ਫਰਿਜ਼ਨੋ (ਕੈਲੀਫੋਰਨੀਆ), 22 ਮਈ (ਗੁਰਿੰਦਰਜੀਤ ਨੀਟਾ ਮਾਛੀਕੇ / ਕੁਲਵੰਤ ਧਾਲੀਆਂ) – ਅਮਰੀਕਾ ਦੇ ਰਾਸ਼ਟਰਪਤੀ ਜੋਅ ਬਾਈਡੇਨ ਨੇ ਕੋਵਿਡ -19 ਮਹਾਂਮਾਰੀ ਦੌਰਾਨ ਏਸ਼ੀਅਨ ਅਮਰੀਕੀ ਲੋਕਾਂ ਵਿਰੁੱਧ ਹੋ ਰਹੇ ਨਫ਼ਰਤ ਦੇ ਅਪਰਾਧਾਂ ਨਾਲ ਨਜਿੱਠਣ ਲਈ ਕਾਨੂੰਨ ‘ਤੇ ਦਸਤਖਤ ਕੀਤੇ ਹਨ। ਜੋਅ ਬਾਈਡੇਨ ਨੇ ਵੀਰਵਾਰ, 20 ਮਈ, 2021 ਨੂੰ ਇਸ ਕਾਨੂੰਨ ਐੱਸ. 937, ‘ਕੋਵਿਡ -19 ਹੇਟ ਕਰਾਈਜ਼ ਐਕਟ’, ‘ਤੇ ਦਸਤਖਤ ਕੀਤੇ ਹਨ। ਇਹ ਕਾਨੂੰਨ ਨਿਆਂ ਵਿਭਾਗ ਨੂੰ ਨਫ਼ਰਤ ਦੇ ਅਪਰਾਧਾਂ ਦੀ ਜਲਦੀ ਸਮੀਖਿਆ ਕਰਨ ਲਈ ਰਾਜ, ਸਥਾਨਕ ਸਰਕਾਰਾਂ ਨੂੰ ਅਧਿਕਾਰ ਦੇਵੇਗਾ। ਰਾਸ਼ਟਰਪਤੀ ਦੁਆਰਾ ਇਸ ਬਿੱਲ ਉੱਤੇ ਦਸਤਖਤ ਅਮਰੀਕੀ ਸਦਨ ਵੱਲੋਂ ਮੰਗਲਵਾਰ ਨੂੰ ਅਤੇ ਉਸ ਤੋਂ ਪਹਿਲਾਂ ਸੈਨੇਟ ਦੁਆਰਾ ਪਾਸ ਹੋਣ ਤੋਂ ਬਾਅਦ ਕੀਤੇ ਹਨ।ਇਸ ਕਾਨੂੰਨ ਦੇ ਤਹਿਤ ਜਸਟਿਸ ਵਿਭਾਗ ਨੂੰ ਅਮਰੀਕਾ ਵਿੱਚ ਨਫ਼ਰਤ ਦੇ ਅਪਰਾਧਾਂ ਦੀ ਜਲਦੀ ਸਮੀਖਿਆ ਦੀ ਲੋੜ ਹੋਵੇਗੀ। ਇਸਦੇ ਇਲਾਵਾ ਇਹ ਕਾਨੂੰਨ ਰਾਜਾਂ ਦੁਆਰਾ ਨਫ਼ਰਤੀ ਅਪਰਾਧਾਂ ਨੂੰ ਕਾਬੂ ਕਰਨ ਲਈ ਚਲਾਈਆਂ ਜਾਣ ਵਾਲੀਆਂ ਹਾਟਲਾਈਨਜ ਜਾਂ ਹੋਰ ਪ੍ਰਬੰਧ ਲਈ ਅਤੇ ਅਪਰਾਧਾਂ ਬਾਰੇ ਵਧੇਰੇ ਅੰਕੜੇ ਇਕੱਠੇ ਕਰਨ ਦੀਆਂ ਕੋਸ਼ਿਸ਼ਾਂ ਨੂੰ ਉਤਸ਼ਾਹਤ ਕਰਨ ਲਈ ਗਰਾਂਟ ਵੀ ਪ੍ਰਦਾਨ ਕਰੇਗਾ। ਇਸ ਕਾਨੂੰਨ ਵਿੱਚ ਕੋਈ ਵੀ ਵਿਅਕਤੀ ਜਿਸਨੂੰ ਨਫ਼ਰਤ ਦੇ ਅਪਰਾਧ ਲਈ ਦੋਸ਼ੀ ਠਹਿਰਾਇਆ ਗਿਆ ਹੈ, ਨੂੰ ਵਿਦਿਅਕ ਕਲਾਸਾਂ ਜਾਂ ਕਮਿਊਨਿਟੀ ਸੇਵਾਵਾਂ ਵਿੱਚ ਹਿੱਸਾ ਲੈਣ ਦੀ ਜਰੂਰਤ ਹੋਵੇਗੀ।