ਫਰਿਜ਼ਨੋ (ਕੈਲੀਫੋਰਨੀਆ), 10 ਮਾਰਚ ( ਗੁਰਿੰਦਰਜੀਤ ਨੀਟਾ ਮਾਛੀਕੇ / ਕੁਲਵੰਤ ਧਾਲੀਆਂ) – ਅਮਰੀਕਾ ਦੇ ਰੱਖਿਆ ਸਕੱਤਰ ਨੇ 23 ਮਈ ਤੱਕ ਦੇਸ਼ ਦੀ ਕੈਪੀਟਲ ਵਿੱਚ ਨੈਸ਼ਨਲ ਗਾਰਡ ਦੇ ਸੁਰੱਖਿਆ ਮਿਸ਼ਨ ਨੂੰ ਵਧਾ ਦਿੱਤਾ ਹੈ। ਦੇਸ਼ ਦੀ ਰਾਜਧਾਨੀ ਵਾਸ਼ਿੰਗਟਨ,ਡੀ.ਸੀ ਨੂੰ ਨੈਸ਼ਨਲ ਗਾਰਡ ਮੈਂਬਰਾਂ ਦੁਆਰਾ ਸੁਰੱਖਿਅਤ ਕਰਨ ਵਿੱਚ ਮਦਦ ਕਰਨ ਦੇ ਮਿਸ਼ਨ ਦੀ ਮਿਆਦ ਸ਼ੁੱਕਰਵਾਰ ਨੂੰ ਖਤਮ ਹੋਣੀ ਸੀ, ਜਿਸ ਕਰਕੇ ਕੈਪੀਟਲ ਪੁਲਿਸ ਨੇ ਪਿਛਲੇ ਹਫ਼ਤੇ ਇਸ ਮਿਸ਼ਨ ਦੀ ਮਿਆਦ ਵਿੱਚ 60 ਦਿਨਾਂ ਦਾ ਵਾਧਾ ਕਰਨ ਦੀ ਬੇਨਤੀ ਕੀਤੀ ਗਈ ਸੀ।ਰੱਖਿਆ ਵਿਭਾਗ ਦੇ ਇੱਕ ਬਿਆਨ ਅਨੁਸਾਰ ਹੁਣ 2,300 ਦੇ ਕਰੀਬ ਨੈਸ਼ਨਲ ਗਾਰਡ ਮੈਂਬਰ ਕੈਪੀਟਲ ਪੁਲਿਸ ਨਾਲ ਵਧੀ ਹੋਈ ਮਿਆਦ ਤੱਕ ਕੰਮ ਕਰਨਾ ਜਾਰੀ ਰੱਖਣਗੇ। 20 ਜਨਵਰੀ ਦੇ ਰਾਸ਼ਟਰਪਤੀ ਸਹੁੰ ਚੱਕ ਸਮਾਗਮ ਸਮੇਂ ਸੁਰੱਖਿਆ ਲਈ ਤਾਇਨਾਤ 25,000 ਸੈਨਿਕਾਂ ਵਿੱਚੋਂ ਇਸ ਸਮੇਂ 5,000 ਤੋਂ ਵੱਧ ਨੈਸ਼ਨਲ ਗਾਰਡ ਮੈਂਬਰ ਮੌਜੂਦ ਹਨ। ਪੈਂਟਾਗਨ ਦੇ ਪ੍ਰੈਸ ਸਕੱਤਰ ਜੌਹਨ ਕਿਰਬੀ ਨੇ ਇਸ ਮਿਸ਼ਨ ਲਈ ਨੈਸ਼ਨਲ ਗਾਰਡ ਦੇ ਸਹਿਯੋਗ ਲਈ ਧੰਨਵਾਦ ਕੀਤਾ ਹੈ। ਇਸਦੇ ਇਲਾਵਾ ਸੈਨਾ ਦੇ ਸੇਵਾਮੁਕਤ ਲੈਫਟੀਨੈਂਟ ਜਨਰਲ ਰਸਲ ਹੋਨਰ ਦੁਆਰਾ 6 ਜਨਵਰੀ ਨੂੰ ਹੋਏ ਹਮਲੇ ਤੋਂ ਬਾਅਦ ਕੈਪੀਟਲ ਦੀ ਸੁਰੱਖਿਆ ਦਾ ਅਧਿਐਨ ਜਾਰੀ ਕੀਤਾ ਗਿਆ, ਜਿਸ ਅਨੁਸਾਰ ਕਾਂਗਰਸ ਨੂੰ ਵਿਭਾਗ ਦੇ ਉੱਚ ਪੱਧਰਾਂ ਨੂੰ ਸੁਰੱਖਿਆ ਦੇਣ ਲਈ ਹੋਰ ਕੈਪੀਟਲ ਪੁਲਿਸ ਅਧਿਕਾਰੀਆਂ ਦੀ ਨਿਯੁਕਤੀ ਕਰਨ ਦੀ ਗੱਲ ਕਹੀ ਗਈ ਹੈ।