਫੇ ਤੋਂ ਮਿਲੀ ਬੰਦੂਕ ਨਾਲ 3 ਸਾਲਾ ਬੱਚੇ ਨੇ ਅਚਾਨਕ ਮਾਰੀ ਛੋਟੀ ਭੈਣ ਨੂੰ ਗੋਲੀ

ਫਰਿਜ਼ਨੋ (ਕੈਲੀਫੋਰਨੀਆ), 23 ਮਈ(ਗੁਰਿੰਦਰਜੀਤ ਨੀਟਾ ਮਾਛੀਕੇ / ਕੁਲਵੰਤ ਧਾਲੀਆਂ) – ਫਲੋਰਿਡਾ ‘ਚ ਲੇਕਲੈਂਡ ਦੇ ਇੱਕ ਘਰ ਵਿੱਚ ਇੱਕ 3 ਸਾਲਾਂ ਬੱਚੇ ਨੂੰ ਇੱਕ ਸੋਫੇ ਤੋਂ ਮਿਲੀ ਬੰਦੂਕ ਨਾਲ ਆਪਣੀ ਭੈਣ ਨੂੰ ਗੋਲੀ ਮਾਰਨ ਦੀ ਘਟਨਾ ਵਾਪਰੀ ਹੈ। ਇਸ ਘਟਨਾ ਬਾਰੇ ਜਾਣਕਾਰੀ ਦਿੰਦਿਆਂ ਪੁਲਿਸ ਅਧਿਕਾਰੀਆਂ ਨੇ ਦੱਸਿਆ ਕਿ ਇੱਕ 3 ਸਾਲ ਦੇ ਲੜਕੇ ਨੇ ਬੰਦੂਕ ਲੱਭਣ ‘ਤੇ ਅਚਾਨਕ ਹੀ ਖੇਡਦੇ ਹੋਏ ਨੇ ਆਪਣੀ 2 ਸਾਲ ਦੀ ਭੈਣ ਨੂੰ ਗੋਲੀ ਮਾਰ ਦਿੱਤੀ ਜੋ ਕਿ ਇੱਕ ਪਰਿਵਾਰਕ ਦੋਸਤ ਦੁਆਰਾ ਸੋਫੇ ਦੇ ਗੱਦੇ ਵਿਚਕਾਰ ਲੁਕੋ ਕੇ ਰੱਖੀ ਹੋਈ ਸੀ। ਲੜਕੀ ਦੇ ਗੋਲੀ ਲੱਗਣ ਤੋਂ ਬਾਅਦ, ਘਰ ਵਿੱਚ ਮੌਜੂਦ ਤਿੰਨ ਆਦਮੀ ਉਸ ਨੂੰ ਕਾਰ ਵਿੱਚ ਲੈ ਕੇ ਹਸਪਤਾਲ ਲਈ ਨਿਕਲੇ ਪਰ ਉਹ ਵੀ ਰਾਸਤੇ ਵਿੱਚ ਹਾਦਸੇ ਦਾ ਸ਼ਿਕਾਰ ਹੋ ਕੇ ਜਖਮੀ ਹੋ ਗਏ। ਜਿਸ ਉਪਰੰਤ ਉਸ ਲੜਕੀ ਅਤੇ ਇੱਕ ਹੋਰ ਜਖਮੀ ਵਿਅਕਤੀ ਨੂੰ ਇੱਕ ਰਾਹਗੀਰ ਨੇ ਹਸਪਤਾਲ ਪਹੁੰਚਾਇਆ। ਅਧਿਕਾਰੀਆਂ ਨੇ ਦੱਸਿਆ ਕਿ ਬੰਦੂਕ ਨੂੰ ਫਲੋਰਿਡਾ ਦੇ ਲੇਕਲੈਂਡ ਦੇ ਘਰ ਵਿੱਚ ਤਿੰਨ ਵਿਅਕਤੀਆਂ ਵਿੱਚੋਂ ਇੱਕ ਦੁਆਰਾ ਲਿਆਂਦਾ ਗਿਆ ਸੀ ,ਜੋ ਸ਼ੁੱਕਰਵਾਰ ਰਾਤ ਨੂੰ ਟੀਵੀ ਵੇਖਣ ਲਈ ਇਕੱਠੇ ਹੋਏ ਸਨ। ਇਸ 23 ਸਾਲਾ ਵਿਅਕਤੀ ਕੇਵੋਂਟੇ ਵਿਲਸਨ ਅਨੁਸਾਰ  ਉਸਨੇ ਬੰਦੂਕ ਨੂੰ ਸੋਫੇ ਦੇ ਵਿਚਕਾਰ ਰੱਖਿਆ ਸੀ । ਇਸ ਵਿਅਕਤੀ ਨੂੰ ਹਥਿਆਰਾਂ ਨੂੰ ਸੁਰੱਖਿਅਤ ਢੰਗ ਨਾਲ ਰੱਖਣ ਵਿੱਚ ਅਸਫਲ ਰਹਿਣ, ਇੱਕ ਛੁਪੇ ਹੋਏ ਹਥਿਆਰ ਅਤੇ ਭੰਗ ਰੱਖਣ ਦੇ ਦੋਸ਼ ਵਿੱਚ ਗ੍ਰਿਫ਼ਤਾਰ ਕੀਤਾ ਗਿਆ। ਇਸਦੇ ਇਲਾਵਾ ਘਰ ਦੇ ਮਾਲਕ, ਚਾਡ ਬੇਰੀਅਨ (24) ‘ਤੇ ਘਰ ਵਿੱਚ ਨਸ਼ੀਲੇ ਪਦਾਰਥਾਂ ਦੀ ਵਰਤੋਂ ਅਤੇ ਭੰਗ ਰੱਖਣ ਦੇ ਦੋਸ਼ ਲਗਾਏ ਗਏ ਹਨ।ਗੋਲੀ ਚਲਾਉਣ ਵਾਲੇ ਤਿੰਨ ਸਾਲਾਂ ਲੜਕੇ ਨੂੰ ਚਿਲਡਰਨ ਅਤੇ ਫੈਮਿਲੀ ਵਿਭਾਗ ਦੁਆਰਾ ਉਸਦੀ ਦਾਦੀ ਦੇ ਘਰ ਰੱਖਿਆ ਗਿਆ ਹੈ ਅਤੇ ਜਖਮੀ ਲੜਕੀ ਹਸਪਤਾਲ ਵਿੱਚ ਜੇਰੇ ਇਲਾਜ ਹੈ।