ਨਿਊਯਾਰਕ ਵਿੱਚ ਨਸਲੀ ਵਿਰੋਧ ਦਾ ਸ਼ਿਕਾਰ ਜਾਰਜ ਫਲਾਇਡ ਦੇ ਬੁੱਤ ਨੂੰ ਕੀਤਾ ਜਾਵੇਗਾ ਤਬਦੀਲ

ਫਰਿਜ਼ਨੋ (ਕੈਲੀਫੋਰਨੀਆ) (ਗੁਰਿੰਦਰਜੀਤ ਨੀਟਾ ਮਾਛੀਕੇ/ ਕੁਲਵੰਤ ਧਾਲੀਆਂ) – ਨਿਊਯਾਰਕ ਦੇ ਬਰੁਕਲਿਨ ਵਿੱਚ ਸਥਿਤ ਜਾਰਜ ਫਲਾਇਡ ਦੀ ਮੂਰਤੀ ਜੋ ਕਿ ਨਸਲੀ ਵਿਰੋਧ ਦੇ ਹਿੱਸੇ ਵਜੋਂ ਨੁਕਸਾਨੀ ਗਈ ਸੀ ਨੂੰ ਸਾਫ ਕਰ ਦਿੱਤਾ ਗਿਆ ਹੈ । ਇਸ ਮੂਰਤੀ ਨੂੰ ਹੁਣ ਮੈਨਹੱਟਨ ਦੇ ਯੂਨੀਅਨ ਸਕੁਏਰ ਵਿੱਚ ਤਬਦੀਲ ਕੀਤਾ ਜਾਵੇਗਾ। ਜਾਰਜ ਫਲਾਇਡ ਦੇ ਇਸ ਬੁੱਤ ਦਾ 19 ਜੂਨ ਦੀ ਛੁੱਟੀ ਦੌਰਾਨ ਫਲੈਟਬਸ਼ ਐਵੀਨਿਊ ਵਿਖੇ ਉਦਘਾਟਨ ਕੀਤਾ ਗਿਆ ਸੀ ਪਰ ਸਥਾਪਨਾ ਦੇ ਤਕਰੀਬਨ ਪੰਜ ਦਿਨ ਬਾਅਦ ਹੀ 24 ਜੂਨ ਨੂੰ, ਇਸ ਮੂਰਤੀ ਨੂੰ ਕਾਲੇ ਰੰਗ ਰੰਗ ਦਿੱਤਾ ਅਤੇ ਇੱਕ ਚਿੱਟੇ ਸਮੂਹ ਦੇ ਲੋਗੋ ਨਾਲ ਵੀ ਮਾਰਕ ਕੀਤਾ ਗਿਆ। ਪਰ ਉਸ ਸਮੂਹ ਦੇ ਮੈਂਬਰ ਜਿਨ੍ਹਾਂ ਨੇ ਬੁੱਤ ਨੂੰ ਬੜੀ ਮਿਹਨਤ ਨਾਲ ਸਥਾਪਿਤ ਕੀਤਾ ਸੀ ਨੇ ਬੁੱਤ ਨੂੰ ਸਾਫ ਕੀਤਾ ਅਤੇ ਸਥਾਨਕ ਵਸਨੀਕਾਂ ਦੇ ਨਾਲ ਜਾਰਜ ਫਲਾਇਡ ਦਾ ਭਰਾ ਇਸ ਹਫਤੇ, ਸਤੰਬਰ ਵਿੱਚ ਇਸ ਬੁੱਤ ਦੀ ਐਗਜ਼ੀਬਿਸ਼ਨ ਲਈ ਤਬਦੀਲੀ ਕਰਨ ਦੀ ਯੋਜਨਾ ਦੇ ਸਮੇਂ ਤੋਂ ਪਹਿਲਾਂ ਵਿਦਾਈ ਕਰਨ ਲਈ ਇਕੱਠੇ ਹੋਏ। ਇਸ ਬੁੱਤ ਨੂੰ  ਲੋਕਾਂ ਨੇ ਸਾਫ ਕਰਨ ਲਈ ਕਈ ਘੰਟੇ ਬਿਤਾਏ। ਹੋਰ ਜਿਆਦਾ ਸਫਾਈ ਲਈ ਬੁੱਤ ਸੋਮਵਾਰ ਨੂੰ ਇੱਕ ਸਟੂਡੀਓ ‘ਚ ਵਾਪਸ ਭੇਜਿਆ  ਜਾ ਰਿਹਾ ਹੈ। ਜਿਕਰਯੋਗ ਹੈ ਕਿ ਜਾਰਜ ਫਲਾਇਡ ਦੇ ਬੁੱਤ ਨਾਲ ਛੇੜਖਾਨੀ ਦੇ ਮਾਮਲੇ ਵਿੱਚ ਅਜੇ ਤੱਕ ਕੋਈ ਗ੍ਰਿਫ਼ਤਾਰੀ ਨਹੀਂ ਹੋਈ ਹੈ।