ਇਹ ਸਮਝੋਤਾ ਵਿਦਿਆਰਥੀਆਂ ਦੇ ਹੁਨਰ ਵਿਕਾਸ, ਇੰਟਰਨਸ਼ਿਪਾਂ ਅਤੇ ਪਲੇਸਮੈਂਟਾਂ ਲਈ ਹੋਵੇਗਾ ਲਾਹੇਵੰਦ…
ਬਠਿੰਡਾ, 22 ਜੂਨ – ਮਹਾਰਾਜਾ ਰਣਜੀਤ ਸਿੰਘ ਪੰਜਾਬ ਟੈਕਨੀਕਲ ਯੂਨੀਵਰਸਿਟੀ (ਐੱਮ.ਆਰ.ਐੱਸ.ਪੀ.ਟੀ.ਯੂ.), ਬਠਿੰਡਾ ਅਤੇ ਜੀ.ਐਨ.ਏ. ਗੀਅਰਜ਼ ਲਿਮਟਿਡ, ਫਗਵਾੜਾ (ਜੋ ਸਮੂਹ ਭਾਰਤ ਦੇ ਸਭ ਤੋਂ ਪ੍ਰਮੁੱਖ ਅਤੇ ਸਭ ਤੋਂ ਵੱਡੇ ਆਟੋਮੋਟਿਵ ਟਰਾਂਸਮਿਸ਼ਨ ਕੰਪੋਨੈਂਟ ਨਿਰਮਾਤਾਵਾਂ ਵਿੱਚੋਂ ਇੱਕ ਹੈ) ਵਿਚਕਾਰ ਇੱਕ ਸਮਝੋਤਾ ਸਹੀਬੱਧ ਕੀਤਾ ਗਿਆ। ਇਹ ਸਮਝੋਤਾ ਵਿਦਿਆਰਥੀਆਂ ਲਈ ਹੁਨਰ ਵਿਕਾਸ, ਇੰਟਰਨਸ਼ਿਪ ਅਤੇ ਪਲੇਸਮੈਂਟ ਦੇ ਹੋਰ ਮੌਕੇ ਪ੍ਰਦਾਨ ਕਰੇਗਾ।
ਯੂਨੀਵਰਸਿਟੀ ਦੇ ਡਾਇਰੈਕਟਰ, ਟ੍ਰੇਨਿੰਗ ਅਤੇ ਪਲੇਸਮੈਂਟ, ਹਰਜੋਤ ਸਿੰਘ ਸਿੱਧੂ, ਅਤੇ ਜੀ.ਐਨ.ਏ. ਗੀਅਰਜ਼, ਫਗਵਾੜਾ ਦੇ ਡਾਇਰੈਕਟਰ ਕੀਰਤ ਸੇਹਰਾ ਨੇ ਜੀ.ਐਨ.ਏ. ਗੀਅਰਜ਼ ਲਿਮਟਿਡ ਵਿਖੇ ਇਸ ਸਹਿਮਤੀ ਪੱਤਰ ‘ਤੇ ਹਸਤਾਖਰ ਕੀਤੇ।
ਐਮ.ਆਰ.ਐਸ.ਪੀ.ਟੀ.ਯੂ. ਦੇ ਵਾਈਸ ਚਾਂਸਲਰ ਪ੍ਰੋ. ਬੂਟਾ ਸਿੰਘ ਸਿੱਧੂ ਨੇ ਕਿਹਾ ਕਿ ਸੰਸਥਾਵਾਂ ਤੋਂ ਉਭਰਦੇ ਗ੍ਰੈਜੂਏਟ ਵਿਦਿਆਰਥੀ ਕਿਸੇ ਉਦਯੋਗ ਦੇ ਤਕਨੀਕੀ ਅਪਗ੍ਰੇਡੇਸ਼ਨ, ਨਵੀਨਤਾ ਅਤੇ ਮੁਕਾਬਲੇਬਾਜ਼ੀ ਵਿੱਚ ਅਹਿਮ ਭੂਮਿਕਾ ਨਿਭਾ ਸਕਦੇ ਹਨ। ਦੋਵਾਂ ਸੰਸਥਾਵਾਂ ਵਿਚਕਾਰ ਨਜ਼ਦੀਕੀ ਸਹਿਯੋਗ ਵਿਦਿਆਰਥੀਆਂ ਨੂੰ ਆਪਣਾ ਹੁਨਰ ਅਤੇ ਗਿਆਨ ਵਿਚ ਵਾਧਾ ਲਿਆਉਣ ਲਈ ਲਾਭਦਾਇਕ ਸਿੱਧ ਹੋਵੇਗਾ।
