ਬਠਿੰਡਾ, 4 ਮਈ (ਗੁਰਜੀਤ) – ਪੰਜਾਬ ਸਰਕਾਰ ਅਤੇ ਸਿਹਤ ਵਿਭਾਗ ਪੰਜਾਬ ਵੱਲੋਂ ਇੱਕ ਲੱਖ ਤੋਂ ਵੱਧ ਘਰੇਲੂ ਇਕਾਂਤਵਾਸ ਕੀਤੇ ਕਰੋਨਾ ਪਾਜੀਟਿਵ ਮਰੀਜਾਂ ਨੂੰ ਵਧੀਆ ਸਿਹਤ ਸਹੂਲਤਾਂ ਦੇਣ ਲਈ ਪਿਛਲੇ ਸਾਲ ਤੋਂ ਹੀ ‘ਕਰੋਨਾ ਫਤਿਹ ਕਿੱਟਾਂ’ ਦਿੱਤੀਆਂ ਜਾ ਰਹੀਆਂ ਹਨ, ਜਿਸ ਵਿੱਚ ਡਿਜੀਟਲ ਥਰਮਾਮੀਟਰ, ਸਟੀਮਰ, ਆਕਸੀਮੀਟਰ, ਜ਼ਰੂਰੀ ਦਵਾਈਆਂ ਸ਼ਾਮਿਲ ਸਨ। ਪਰ ਹੁਣ ਕਰੋਨਾ ਮਹਾਂਮਾਰੀ ਦੀ ਦੂਜੀ ਲਹਿਰ ਆਉਣ ਨਾਲ ਕਰੋਨਾ ਪਾਜੀਟਿਵ ਮਰੀਜਾਂ ਦੀ ਗਿਣਤੀ ਵਿੱਚ ਇੱਕਦਮ ਵਾਧਾ ਹੋਣ ਕਾਰਣ ਮਰੀਜਾਂ ਦੇ ਸਰੀਰ ਦੀ ਆਕਸੀਜਨ ਦਾ ਲੈਵਲ ਮਾਪਣ ਵਾਲੇ ਯੰਤਰ ਆਕਸੀਮੀਟਰ ਦੀ ਭਾਰੀ ਕਮੀ ਆ ਗਈ ਹੈ ।
ਸੀਨੀਅਰ ਮੈਡੀਕਲ ਅਫਸਰ ਡਾ. ਅਸ਼ਵਨੀ ਕੁਮਾਰ ਨੇ ਬਲਾਕ ਬਾਲਿਆਂਵਾਲੀ ਦੇ ਕਰੋਨਾ ਤੋਂ ਠੀਕ ਹੋਏ ਮਰੀਜਾਂ ਨੂੰ ਅਪੀਲ ਕੀਤੀ ਹੈ ਕਿ ਉਹ ਆਪਣਾ ਮੁਢਲਾ ਫਰਜ ਸਮਝਦੇ ਹੋਏ ਹੋਰ ਕੀਮਤੀ ਜਾਨਾਂ ਬਚਾਉਣ ਲਈ ਘਰ ਪਏ ਆਕਸੀਮੀਟਰ ਸਿਹਤ ਵਿਭਾਗ ਦੇ ਮੁਲਾਜਮਾਂ ਨੂੰ ਵਾਪਸ ਕਰ ਦੇਣ, ਤਾਂ ਜੋ ਨਵੇਂ ਪਾਜੀਟਿਵ ਮਰੀਜਾਂ ਨੂੰ ਘਰੇਲੂ ਇਕਾਂਤਵਾਸ ਦੌਰਾਨ ਦਿੱਤੇ ਜਾ ਸਕਣ। ਉਹਨਾਂ ਕਿਹਾ ਕਿ ਆਪ ਸਭ ਦੇ ਸਹਿਯੋਗ ਸਦਕਾ ਹੀ ਸਿਹਤ ਵਿਭਾਗ ਇਸ ਮਹਾਂਮਾਰੀ ’ਤੇ ਕਾਬੂ ਪਾਉਣ ਵਿੱਚ ਕਾਮਯਾਬ ਹੋ ਸਕਦਾ ਹੈ।
ਬਲਾਕ ਐਜੂਕੇਟਰ ਲਖਵਿੰਦਰ ਸਿੰਘ ਨੇ ਦੱਸਿਆ ਕਿ ਘਰੇਲੂ ਇਕਾਂਤਵਾਸ ਹੋਏ ਕਰੋਨਾ ਪਾਜੀਟਿਵ ਮਰੀਜਾਂ ਦੀ ਸਿਹਤ ਮੁਲਾਜਮਾਂ ਵੱਲੋਂ ਰੋਜ਼ਾਨਾ ਸਰੀਰ ਦੇ ਆਕਸੀਜਨ ਲੈਵਲ ਦੀ ਜਾਂਚ ਕੀਤੀ ਜਾਂਦੀ ਹੈ, ਜਿਸ ਦੇ ਆਧਾਰ ’ਤੇ ਹੀ ਮਰੀਜ ਦੀ ਸਿਹਤ ਸਥਿਤੀ ਅਤੇ ਰਿਕਵਰੀ ਦਾ ਪਤਾ ਲੱਗਦਾ ਹੈ। ਪਰ ਆਕਸੀਮੀਟਰ ਨਾ ਹੋਣ ਕਾਰਣ ਜੇਕਰ ਮਰੀਜ ਦੇ ਸਰੀਰ ਦੇ ਆਕਸੀਜਨ ਲੈਵਲ ਦਾ ਸਹੀ ਪਤਾ ਨਾ ਲੱਗ ਸਕੇ ਤਾਂ ਮਰੀਜ ਦੀ ਸਥਿਤੀ ਗੰਭੀਰ ਹੋ ਸਕਦੀ ਹੈ ਅਤੇ ਜਾਨ ਨੂੰ ਵੀ ਖਤਰਾ ਹੋ ਸਕਦਾ ਹੈ । ਇਸ ਲਈ ਜਿਹੜੇ ਕਰੋਨਾ ਪਾਜੀਟਿਵ ਮਰੀਜ ਘਰੇਲੂ ਇਕਾਂਤਵਾਸ ਪੂਰਾ ਕਰਕੇ ਸਿਹਤਯਾਬ ਹੋ ਗਏ ਹਨ, ਉਹਨਾਂ ਨੂੰ ਆਕਸੀਮੀਟਰ ਦੀ ਹੁਣ ਕੋਈ ਲੋੜ ਨਹੀਂ, ਇਸ ਲਈ ਆਕਸੀਮੀਟਰ ਆਪਣੇ ਨੇੜੇ ਦੀ ਸਰਕਾਰੀ ਸਿਹਤ ਸੰਸਥਾ ਵਿਖੇ ਜਮਾਂ ਕਰਵਾਕੇ ਇਸ ਮਹਾਂਮਾਰੀ ਤੇ ਕਾਬੂ ਪਾਉਣ ਵਿੱਚ ਆਪਣਾ ਬਣਦਾ ਯੋਗਦਾਨ ਪਾਉਣ ।
