ਨਿਊਯਾਰਕ ਵਿੱਚ ਸਿਟੀ ਬਿਲਡਿੰਗਜ਼ ਵਿਭਾਗ ਨੇ ਬੰਦ ਕੀਤੀ ਸੈਂਕੜੇ ਇਮਾਰਤਾਂ ਦੀ ਉਸਾਰੀ

ਫਰਿਜ਼ਨੋ (ਕੈਲੀਫੋਰਨੀਆ), 27 ਜੂਨ (ਗੁਰਿੰਦਰਜੀਤ ਨੀਟਾ ਮਾਛੀਕੇ / ਕੁਲਵੰਤ ਧਾਲੀਆਂ) – ਨਿਊਯਾਰਕ ਸ਼ਹਿਰ ਵਿੱਚ ਇਸ ਮਹੀਨੇ ਸਿਟੀ ਬਿਲਡਿੰਗਜ਼ ਵਿਭਾਗ ਵੱਲੋਂ  300 ਤੋਂ ਵੱਧ ਉਸਾਰੀ ਸਾਈਟਾਂ ਬੰਦ ਕਰ ਦਿੱਤੀਆਂ ਗਈਆਂ ਹਨ, ਕਿਉਂਕਿ ਬਿਲਡਿੰਗ ਇੰਸਪੈਕਟਰਾਂ ਨੇ ਇਹਨਾਂ ਦੀ ਉਸਾਰੀ ਦੌਰਾਨ ਸੁਰੱਖਿਆ ਦੀ ਉਲੰਘਣਾ ਨੂੰ ਨੋਟਿਸ ਕੀਤਾ ਹੈ। ਸ਼ਹਿਰ ਵਿੱਚ ਇਮਾਰਤਾਂ ਦੀ ਉਸਾਰੀ ਦੌਰਾਨ ਹੁੰਦੀਆਂ ਮੌਤਾਂ ਨੂੰ ਰੋਕਣ ਲਈ ਬਣਾਏ ਗਏ ਡਿਪਾਰਟਮੈਂਟ ਆਫ ਬਿਲਡਿੰਗਜ਼ ਨੇ ਜ਼ੀਰੋ-ਟੌਲਰੈਂਸ ਸੇਫਟੀ ਅਭਿਆਨ ਦੌਰਾਨ 322 ਥਾਵਾਂ, ਜਿਨ੍ਹਾਂ ਵਿੱਚੋਂ ਇੱਕ ਤਿਹਾਈ ਤੋਂ ਜ਼ਿਆਦਾ ਬਰੁਕਲਿਨ ਵਿੱਚ ਸਨ, ਨੂੰ ਬੰਦ ਕਰ ਦਿੱਤਾ ਹੈ। ਇਸ ਸਬੰਧਤ ਅਧਿਕਾਰੀਆਂ ਨੇ ਦੱਸਿਆ ਕਿ ਇਸ ਸਾਲ ਹੁਣ ਤੱਕ ਉਸਾਰੀ ਨਾਲ ਸਬੰਧਤ ਹਾਦਸਿਆਂ ਵਿੱਚ ਸੱਤ ਉਸਾਰੀ ਕਰਮਚਾਰੀਆਂ ਦੀ ਮੌਤ ਹੋ ਗਈ ਹੈ, ਜਿਨ੍ਹਾਂ ਵਿੱਚ ਇਕੱਲੇ ਮਈ ਮਹੀਨੇ ਵਿੱਚ ਤਿੰਨ ਸ਼ਾਮਲ ਹਨ।
ਇਹਨਾਂ ਮਾਰੇ ਗਏ ਲੋਕਾਂ ਵਿੱਚ 32 ਸਾਲਾਂ ਕੁਈਨਜ਼ ਨਿਵਾਸੀ ਡਿਆਗੋ ਲਿਲੀਗੁਇਕੋਟਾ ਵੀ ਸ਼ਾਮਲ ਹੈ, ਜੋ ਲੋਂਗ ਆਈਲੈਂਡ ਸਿਟੀ ਇਮਾਰਤ ਦੀ ਛੇਵੀਂ ਮੰਜ਼ਲ ‘ਤੇ ਕੰਮ ਕਰ ਰਿਹਾ ਸੀ, ਜਦੋਂ ਉਹ 22 