ਨਵੀਂ ਦਿੱਲੀ29 ਸਤੰਬਰ 2023 – ਦਿੱਲੀ ਦੇ ਸੁਰੱਖਿਅਤ ਅਤੇ ਪੌਸ਼ ਖੇਤਰ ਜੰਗਪੁਰਾ ਇਲਾਕੇ ਵਿਚ ਇੱਕ ਗਹਿਣਿਆਂ ਦੇ ਸ਼ੋਅਰੂਮ ਵਿਚ ਹੋਈ 25 ਕਰੋੜ ਰੁਪਏ ਦੇ ਗਹਿਣਿਆਂ ਦੀ ਹਾਈ-ਪ੍ਰੋਫਾਈਲ ਚੋਰੀ ਦੇ ਮਾਮਲੇ ਵਿਚ ਪੁਲਿਸ ਨੂੰ ਵੱਡੀ ਸਫ਼ਲਤਾ ਮਿਲੀ ਹੈ , ਜਿਸਦੇ ਚਲਦਿਆਂ ਦਿੱਲੀ ਪੁਲਿਸ ਨੇ ਦੋ ਵਿਅਕਤੀਆਂ ਨੂੰ ਹਿਰਾਸਤ ‘ਚ ਲਿਆ ਹੈ। ਦਿੱਲੀ ਪੁਲਿਸ ਇਸ ਮਾਮਲੇ ਵਿਚ ਛੱਤੀਸਗੜ੍ਹ ਦੇ ਦੋ ਲੋਕਾਂ ਨੂੰ ਹਿਰਾਸਤ ਵਿਚ ਲੈ ਕੇ ਪੁੱਛਗਿੱਛ ਕਰ ਰਹੀ ਹੈ। ਮੁਲਜ਼ਮਾਂ ਦੀ ਪਛਾਣ ਲੋਕੇਸ਼ ਸ੍ਰੀਵਾਸ ਅਤੇ ਦੂਜੇ ਦੀ ਸ਼ਿਵ ਚੰਦਰਵੰਸ਼ੀ ਵਜੋਂ ਹੋਈ ਹੈ।
ਜਾਣਕਾਰੀ ਅਨੁਸਾਰ ਛੱਤੀਸਗੜ੍ਹ ਦੀ ਦੁਰਗ ਪੁਲਿਸ ਨੇ ਨਾਮੀ ਚੋਰ ਲੋਕੇਸ਼ ਸ੍ਰੀਨਿਵਾਸ ਅਤੇ ਸ਼ਿਵ ਚੰਦਰਵੰਸ਼ੀ ਨੂੰ 25 ਕਿਲੋ ਸੋਨੇ ਸਮੇਤ ਗ੍ਰਿਫ਼ਤਾਰ ਕਰਨ ਵਿਚ ਸਫ਼ਲਤਾ ਹਾਸਲ ਕੀਤੀ ਹੈ। ਲੋਕੇਸ਼ ਕੋਲੋਂ ਬਰਾਮਦ ਹੋਇਆ ਇਹ ਸੋਨਾ ਅਤੇ ਨਕਦੀ ਦਿੱਲੀ ਵਿਚ 25 ਕਰੋੜ ਰੁਪਏ ਦੀ ਚੋਰੀ ਨਾਲ ਸਬੰਧਤ ਦੱਸੀ ਜਾਂਦੀ ਹੈ। ਬਿਲਾਸਪੁਰ ਅਤੇ ਰਾਜਨੰਦਗਾਓਂ ਪੁਲਿਸ ਵੀ ਲੰਬੇ ਸਮੇਂ ਤੋਂ ਲੋਕੇਸ਼ ਸ਼੍ਰੀਨਿਵਾਸ ਦੀ ਤਲਾਸ਼ ਕਰ ਰਹੀ ਸੀ। ਇਸ ਤੋਂ ਪਹਿਲਾਂ ਵੀ ਲੋਕੇਸ਼ ਸ੍ਰੀਨਿਵਾਸ ਨੂੰ ਦੁਰਗ ਪੁਲਿਸ ਨੇ ਆਕਾਸ਼ਗੰਗਾ ਵਿਚ ਪਰਖ ਜਵੈਲਰਜ਼ ਵਿਚ ਚੋਰੀ ਦੇ ਮਾਮਲੇ ਵਿਚ ਸਾਮਾਨ ਸਮੇਤ ਗ੍ਰਿਫ਼ਤਾਰ ਕੀਤਾ ਸੀ। ਫਿਲਹਾਲ ਦੁਰਗ ਪੁਲਿਸ ਇਕ ਹੋਰ ਮਾਮਲੇ ‘ਚ ਲੋਕੇਸ਼ ਤੋਂ ਪੁੱਛਗਿੱਛ ਕਰ ਰਹੀ ਹੈ।
