ਕੈਲੀਫੋਰਨੀਆ ‘ਚ ਗੋਸਟ ਸ਼ਿਪ ਵੇਅਰਹਾਊਸ ਦੇ ਅਗਨੀਕਾਂਡ ਲਈ ਇਸਦੇ ਪ੍ਰਬੰਧਕ ਨੂੰ ਹੋਈ ਨੌਂ ਸਾਲ ਦੀ ਕੈਦ

ਫਰਿਜ਼ਨੋ (ਕੈਲੀਫੋਰਨੀਆ), 9 ਮਾਰਚ (ਗੁਰਿੰਦਰਜੀਤ ਨੀਟਾ ਮਾਛੀਕੇ / ਕੁਲਵੰਤ ਧਾਲੀਆਂ) – ਕੈਲੀਫੋਰਨੀਆ ਸਥਿਤ ਕਲਾਕਾਰਾਂ ਦਾ ਇੱਕ ਗੋਦਾਮ ਜਿਸਨੂੰ ਗੋਸਟ ਸ਼ਿਪ ਵੇਅਰਹਾਊਸ ਵੀ ਕਿਹਾ ਜਾਂਦਾ ਹੈ, ਵਿੱਚ ਤਕਰੀਬਨ ਪੰਜ ਸਾਲ ਪਹਿਲਾਂ ਅੱਗ ਲੱਗਣ ਕਾਰਨ 36 ਲੋਕਾਂ ਦੀ ਮੌਤ ਹੋ ਗਈ ਸੀ। ਇਸਦੇ ਸੰਬੰਧ ਵਿੱਚ ਇਸ ਗੋਦਾਮ ਦੇ ਸੰਸਥਾਪਕ ਨੂੰ ਸੋਮਵਾਰ ਦੇ ਦਿਨ ਨੌਂ ਸਾਲ ਦੀ ਕੈਦ ਅਤੇ ਰਿਹਾਈ ਤੋਂ ਬਾਅਦ ਤਿੰਨ ਸਾਲਾਂ ਦੀ ਨਿਗਰਾਨੀ ਦੀ ਸਜ਼ਾ ਸੁਣਾਈ ਗਈ ਹੈ। ਅਲੇਮੇਡਾ ਜ਼ਿਲ੍ਹਾ ਅਟਾਰਨੀ ਨੈਨਸੀ ਓਮਾਲੀ ਦੇ ਦਫ਼ਤਰ ਅਨੁਸਾਰ ਕੈਲੀਫੋਰਨੀਆ ਦੇ ਓਕਲੈਂਡ ਵਿੱਚ ਗੋਸਟ ਸ਼ਿਪ ਵੇਅਰਹਾਊਸ ਦੇ ਮਾਸਟਰ ਕਿਰਾਏਦਾਰ ਡੇਰਿਕ ਅਲਮੇਨਾ ਨੂੰ ਇਹ ਸਜ਼ਾ ਸੁਣਾਈ ਗਈ ਹੈ ਜਦਕਿ ਅਲਮੇਨਾ ਨੇ 2 ਦਸੰਬਰ, 2016 ਨੂੰ ਅੱਗ ਲੱਗਣ ਵਿੱਚ ਆਪਣੀ ਭੂਮਿਕਾ ਲਈ ਮੁਆਫੀ ਮੰਗੀ ਹੈ। ਇਸ ਮਾਮਲੇ ਵਿੱਚ ਅਲਮੇਨਾ ਨੂੰ ਜਨਵਰੀ ਵਿੱਚ ਗੋਦਾਮ ਵਿਚਲੀਆਂ  36 ਮੌਤਾਂ ਲਈ ਦੋਸ਼ੀ ਠਹਿਰਾਇਆ ਗਿਆ ਸੀ।ਅਲਮੇਨਾ ਨੇ ਥਿਏਟਰ ਸੈੱਟ ਬਣਾਉਣ ਲਈ 2013 ਵਿੱਚ ਇਹ ਗੋਦਾਮ ਕਿਰਾਏ ‘ਤੇ ਲਿਆ ਸੀ, ਪਰ ਉਸਨੇ ਦੂਜੇ ਕਲਾਕਾਰਾਂ ਨੂੰ ਕਿਰਾਏ ਲਈ ਰੱਖਣਾ ਸ਼ੁਰੂ ਕਰ ਦਿੱਤਾ ਸੀ। ਇੱਕ ਹੋਰ ਆਦਮੀ ਹੈਰਿਸ ਨੇ ਕਥਿਤ ਤੌਰ ‘ਤੇ ਇਸ ਇਮਾਰਤ ਨੂੰ ਇੱਕ ਰਹਿਣ ਵਾਲੇ ਖੇਤਰ ਵਿੱਚ ਬਦਲਣ, ਵੱਡੀਆਂ ਪਾਰਟੀਆਂ ਦਾ ਪ੍ਰਬੰਧ ਕਰਨ ਅਤੇ ਕਿਰਾਇਆ ਇੱਕਠਾ ਕਰਨ ਵਿੱਚ ਅਲਮੇਨਾ ਦੀ ਸਹਾਇਤਾ ਕੀਤੀ ਸੀ। ਵਕੀਲਾਂ ਅਨੁਸਾਰ ਅਲਮੇਨਾ ਦੇ ਇਸ ਕਦਮ ਨਾਲ  ਗੋਦਾਮ ਜਲਣਸ਼ੀਲ ਚੀਜ਼ਾਂ ਨਾਲ ਭਰ ਗਿਆ ਸੀ, ਜਦਕਿ ਉੱਥੇ ਬਾਹਰ ਨਿਕਲਣ ਦੇ ਰਾਸਤੇ ਵੀ ਬੰਦ ਸਨ ਅਤੇ ਕੋਈ ਹੋਰ ਬਚਾਓ ਸਾਧਨ ਵੀ ਨਹੀ ਸਨ।ਪਿਛਲੇ ਸਾਲ, ਓਕਲੈਂਡ ਸ਼ਹਿਰ ,ਅੱਗ ਦੇ ਪੀੜਤਾਂ ਲਈ ਮੁਕੱਦਮਾ ਨਿਪਟਾਉਣ ਲਈ 32 ਮਿਲੀਅਨ ਡਾਲਰ ਤੋਂ ਵੱਧ ਦਾ ਭੁਗਤਾਨ ਕਰਨ ਲਈ ਰਾਜ਼ੀ ਹੋਇਆ ਸੀ, ਜਿਸ ਵਿੱਚ ਮਰਨ ਵਾਲਿਆਂ ਦੇ ਪਰਿਵਾਰਾਂ ਲਈ 23.5 ਮਿਲੀਅਨ ਡਾਲਰ ਅਤੇ ਇੱਕ ਜ਼ਖਮੀ ਹੋਏ ਵਿਅਕਤੀ ਲਈ 9.2 ਮਿਲੀਅਨ ਡਾਲਰ ਸ਼ਾਮਲ ਸਨ।