ਮਈ ਨੂੰ ਇੱਕ ਐਲੀਵੇਟਰ ਸ਼ੈਫਟ ਤੋਂ ਹੇਠਾਂ ਡਿੱਗ ਗਿਆ ਸੀ। ਅੰਕੜਿਆਂ ਅਨੁਸਾਰ 2020 ਵਿੱਚ ਉਸਾਰੀ ਹਾਦਸਿਆਂ ਵਿੱਚ ਅੱਠ ਕਾਮਿਆਂ ਦੀ ਮੌਤ ਹੋ ਗਈ ਸੀ ,ਜਦਕਿ 2019 ਵਿੱਚ, 12 ਉਸਾਰੀ ਕਾਮਿਆਂ ਨੇ ਆਪਣੀ ਜਾਨ ਗਵਾਈ ਸੀ। ਅਧਿਕਾਰੀਆਂ ਨੇ ਦੱਸਿਆ ਕਿ ਮੌਤਾਂ ਤੋਂ ਇਲਾਵਾ, ਪਿਛਲੇ ਦੋ ਸਾਲਾਂ ਦੌਰਾਨ ਤਕਰੀਬਨ 1,097 ਉਸਾਰੀ ਕਾਮੇ  ਜ਼ਖ਼ਮੀ ਹੋਏ ਹਨ।  ਪਿਛਲੇ ਸਾਲ ਨਿਰਮਾਣ ਨਾਲ ਸਬੰਧਤ 502 ਕਾਮਿਆਂ ਦੇ ਸੱਟਾਂ ਲੱਗੀਆਂ ਅਤੇ 2019 ਵਿੱਚ ਇਹ ਗਿਣਤੀ 595 ਸੀ।ਵਿਭਾਗ ਅਨੁਸਾਰ ਜੇਕਰ ਇੰਸਪੈਕਟਰ ਇਹ ਨਿਰਧਾਰਤ ਕਰਦੇ ਹਨ ਕਿ ਕੰਮ ਦੌਰਾਨ ਕਰਮਚਾਰੀਆਂ ਨੇ ਪੂਰੇ ਸੁਰੱਖਿਆ ਉਪਕਰਨ ਨਹੀਂ ਪਹਿਨੇ ਹਨ ਜਾਂ ਠੇਕੇਦਾਰ ਆਪਣੀ ਸਾਈਟ ਦੀ ਸੁਰੱਖਿਆ ਦੀਆਂ ਯੋਜਨਾਵਾਂ ਦੀ ਪਾਲਣਾ ਨਹੀਂ ਕਰ ਰਹੇ ਹਨ ਜਾਂ ਹੋਰ ਸੁਰੱਖਿਆ ਸਾਧਨਾਂ ਦੀ ਉਲੰਘਣਾ ਕੀਤੀ ਜਾਂਦੀ ਹੈ, ਜਿਸ ਨਾਲ ਕਰਮਚਾਰੀਆਂ ਨਾਲ ਹਾਦਸੇ ਹੋ ਸਕਦੇ ਹਨ। ਇਸ ਵਜ੍ਹਾ ਕਰਕੇ ਉਸਾਰੀ ਦੇ ਕੰਮਾਂ ਨੂੰ ਰੋਕਿਆ ਜਾ ਸਕਦਾ ਹੈ। ਇਸਦੇ ਇਲਾਵਾ ਵੱਡੀਆਂ ਇਮਾਰਤਾਂ ਦੀ ਉਸਾਰੀ ਲਈ ਕਰਮਚਾਰੀਆਂ ਨੂੰ ਜਿਆਦਾ ਸੁਰੱਖਿਆ ਪ੍ਰਦਾਨ ਕਰਨ ਲਈ ਨਵੇਂ ਉਸਾਰੀ ਸੁਰੱਖਿਆ ਬਿੱਲਾਂ ਨੂੰ ਵੀ ਲਾਗੂ ਕਰਨ ਦੀ ਤਜਵੀਜ਼ ਕੀਤੀ ਗਈ ਹੈ, ਜਿਹਨਾਂ ਦੀ ਸੁਣਵਾਈ ਅਗਲੇ ਮਹੀਨੇ ਕੀਤੀ ਜਾਵੇਗੀ।