ਯੂਨੀਵਰਸਿਟੀ ਦੇ ਡਾਇਰੈਕਟਰ, ਟ੍ਰੇਨਿੰਗ ਅਤੇ ਪਲੇਸਮੈਂਟ ਨੇ ਕਿਹਾ ਕਿ ਅੱਜ ਦੇ ਐਮ.ਓ.ਯੂ. ਦਾ ਮੁੱਖ ਉਦੇਸ਼ ਉਦਯੋਗ ਅਤੇ ਅਕਾਦਮਿਕਤਾ ਵਿਚਕਾਰ ਪਾੜੇ ਨੂੰ ਪੂਰਾ ਕਰਨਾ ਹੈ। ਇਸ ਸਹਿਮਤੀ ਪੱਤਰ ਦੇ ਹਿੱਸੇ ਵਜੋਂ, ਦੋਵੇਂ ਸੰਸਥਾਵਾਂ ਜੀ.ਐਨ.ਏ. ਗੀਅਰਜ਼ ਲਿਮਿਟੇਡ ਐਫ.ਡੀ.ਐਮ., ਸੀ.ਐਨ.ਸੀ., ਸੀ.ਐਮ.ਐਮ. ਅਤੇ ਹੋਰ ਬਹੁਤ ਸਾਰੇ ਨਾਲ ਏਕੀਕ੍ਰਿਤ ਨਵੀਨਤਮ ਤਕਨਾਲੋਜੀ ਕੈਡ/ ਕੈਮ/ ਸੀ.ਏ.ਈ. ਸੌਫਟਵੇਅਰ ਦੇ ਖੇਤਰਾਂ ਵਿੱਚ ਖੋਜ ਅਤੇ ਵਿਕਾਸ ਗਤੀਵਿਧੀਆਂ ਨੂੰ ਪੂਰਾ ਕਰਨ ਲਈ ਸਹਿਯੋਗ ਕਰਨਗੀਆਂ। ਦੋਨੋਂ ਸੰਸਥਾਵਾਂ ਯੂਨੀਵਰਸਿਟੀ ਦੇ ਵਿਦਿਆਰਥੀਆਂ ਲਈ ਆਧੁਨਿਕ ਸਿਖਲਾਈ, ਇੰਟਰਨਸ਼ਿਪ ਅਤੇ ਪਲੇਸਮੈਂਟ ਪ੍ਰਦਾਨ ਕਰਨ ਵਿੱਚ ਸਹਿਯੋਗ ਦੇਣਗੀਆਂ।
ਡਾਇਰੈਕਟਰ ਸਿੱਧੂ ਨੇ ਕਿਹਾ ਕਿ ਜੀ.ਐਨ.ਏ. ਗੀਅਰਜ਼ ਲਿਮਿਟੇਡ, ਲੋੜ ਪੈਣ ‘ਤੇ ਵਿਦਿਆਰਥੀਆਂ ਨੂੰ ਸਿਖਲਾਈ ਦੇਣ ਲਈ ਉਦਯੋਗਿਕ ਦੌਰੇ ਪ੍ਰਦਾਨ ਕਰੇਗੀ। ਐਮ.ਓ.ਯੂ. ਵਿੱਚ ਵੱਖ-ਵੱਖ ਹੁਨਰ ਅਤੇ ਫੈਕਲਟੀ ਵਿਕਾਸ ਪ੍ਰੋਗਰਾਮਾਂ ਲਈ ਸਹਿਯੋਗ, ਉਦਯੋਗ ਦੇ ਮਾਹਿਰਾਂ ਦੁਆਰਾ ਮਾਹਿਰ ਗੱਲਬਾਤ ਵੀ ਸ਼ਾਮਲ ਹੈ।
ਉਹਨਾਂ ਇਹ ਵੀ ਕਿਹਾ ਕਿ ਇਹ ਸਹਿਯੋਗ ਬੀ.ਟੈਕ ਮਕੈਨੀਕਲ ਇੰਜਨੀਅਰਿੰਗ ਦੇ ਵਿਦਿਆਰਥੀਆਂ ਲਈ ਵੱਡੇ ਪੱਧਰ ‘ਤੇ ਹੁਲਾਰਾ ਦੇਵੇਗਾ ਅਤੇ ਪਲੇਸਮੈਂਟ ਦੇ ਮੌਕੇ ਪੈਦਾ ਕਰੇਗਾ।
ਇਸ ਮੌਕੇ ‘ਤੇ ਜੀ.ਜੈਡ.ਐਸ. ਦੇ ਐਮ.ਈ. ਵਿਭਾਗ ਦੇ ਏ.ਪੀ. ਗਗਨਦੀਪ ਸੋਢੀ, ਜੀ.ਐਨ.ਏ. ਗੀਅਰਜ਼ ਦੇ ਸੀਨੀਅਰ ਵਾਈਸ ਪ੍ਰੈਜ਼ੀਡੈਂਟ ਓਪਰੇਸ਼ਨ, ਸ਼ਸ਼ੀਕਾਂਤ ਕੁਲਕਰਨੀ, ਹੈੱਡ-ਐਚ.ਆਰ., ਰਸ਼ਪਾਲ ਬਾਂਸਲ, ਡਿਜ਼ਾਇਨ ਅਤੇ ਨਵੀਨਤਾ ਦੇ ਡੀਨ-ਫੈਕਲਟੀ, ਸੀ.ਆਰ. ਤ੍ਰਿਪਾਠੀ, ਸਹਾਇਕ ਤਕਨੀਕੀ ਪ੍ਰਬੰਧਕ, ਨੀਰਜ ਕੁਮਾਰ ਮਾਹੇ- ਹਾਜ਼ਰ ਸਨ।