ਫਾਜ਼ਿਲਕਾ 11 ਅਗਸਤ (ਰਿਤਿਸ਼) – ਰਾਜ ਵਿਚ ਫੈਲੀ ਲੰਪੀ ਸਕਿਨ ਬਿਮਾਰੀ ਦੇ ਮੱਦੇਨਜ਼ਰ ਡਾ ਹਿਮਾਂਸ਼ੂ ਅਗਰਵਾਲ ਆਈ ਏ ਐਸ ਡਿਪਟੀ ਕਮਿਸ਼ਨਰ ਕਮ ਜ਼ਿਲਾ ਮੈਜਿਸਟ੍ਰੇਟ ਫਾਜ਼ਿਲਕਾ ਵੱਲੋਂ ਫੌਜਦਾਰੀ ਸੰਘਤਾ 1973 ਦੀ ਧਾਰਾ 144 ਤਹਿਤ ਮਿਲੇ ਅਧਿਕਾਰਾਂ ਦੀ ਵਰਤੋਂ ਕਰਦਿਆਂ ਜ਼ਿਲ੍ਹਾ ਫਾਜ਼ਿਲਕਾ ਦੀ ਹਦੂਦ ਅੰਦਰ ਪਸ਼ੂਆਂ ਦੇ ਆਵਾਗਮਨ (ਵੇਚਣ, ਖ਼ਰੀਦਣ, ਮੰਡੀਕਰਨ ਅਤੇ ਟਰਾਂਸਪੋਰਟ) ਤੇ ਪੂਰਨ ਤੌਰ ਤੇ ਰੋਕ ਲਗਾ ਦਿੱਤੀ ਹੈ । ਹੁਕਮਾਂ ਅਨੁਸਾਰ ਲੰਪੀ ਸਕਿਨ ਰੋਗ ਕਾਰਨ ਪਸ਼ੂ ਦੀ ਮੌਤ ਹੋ ਜਾਣ ਤੇ ਉਸ ਨੂੰ ਵਿਭਾਗੀ ਹਦਾਇਤਾਂ ਅਨੁਸਾਰ ਦਬਾਉਣਾ ਲਾਜ਼ਮੀ ਕੀਤਾ ਗਿਆ ਹੈ । ਹੁਕਮਾਂ ਅਨੁਸਾਰ ਲੰਪੀ ਸਕਿਨ ਬਿਮਾਰੀ ਕਾਰਨ ਪਸ਼ੂ ਦੀ ਮੌਤ ਹੋ ਜਾਣ ਤੇ ਉਸਨੂੰ ਅੱਠ ਗੁਣਾ ਸੱਤ ਗੁਣਾ ਛੇ ਫੁੱਟ ਦਾ ਟੋਆ ਪੁੱਟ ਕੇ ਦਬਾਇਆ ਜਾਣਾ ਯਕੀਨੀ ਬਣਾਇਆ ਜਾਵੇ । ਇਸੇ ਤਰ੍ਹਾਂ ਮ੍ਰਿਤਕ ਪਸ਼ੂਆਂ ਨੂੰ ਉਨ੍ਹਾਂ ਦੇ ਮਾਲਕਾਂ ਵੱਲੋਂ ਨਹਿਰਾਂ ਵਿਚ ਜਾਂ ਸੜਕਾਂ ਆਦਿ ਕਿਨਾਰੇ ਨਾ ਸੁੱਟਣ ਦੀ ਸਖ਼ਤ ਹਦਾਇਤ ਕੀਤੀ ਗਈ ਹੈ । ਹੁਕਮਾਂ ਅਨੁਸਾਰ ਜੋ ਕੋਈ ਵੀ ਮਿਰਤਕ ਪਸ਼ੂਆਂ ਨੂੰ ਵਿਭਾਗੀ ਹਦਾਇਤਾਂ ਅਨੁਸਾਰ ਟੋਆ ਪੁੱਟ ਕੇ ਦਬਾਏਗਾ ਨਹੀਂ ਅਤੇ ਮ੍ਰਿਤਕ ਜਾਨਵਰ ਨਹਿਰਾਂ ਜਾਂ ਸੜਕਾਂ ਕਿਨਾਰੇ ਸੁੱਟੇਗਾ ਤਾਂ ਉਨ੍ਹਾਂ ਖਿਲਾਫ਼ ਨਿਯਮਾਂ ਅਨੁਸਾਰ ਸਖ਼ਤ ਕਾਰਵਾਈ ਅਮਲ ਵਿਚ ਲਿਆਂਦੀ ਜਾਵੇਗੀ ।