ਵਿਸ਼ਵਾਸ ਨਗਰ ਦੀਆਂ ਧਸੀਆਂ ਸੜਕਾਂ ਤੇ ਵੀ ਸੁਣਾਉ ਕੋਈ ਸ਼ੇਅਰ: ਸਰੂਪ ਸਿੰਗਲਾ
ਬਠਿੰਡਾ, 22 ਜੁਲਾਈ (ਜਸਪ੍ਰੀਤ)- ਸ਼ੇਅਰੋ ਸ਼ਾਇਰੀ ਸੁਣਾਉਣ ਵਾਲੇ ਮੰਤਰੀ ਸਾਬ੍ਹ ਥੋਡੇ ਰਾਜ ਵਿੱਚ ਵਿਸ਼ਵਾਸ ਨਗਰ ਵਿਚ ਬਣੀਆਂ ਨਵੀਆਂ ਸੜਕਾਂ ‘ਤੇ ਸੀਵਰੇਜ ਦੇ ਸਿਸਟਮ ਧਸ ਰਹੇ ਹਨ। ਇਸ ਮਾਮਲੇ ਤੇ ਵੀ ਕੋਈ ਸ਼ੇਅਰ ਸੁਣਾ ਦਿਉ ਤਾਂ ਜੋ ਲੋਕਾਂ ਨੂੰ ਆਪ ਜੀ ਵੱਲੋਂ ਕੀਤੇ ਘੁਟਾਲਿਆਂ ਦਾ ਸੱਚ ਸਾਹਮਣੇ ਆ ਸਕੇ, ਕਿਉਂਕਿ ਵਿਕਾਸ ਦੇ ਨਾਂ ਤੇ ਜੀਜਾ-ਸਾਲਾ ਗੈਂਗ ਵੱਲੋਂ ਜੋ ਲੁੱਟ ਕੀਤੀ ਗਈ ਹੈ। ਉਸ ਦਾ ਚਿਹਰਾ ਪ੍ਰਮਾਤਮਾ ਨੇ ਸਾਹਮਣੇ ਲਿਆ ਦਿੱਤਾ ਹੈ। ਇਨ੍ਹਾਂ ਗੱਲਾਂ ਦਾ ਪ੍ਰਗਟਾਵਾ ਸਾਬਕਾ ਵਿਧਾਇਕ ‘ਤੇ ਮੌਜੂਦਾ ਉਮੀਦਵਾਰ ਬਠਿੰਡਾ ਸ਼ਹਿਰੀ ਸਰੂਪ ਚੰਦ ਸਿੰਗਲਾ ਨੇ ਵਿਸ਼ਵਾਸ ਨਗਰ ਵਿੱਚ ਮੀਂਹ ਕਰਕੇ ਧਸੀਆਂ ਸੜਕਾਂ ਦਾ ਦੌਰਾ ਕਰਦੇ ਹੋਏ ਕੀਤਾ ਅਤੇ ਲੋਕਾਂ ਨਾਲ ਰਾਬਤਾ ਕਾਇਮ ਕਰਦੇ ਹੋਏ ਸ਼੍ਰੋਮਣੀ ਅਕਾਲੀ ਦਲ ਵੱਲੋਂ ਹਰ ਸਹਿਯੋਗ ਦਾ ਭਰੋਸਾ ਦਿਵਾਇਆ। ਸਿੰਗਲਾ ਨੇ ਕਿਹਾ ਕਿ ਵਿਕਾਸ ਦੇ ਨਾਂ ਤੇ ਘਪਲੇ ਹੀ ਘਪਲੇ ਹੋਏ ਹਨ ਜਿਨ੍ਹਾਂ ਦੀ ਸ਼੍ਰੋਮਣੀ ਅਕਾਲੀ ਦਲ ਦੀ ਸਰਕਾਰ ਆਉਣ ਤੇ ਜਾਂਚ ਕਰਵਾਈ ਜਾਵੇਗੀ ਤੇ ਲੁੱਟ ਦਾ ਇਕ ਇਕ ਪੈਸਾ ਵਸੂਲਿਆ ਜਾਵੇਗਾ। ਉਨ੍ਹਾਂ ਕਿਹਾ ਕਿ ਖ਼ਜ਼ਾਨਾ ਮੰਤਰੀ ਮਨਪ੍ਰੀਤ ਸਿੰਘ ਬਾਦਲ ਨੇ ਸ਼ੇਅਰੋ ਸ਼ਾਇਰੀ ਕਰਕੇ ਲੋਕਾਂ ਨੂੰ ਗੁੰਮਰਾਹ ਕਰਕੇ ਵੋਟਾਂ ਲਈਆਂ, ਪੰਜ ਸਾਲ ਪੰਜਾਬ ਨੂੰ ਲੁੱਟਿਆ ਤੇ ਲੋਕਾਂ ਨੂੰ ਖੱਜਲ ਖੁਆਰ ਹੋਣ ਲਈ ਮਜਬੂਰ ਕੀਤਾ, ਜਿਸ ਤੋਂ ਖਜਾਨਾ ਮੰਤਰੀ ਅਤੇ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਦੀ ਲੋਕ ਵਿਰੋਧੀ ਨੀਤੀ ਸਾਹਮਣੇ ਆਉਂਦੀ ਹੈ, ਪਰ ਇਸ ਦਾ ਖਮਿਆਜ਼ਾ ਕਾਂਗਰਸ ਨੂੰ ਆਉਂਦੀਆਂ ਵਿਧਾਨ ਸਭਾ ਚੋਣਾਂ ਵਿਚ ਭੁਗਤਣਾ ਪਵੇਗਾ।