ਕੋਰੋਨਾ ਮਹਾਮਾਰੀ ਕਾਰਨ ਜਿਨ੍ਹਾਂ ਬੱਚਿਆਂ ਦੇ ਮਾਪਿਆਂ ਦੀ ਜਾਨ ਚਲੀ ਗਈ ਹੈ ਉਨ੍ਹਾਂ ਦੀ ਆਰਥਿਕ ਪਰੇਸ਼ਾਨੀ ਨੂੰ ਦੇਖਦੇ ਹੋਏ ਸੀਬੀਐੱਸਈ ਨੇ ਤੈਅ ਕੀਤਾ ਹੈ ਕਿ ਉਹ ਇਨ੍ਹਾਂ ਤੋਂ ਪ੍ਰੀਖਿਆ ਤੇ ਰਜਿਸਟ੍ਰੇਸ਼ਨ ਫੀਸ ਨਹੀਂ ਲਵੇਗਾ। ਇਸ ਸਬੰਧੀ ਸੀਬੀਐੱਸਈ ਦੇ ਪ੍ਰੀਖਿਆ ਕੰਟਰੋਲ ਸੰਯਮ ਭਾਰਦਵਾਜ ਨੇ ਮੰਗਲਵਾਰ ਨੂੰ ਸਾਰੇ ਸਕੂਲਾਂ ਦੇ ਮੁੱਖ ਅਧਿਆਪਕਾਂ ਨੂੰ ਪੱਤਰ ਜਾਰੀ ਕਰ ਕੇ ਕਿਹਾ ਹੈ ਕਿ ਸਕੂਲ ਬੋਰਡ ਪ੍ਰੀਖਿਆ ਦੇਣ ਵਾਲੇ ਅਜਿਹੇ ਸਾਰੇ 10ਵੀਂ ਤੇ 12ਵੀਂ ਦੇ ਵਿਦਿਆਰਥੀਆਂ ਦੀ ਜਾਂਚ ਕਰੋ ਜਿਹੜੇ ਕੋਰੋਨਾ ਦੌਰਾਨ ਅਨਾਥ ਹੋ ਗਏ ਹਨ। ਬੋਰਡ ਦੀ ਲਿਸਟ ਆਫ ਕੈਂਡੀਡੇਟ ਉਪਲਬਧ ਕਰਵਾਉਂਦੇ ਸਮੇਂ ਉਨ੍ਹਾਂ ਦੀ ਜਾਣਕਾਰੀ ਦਿੱਤੀ ਜਾਵੇ। ਬੋਰਡ ਨੇ ਇਹ ਵੀ ਸਪਸ਼ਟ ਕੀਤਾ ਕਿ ਇਹ ਛੋਟ ਸਿਰਫ਼ ਇਜਲਾਸ 2021-22 ਦੇ ਵਿਦਿਆਰਥੀਆਂ ਲਈ ਹੀ ਰਹੇਗੀ।
ਸੀਬੀਐੱਸਈ ਦੀ ਨਵੰਬਰ-ਦਸੰਬਰ ’ਚ ਹੋਣ ਵਾਲੀਆਂ ਪ੍ਰੀਖਿਆਵਾਂ ਦੀ ਰਜਿਸਟ੍ਰੇਸ਼ਨ ਸ਼ੁਰੂ ਹੋ ਗਈ ਹੈ। ਸਕੂਲਾਂ ਨੂੰ 30 ਸਤੰਬਰ ਤਕ ਬਗ਼ੈਰ ਦੇਰੀ ਫ਼ੀਸ ਦੇ ਤੇ ਨੌਂ ਅਕਤੂਬਰ ਤਕ ਦੇਰੀ ਫੀਸ ਨਾਲ ਸੀਬੀਐੱਸਈ ਦੀ ਵੈਬਸਾਈਟ ’ਤੇ ਈ-ਪ੍ਰੀਖਿਆ ਲਿੰਕ ਰਾਹੀਂ ਐੱਲਓਸੀ ਜਮ੍ਹਾਂ ਕਰਨੀ ਹੈ।