ਦੱਸ ਦਈਏ ਕਿ 4 ਦਿਨ ਪਹਿਲਾਂ ਦਿੱਲੀ ਦੇ ਭੋਗਲ ਇਲਾਕੇ ‘ਚ ਸਥਿਤ ਉਮਰਾਓ ਸਿੰਘ ਜਵੈਲਰਜ਼ ਦੇ ਸ਼ੋਅਰੂਮ ‘ਚੋਂ ਤਿੰਨ ਅਣਪਛਾਤੇ ਵਿਅਕਤੀਆਂ ਨੇ ਕਰੀਬ 25 ਕਰੋੜ ਰੁਪਏ ਦੇ ਗਹਿਣੇ ਚੋਰੀ ਕਰ ਲਏ ਸਨ। ਪੁਲਿਸ ਜਾਣਕਾਰੀ ਅਨੁਸਾਰ ਚੋਰ ਸ਼ੋਅਰੂਮ ਦੀ ਛੱਤ ਦਾ ਤਾਲਾ ਪੁੱਟ ਕੇ ਅੰਦਰ ਦਾਖ਼ਲ ਹੋ ਗਏ ਸਨ। ਉਹ ਇੱਥੋਂ ਸੋਨਾ, ਹੀਰੇ ਅਤੇ ਗਹਿਣੇ ਚੋਰੀ ਕਰਕੇ ਭੱਜ ਗਏ। ਇਸ ਚੋਰੀ ਦੀ ਘਟਨਾ ਬਾਰੇ ਸ਼ੋਅਰੂਮ ਮਾਲਕ ਨੂੰ ਮੰਗਲਵਾਰ ਸਵੇਰੇ ਪਤਾ ਲੱਗਾ।ਪੁਲਿਸ ਨੇ ਮਾਮਲੇ ‘ਚ ਦੱਸਿਆ ਕਿ ਸੋਮਵਾਰ ਨੂੰ ਇਲਾਕੇ ਦੀਆਂ ਸਾਰੀਆਂ ਦੁਕਾਨਾਂ ਬੰਦ ਰਹਿਣਗੀਆਂ। ਇਸ ਲਈ ਇਹ ਘਟਨਾ ਐਤਵਾਰ ਰਾਤ ਅਤੇ ਸੋਮਵਾਰ ਦਰਮਿਆਨ ਵਾਪਰਨ ਦੀ ਸੰਭਾਵਨਾ ਹੈ। ਦੁਕਾਨ ਮਾਲਕ ਮਹਾਵੀਰ ਪ੍ਰਸਾਦ ਜੈਨ ਨੇ ਦੱਸਿਆ ਕਿ ਉਨ੍ਹਾਂ ਦਾ ਸ਼ੋਅਰੂਮ ਕਰੀਬ 75 ਸਾਲ ਪੁਰਾਣਾ ਹੈ। ਉਸ ਨੇ ਐਤਵਾਰ ਰਾਤ ਕਰੀਬ 8 ਵਜੇ ਦੁਕਾਨ ਬੰਦ ਕੀਤੀ ਸੀ ਅਤੇ ਮੰਗਲਵਾਰ ਸਵੇਰੇ ਕਰੀਬ 10.30 ਵਜੇ ਦੁਕਾਨ ਖੋਲ੍ਹਣ ‘ਤੇ ਉਸ ਨੂੰ ਘਟਨਾ ਦਾ ਪਤਾ ਲੱਗਾ। ਦੁਕਾਨ ਦੀ ਜ਼ਮੀਨੀ ਮੰਜ਼ਿਲ ‘ਤੇ ਇੱਕ ਤਿੱਖੀ ਧਾਤੂ ਦੇ ਗੇਟ ਅਤੇ ਤਿੰਨ ਪਾਸੇ ਕੰਧਾਂ ਦੇ ਨਾਲ ਇੱਕ ਸੇਫ਼ ਹੈ। ਗਾਹਕਾਂ ਨਾਲ ਲੈਣ-ਦੇਣ ਸ਼ੋਅਰੂਮ ਦੀ ਹੇਠਲੀ ਮੰਜ਼ਿਲ ‘ਤੇ ਹੀ ਹੁੰਦਾ ਹੈ, ਜਦੋਂ ਕਿ ਇਸ ਦੀਆਂ ਉਪਰਲੀਆਂ ਤਿੰਨ ਮੰਜ਼ਿਲਾਂ ਸਟੋਰਰੂਮਾਂ ਅਤੇ ਗਹਿਣਿਆਂ ਨਾਲ ਸਬੰਧਤ ਹੋਰ ਕੰਮਾਂ ਲਈ ਵਰਤੀਆਂ ਜਾਂਦੀਆਂ ਹਨ। ਡੀਸੀਪੀ ਨੇ ਦੱਸਿਆ ਕਿ ਇਸ ਘਟਨਾ ਸਬੰਧੀ ਹਜ਼ਰਤ ਨਿਜ਼ਾਮੂਦੀਨ ਥਾਣੇ ਵਿਚ ਕੇਸ ਦਰਜ ਕਰ ਲਿਆ ਗਿਆ ਹੈ। ਮਾਮਲੇ ਨੂੰ ਜਲਦੀ ਹੱਲ ਕਰਨ ਲਈ ਕਈ ਟੀਮਾਂ ਬਣਾਈਆਂ ਗਈਆਂ ਹਨ। ਮੁਲਜ਼ਮਾਂ ਨੂੰ ਜਲਦੀ ਗ੍ਰਿਫ਼ਤਾਰ ਕਰ ਲਿਆ ਜਾਵੇਗਾ।