ਕੈਲੀਫੋਰਨੀਆ ਵਿੱਚ ਸਮੁੰਦਰੀ ਸੀਲ ਨੂੰ ਗੋਲੀ ਮਾਰਨ ਵਾਲੇ ਵਿਅਕਤੀ ਨੂੰ ਹੋਈ ਕੈਦ

ਫਰਿਜ਼ਨੋ (ਕੈਲੀਫੋਰਨੀਆ), 14 ਅਪ੍ਰੈਲ (ਗੁਰਿੰਦਰਜੀਤ ਨੀਟਾ ਮਾਛੀਕੇ / ਕੁਲਵੰਤ ਧਾਲੀਆਂ) –  ਕੈਲੀਫੋਰਨੀਆ ਦੇ ਇੱਕ ਸਮੁੰਦਰੀ ਕੰਢੇ ‘ਤੇ ਇੱਕ ਐਲੀਫੈਂਟ ਸੀਲ ਨੂੰ ਗੋਲੀ ਮਾਰ ਕੇ ਮੌਤ ਦੇ ਘਾਟ ਉਤਾਰਨ ਵਾਲੇ ਵਿਅਕਤੀ ਨੂੰ ਸੋਮਵਾਰ ਨੂੰ ਤਿੰਨ ਮਹੀਨੇ ਕੈਦ ਦੀ ਸਜ਼ਾ ਸੁਣਾਈ ਗਈ ਹੈ। ਜੌਰਡਨ ਗਰਬੀਚ (30) ਜੋ ਕਿ ਹੁਣ ਯੂਟਾ ਵਿੱਚ ਰਹਿੰਦਾ ਹੈ, ਨੇ 28 ਸਤੰਬਰ, 2019 ਨੂੰ ਕੈਲੀਫੋਰਨੀਆ ਦੇ ਕੇਂਦਰੀ ਤੱਟ ‘ਤੇ ਸੈਨ ਸਿਮੋਨ ਦੇ ਨੇੜੇ, ਇੱਕ ਹੈਂਡਗਨ ਨਾਲ ਸਮੁੰਦਰੀ ਜੀਵ ਦੇ ਸਿਰ ਤੇ ਗੋਲੀ ਮਾਰ ਦਿੱਤੀ ਸੀ। ਇਸ ਸੰਬੰਧ ਵਿੱਚ ਅਦਾਲਤ ਦੇ ਇੱਕ ਦਸਤਾਵੇਜ਼ ਅਨੁਸਾਰ ਗਰਬੀਚ ਨੇ ਇੱਕ ਨਸ਼ਾ ਕਰਨ ਵਾਲੇ ਦੋਸਤ ਦੀ ਮੰਗ ‘ਤੇ  ਇਸ ਜਾਨਵਰ ਨੂੰ ਗੋਲੀ ਮਾਰੀ। ਵਕੀਲਾਂ ਨੇ ਦੱਸਿਆ ਕਿ ਇਹ ਹੱਤਿਆ ਕਿਸੇ ਦੁਰਘਟਨਾ ਜਾਂ ਕਿਸੇ ਧੱਕੇਸ਼ਾਹੀ ਨਾਲ ਨਹੀਂ ਹੋਈ। ਅਧਿਕਾਰੀਆਂ ਨੇ ਦੱਸਿਆ ਕਿ ਗੋਲੀਬਾਰੀ ਰਾਤ ਨੂੰ ਹੋਈ ਸੀ, ਅਤੇ ਗਰਬੀਚ ਨੇ ਇਸ ਸ਼ੂਟਿੰਗ ਵਿੱਚ ਇੱਕ ਫਲੈਸ਼ ਲਾਈਟ ਦੀ ਵਰਤੋਂ ਕੀਤੀ ਸੀ। ਰਾਸ਼ਟਰੀ ਮਹਾਂਸਾਗਰ ਅਤੇ ਵਾਯੂਮੰਡਲ ਪ੍ਰਸ਼ਾਸਨ ਨੇ ਕਿਹਾ ਹੈ ਕਿ ਸਮੁੰਦਰੀ ਸੀਲ ਦੇ ਸਿਰ ‘ਤੇ ਗੋਲੀ ਲੱਗੀ ਸੀ । ਉੱਤਰੀ ਐਲੀਫੈਂਟ ਸੀਲਾਂ ਨੂੰ ਮਰੀਨ ਮੈਮਲ ਪ੍ਰੋਟੈਕਸ਼ਨ ਐਕਟ ਤਹਿਤ ਸੁਰੱਖਿਅਤ ਕੀਤਾ ਗਿਆ ਹੈ। ਵਪਾਰਕ ਸ਼ਿਕਾਰ ਨੇ ਸੀਲਾਂ ਨੂੰ ਖਾਤਮੇ ਦੀ ਕਗਾਰ ਤੇ ਖੜਾ ਕਰ ਦਿੱਤਾ ਸੀ, ਪਰ ਹੁਣ ਇਹਨਾਂ ਦੀ ਗਿਣਤੀ ਮੁੜ ਵਧ ਰਹੀ ਹੈ। ਇਸ ਹੱਤਿਆ ਕਰਕੇ ਗਰਬੀਚ ਨੂੰ ਤਿੰਨ ਮਹੀਨੇ ਦੀ ਕੈਦ ਅਤੇ ਉਸ ਤੋਂ ਬਾਅਦ ਤਿੰਨ ਮਹੀਨਿਆਂ ਦੀ ਘਰ ਵਿੱਚ ਨਜ਼ਰਬੰਦੀ ਕੀਤੀ ਗਈ ਹੈ।  ਕੇਂਦਰੀ ਕੈਲੀਫੋਰਨੀਆ ਦੇ ਅਟਾਰਨੀ ਦੇ ਦਫਤਰ ਅਨੁਸਾਰ ਉਹ ਇੱਕ ਸਾਲ ਲਈ ਨਿਗਰਾਨੀ ਅਧੀਨ ਵੀ ਰਹੇਗਾ ਅਤੇ ਉਸ ਨੂੰ 120 ਘੰਟੇ ਕਮਿਊਨਿਟੀ ਸੇਵਾ ਕਰਨ ਦੇ ਨਾਲ 1000 ਡਾਲਰ ਦਾ ਜੁਰਮਾਨਾ ਵੀ ਅਦਾ ਕਰਨਾ ਪਵੇਗਾ।