ਲੰਬੀ, 29 ਜੁਲਾਈ (ਪਰਗਟ ਸਿੰਘ ) – ਹਲਕਾ ਲੰਬੀ ਦੇ ਪਿੰਡ ਧੌਲਾ ਵਿਖੇ ਬੀਤੇ ਦਿਨੀਂ ਪਏ ਮੀਂਹ ਕਾਰਣ ਅਨੁਸੂਚਿਤ ਜਾਤੀ ਨਾਲ ਸਬੰਧਤ ਗਰੀਬ ਪਰਿਵਾਰ ਦੇ ਕਮਰੇ ਦੀ ਛੱਤ ਡਿੱਗ ਪਈ ਹੈ। ਇਸ ਅਣਸੁਖਾਵੀਂ ਘਟਨਾ ਵਿੱਚ ਪਰਿਵਾਰ ਵਾਲ ਵਾਲ ਬੱਚ ਗਿਆ ਹੈ। ਮਜ਼ਦੂਰੀ ਕਰਕੇ ਪਰਿਵਾਰ ਪਾਲ ਰਹੇ ਗਰੀਬ ਪਰਿਵਾਰ ਦਾ ਤਕਰੀਬਨ ਇੱਕ ਲੱਖ ਰੁਪਏ ਦਾ ਮਾਲੀ ਨੁਕਸਾਨ ਹੋ ਗਿਆ ਹੈ। ਘਰ ਦੇ ਮੁਖੀ ਜਸਵਿੰਦਰ ਸਿੰਘ ਉਮਰ 50 ਸਾਲ ਨੇ ਦੱਸਿਆ ਹੈ ਕਿ ਉਸਦੇ ਇੱਕ ਪੁੱਤਰ ਤੇ ਦੋ ਧੀਆਂ ਹਨ। ਪੁੱਤਰ ਜਗਰਾਜ ਸਿੰਘ 21 ਸਾਲ ਦਾ ਹੈ ਜਦੋਂ ਕਿ ਉਸਦੀ ਵੱਡੀ ਬੇਟੀ ਜੋਤੀ ਕੌਰ 19 ਸਾਲ ਅਤੇ ਛੋਟੀ ਬੇਟੀ ਕਿਰਨਜੀਤ ਕੌਰ 16 ਸਾਲ ਦੀ ਹੈ। ਜਸਵਿੰਦਰ ਸਿੰਘ ਨੇ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਲਗਾਤਾਰ ਮੀਂਹ ਪੈਂਦੇ ਰਹਿਣ ਕਾਰਣ ਇਹ ਘਟਨਾ ਵਾਪਰੀ ਹੈ! ਮਕਾਨ ਡਿੱਗਣ ਸਮੇਂ ਉਹ ਘਰ ਦੇ ਕੰਮ ਵਿੱਚ ਰੁੱਝੇ ਹੋਏ ਸਨ ਜਿਸ ਕਰਕੇ ਕਮਰੇ ਚੋ ਬਾਹਰ ਹੋਣ ਕਾਰਨ ਜਾਣੀ ਨੁਕਸਾਨ ਤੋਂ ਬਚਾਅ ਰਹਿ ਗਿਆ । ਇਸ ਮੌਕੇ ਪਿੰਡ ਦੇ ਨੋਜਵਾਨ ਜਸਕਰਨ ਸਿੰਘ ਧੌਲਾ ਨੇ ਸਰਕਾਰ ਅਤੇ ਜਿਲਾ ਪ੍ਰਸ਼ਾਸ਼ਨ ਤੋਂ ਮੰਗ ਕੀਤੀ ਹੈ ਕਿ ਇਸ ਗਰੀਬ ਪਰਿਵਾਰ ਦੀ ਮਕਾਨ ਬਣਾਉਣ ਵਿੱਚ ਸਹਾਇਤਾ ਕੀਤੀ ਜਾਵੇ ਕਿਉਂਕਿ ਅਚਾਨਕ ਪਈ ਇਸ ਮੁਸੀਬਤ ਮੌਕੇ ਤੁਰੰਤ ਮਕਾਨ ਤਿਆਰ ਕਰ ਪਾਉਣਾ ਗਰੀਬ ਪਰਿਵਾਰ ਲਈ ਬੇਹੱਦ ਔਖਾ ਕਾਰਜ ਹੈ! ਇਸ ਤੋਂ ਇਲਾਵਾ ਜਸਕਰਨ ਸਿੰਘ ਧੌਲਾ ਨੇ ਸਮਾਜ ਸੇਵੀਆਂ ਤੇ ਸਮਾਜ ਸੇਵੀ ਜਥਬੰਦੀਆਂ ਤੋਂ ਵੀ ਪਰਿਵਾਰ ਦੀ ਆਰਥਿਕ ਸਹਾਇਤਾ ਕਰਨ ਲਈ ਬੇਨਤੀ ਕੀਤੀ ਹੈ।