ਆਈਓਵਾ ਸਟੇਟ ਯੂਨੀਵਰਸਿਟੀ ਦੇ ਦੋ ਵਿਦਿਆਰਥੀਆਂ ਦੀ ਕਿਸ਼ਤੀ ਹਾਦਸੇ ‘ਚ ਗਈ ਜਾਨ

ਫਰਿਜ਼ਨੋ (ਕੈਲੀਫੋਰਨੀਆ), 30 ਮਾਰਚ (ਗੁਰਿੰਦਰਜੀਤ ਨੀਟਾ ਮਾਛੀਕੇ / ਕੁਲਵੰਤ ਧਾਲੀਆਂ) – ਆਈਓਵਾ ਸਟੇਟ ਯੂਨੀਵਰਸਿਟੀ  ਸਕੂਲ ਦੇ ਕਰਿਊ ਕਲੱਬ ਮੈਂਬਰਾਂ ਦੀ ਐਮਸ ਦੇ ਉੱਤਰ ਵਿੱਚ ਇੱਕ ਝੀਲ ‘ਚ ਹੋਈ ਕਿਸ਼ਤੀ ਦੁਰਘਟਨਾ ਨਾਲ ਦੋ ਵਿਦਿਆਰਥੀਆਂ ਦੀ ਮੌਤ ਹੋ ਗਈ ਹੈ। ਇਹ ਵਿਦਿਆਰਥੀ ਹੈਮਿਲਟਨ ਕਾਉਂਟੀ ਦੇ ਲਿਟਲ ਵਾਲ ਲੇਕ ਵਿਖੇ ਐਤਵਾਰ ਸਵੇਰੇ ਅਭਿਆਸ ਕਰ ਰਹੇ ਸਨ , ਜਿਸ ਦੌਰਾਨ ਉਨ੍ਹਾਂ ਦੀ ਕਿਸ਼ਤੀ ਪਲਟ ਗਈ। ਯੂਨੀਵਰਸਿਟੀ ਨੇ ਇੱਕ ਖ਼ਬਰ ਜਾਰੀ ਕਰਦਿਆਂ ਕਿਹਾ ਕਿ ਇਸ ਹਾਦਸੇ ਵਿੱਚੋਂ ਤਿੰਨ ਵਿਦਿਆਰਥੀਆਂ ਨੂੰ ਬਚਾਇਆ ਗਿਆ ਅਤੇ ਗੋਤਾਖੋਰ ਟੀਮ ਨੇ ਬਾਅਦ ਵਿੱਚ ਇੱਕ ਵਿਦਿਆਰਥੀ ਦੀ ਲਾਸ਼ ਬਰਾਮਦ ਕੀਤੀ। ਹੈਮਿਲਟਨ ਕਾਉਂਟੀ ਪੁਲਿਸ ਵਿਭਾਗ ਅਨੁਸਾਰ ਪੰਜਵੇਂ ਵਿਦਿਆਰਥੀ ਦੀ ਭਾਲ ਐਤਵਾਰ ਨੂੰ ਸ਼ੁਰੂ ਕੀਤੀ ਗਈ ਅਤੇ ਉਸ ਦੀ ਲਾਸ਼ ਸੋਮਵਾਰ ਤੜਕੇ ਬਰਾਮਦ ਕੀਤੀ ਗਈ। ਅਧਿਕਾਰੀਆਂ ਅਨੁਸਾਰ ਇਸ ਲਾਸ਼ ਦੀ ਭਾਲ ਲਈ ਸੁਨਾਰ ਤਕਨਾਲੋਜੀ ਦੀ ਵਰਤੋਂ ਕੀਤੀ ਗਈ। ਇਸ ਕਿਸ਼ਤੀ ਹਾਦਸੇ ‘ਚ ਬਚਾਏ ਗਏ ਤਿੰਨ ਵਿਦਿਆਰਥੀਆਂ ਦਾ ਐਮਸ ਦੇ  ਹਸਪਤਾਲ ਵਿੱਚ ਇਲਾਜ ਕੀਤਾ ਗਿਆ । ਯੂਨੀਵਰਸਿਟੀ ਦੇ ਪ੍ਰਧਾਨ ਵੈਂਡੀ ਵਿੰਟਰਸਟੀਨ ਨੇ ਇਸ ਹਾਦਸੇ ਦੇ ਸੰਬੰਧ ਵਿੱਚ ਦੁੱਖ ਪ੍ਰਗਟ ਕੀਤਾ ਹੈ। ਇਹ ਵਿਦਿਆਰਥੀ ਇੱਕ ਮਾਨਤਾ ਪ੍ਰਾਪਤ ਵਿਦਿਆਰਥੀ ਸੰਗਠਨ ਆਈਓਵਾ ਸਟੇਟ ਕਰਿਊ ਕਲੱਬ ਦਾ ਹਿੱਸਾ ਸਨ। ਲਿਟਲ ਵਾਲ ਲੇਕ ਐਮਸ ਤੋਂ ਲੱਗਭਗ 15 ਮੀਲ ਉੱਤਰ ਵੱਲ ਹੈ। ਆਈਓਵਾ ਸਟੇਟ ਯੂਨੀਵਰਸਿਟੀ ਅਨੁਸਾਰ ਇਸ ਘਟਨਾ ਨਾਲ ਸੰਬੰਧਤ ਪ੍ਰਕਿਰਿਆਵਾਂ ਦੀ ਅੰਦਰੂਨੀ ਸਮੀਖਿਆ ਕੀਤੀ ਜਾਵੇਗੀ ਅਤੇ ਮ੍ਰਿਤਕਾਂ ਦੇ ਨਾਮ ਫਿਲਹਾਲ ਜਾਰੀ ਨਹੀਂ ਕੀਤੇ ਗਏ ਹਨ।