ਬਠਿੰਡਾ, 9 ਅਗਸਤ – ਸਟੇਟ ਬੈਂਕ ਆਫ ਇੰਡੀਆ ਪੇਂਡੂ ਸਵੈ-ਰੁਜ਼ਗਾਰ ਸਿਖਲਾਈ ਸੰਸਥਾ(ਆਰਸੇਟੀ), ਬਠਿੰਡਾ ਵਿੱਚ ਚਲ ਰਹੇ ਸਿਖਲਾਈ ਪ੍ਰੋਗਰਾਮਾਂ ਦੀਆਂ ਸਿਖਿਆਰਥਣਾਂ ਨੇ ਤੀਆਂ ਦਾ ਤਿਉਹਾਰ ਬੜੀ ਧੂਮ- ਧਾਮ ਨਾਲ ਮਨਾਇਆ।
ਇਸ ਦੌਰਾਨ ਆਰਸੈੱਟੀ ਦੁਆਰਾ ਪਿੰਡ ਧੁੰਨੀਕੇ ਵਿੱਚ ਚੱਲ ਰਹੇ ਸਿਖਲਾਈ ਪ੍ਰੋਗਰਾਮ ਜੂਟ ਪ੍ਰੋਡਕਟ ਉੱਦਮੀ ਸਿਖਲਾਈ ਪ੍ਰੋਗਰਾਮ ਦੀਆਂ ਸਿਖਿਆਰਥਣਾਂ ਵੱਲੋਂ ਪੁਰਾਤਨ ਰਿਵਾਇਤ ਅਨੁਸਾਰ ਲੰਬੀ ਹੇਕ ਵਾਲੇ ਲੋਕ ਗੀਤ ਗਾਏ ਗਏ। ਸਿਖਿਆਰਥਣਾਂ ਵੱਲੋਂ ਗਿੱਧੇ ਦਾ ਪਿੜ ਵੀ ਸਥਾਪਿਤ ਕੀਤਾ ਅਤੇ ਬੋਲੀਆਂ ਪਾ ਕੇ ਗਿੱਧੇ ਦੀ ਧਮਾਲ ਵੀ ਪਾਈ ਗਈ।
ਇਸ ਤਿਉਹਾਰ ਮੌਕੇ ਸਿੱਖਿਆਰਥਣਾਂ ਵੱਲੋਂ ਪੀਂਘ ਝੂਟਣ ਅਤੇ ਚਰਖਾ ਕੱਤਣ ਦੀਆਂ ਕਲਾਕ੍ਰਿਤਾਂ ਵੀ ਪੇਸ਼ ਕੀਤੀਆਂ ਗਈਆਂ। ਪਿੰਡ ਦੀ ਸਰਪੰਚ ਸ੍ਰੀਮਤੀ ਵੀਰਪਾਲ ਕੌਰ ਨੇ ਦੱਸਿਆ ਕਿ ਸਾਉਣ ਦੇ ਮਹੀਨੇ ਵਿੱਚ ਵਿਆਹੁਤਾ ਔਰਤਾਂ ਆਪਣੇ ਪੇਕੇ ਆਉਣ ਉਪਰੰਤ ਆਪਣੀਆਂ ਸਹੇਲੀਆਂ ਨਾਲ ਮਿਲ ਕੇ ਗਿੱਧਾ ਪਾਉਂਦੀਆਂ ਅਤੇ ਆਪਣੇ ਹਾਵ-ਭਾਵ ਪ੍ਰਗਟ ਕਰਦੀਆਂ ਹਨ।
ਇਸ ਦੌਰਾਨ ਆਰਸੈੱਟੀ ਬਠਿੰਡਾ ਵਿੱਚ ਚਲ ਰਹੇ ਬਿਊਟੀ ਪਾਰਲਰ ਸਿਖਲਾਈ ਪ੍ਰੋਗਰਾਮ ਦੀਆਂ ਸਿਖਿਆਰਥਣਾਂ ਵੱਲੋਂ ਰਿਵਾਇਤੀ ਸਭਿਆਚਾਰਕ ਪਹਿਰਾਵੇ ਵਿੱਚ ਸੱਜੀਆਂ ਮੁਟਿਆਰਾਂ ਦੁਆਰਾ ਵੀ ਗਿੱਧੇ ਵਿੱਚ ਬੋਲੀਆਂ ਪਾਈਆਂ ਗਈਆਂ। ਇਸ ਮੌਕੇ ਡਾਇਰੈਕਟਰ ਆਰਸੈਟੀ ਸ਼੍ਰੀ ਭੂਸ਼ਣ ਕੁਮਾਰ ਨੇ ਕਿਹਾ ਕਿ ਸਾਨੂੰ ਆਪਣੇ ਵਿਰਸੇ ਨਾਲ ਹਮੇਸ਼ਾ ਜੁੜ ਕੇ ਰਹਿਣਾ ਚਾਹੀਦਾ ਹੈ। ਇਸ ਸਮੇਂ ਆਰਸੈੱਟੀ ਦਾ ਸਟਾਫ ਅਤੇ ਸਿਖਲਾਈ ਪ੍ਰੋਗਰਾਮਾਂ ਦੀਆਂ ਗੈਸਟ ਫੈਕਲਟੀਆਂ ਵੀ ਹਾਜ਼ਰ ਰਹੀਆਂ।