ਇੰਡੀਆਨਾ ਸਟੇਟ ਜੇਲ੍ਹ ਵਿੱਚ ਇੱਕ ਕੈਦੀ ਨੇ ਕੀਤੀ ਜੇਲ੍ਹ ਅਧਿਕਾਰੀ ਦੀ ਹੱਤਿਆ

ਫਰਿਜ਼ਨੋ (ਕੈਲੀਫੋਰਨੀਆ), 22 ਫਰਵਰੀ (ਗੁਰਿੰਦਰਜੀਤ ਨੀਟਾ ਮਾਛੀਕੇ / ਕੁਲਵੰਤ ਧਾਲੀਆਂ) – ਅਮਰੀਕਾ ਵਿੱਚ ਅਪਰਾਧੀਆਂ ਦੇ ਹੌਸਲੇ ਪ੍ਰਤੀ ਦਿਨ ਬੁਲੰਦ ਹੁੰਦੇ ਜਾ ਰਹੇ ਹਨ, ਜਿਸ ਕਰਕੇ ਉਹ ਕਾਨੂੰਨੀ ਵਿਵਸਥਾ ਤੋੜਨ ਅਤੇ ਪੁਲਿਸ ਅਧਿਕਾਰੀਆਂ ਉੱਪਰ ਹਮਲਾ ਕਰਨ ਤੋਂ ਵੀ ਨਹੀ ਡਰਦੇ।ਅਜਿਹੇ ਹੀ ਇੱਕ ਹਮਲੇ ਦੀ ਘਟਨਾ ਇੰਡੀਆਨਾ ਸਟੇਟ ਜੇਲ੍ਹ ਵਿੱਚ ਵਾਪਰੀ ਹੈ, ਜਿੱਥੇ ਇੱਕ ਕੈਦੀ ਦੁਆਰਾ ਇੱਕ ਜੇਲ੍ਹ ਅਧਿਕਾਰੀ ਉੱਪਰ ਹਮਲਾ ਕਰਕੇ ਉਸਨੂੰ ਮੌਤ ਦੇ ਘਾਟ ਉਤਾਰ ਦਿੱਤਾ ਹੈ । ਇਸ ਘਟਨਾ ਬਾਰੇ ਇੰਡੀਆਨਾ ਸਟੇਟ ਪੁਲਿਸ ਨੇ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਇਹ ਹਮਲਾ ਮਿਸ਼ੀਗਨ ਸਿਟੀ ਵਿਚ ਇੰਡੀਆਨਾ ਸਟੇਟ ਜੇਲ੍ਹ ‘ਚ ਐਤਵਾਰ ਦੁਪਹਿਰ ਕਰੀਬ 2:40 ਵਜੇ ਹੋਇਆ, ਜਿਸਦੀ ਵਜ੍ਹਾ ਕਰਕੇ ਇੱਕ  ਅਧਿਕਾਰੀ ਦੀ ਮੌਤ ਹੋ ਜਾਣ ਦੇ ਨਾਲ ਦੂਜਾ ਗੰਭੀਰ ਰੂਪ ਨਾਲ ਜ਼ਖਮੀ ਹੋ ਗਿਆ ਹੈ।  ਪੁਲਿਸ ਨੇ ਦੱਸਿਆ ਕਿ ਇਸ ਹਮਲੇ ਦਾ 38 ਸਾਲਾ ਦੋਸ਼ੀ ਕੈਦੀ ਟਾਈਮਟਰੀ ਕੈਂਪਬੈਲ ਨੂੰ ਕਤਲ ਸਮੇਤ ਕਈ ਹੋਰ ਮੁੱਢਲੇ ਦੋਸ਼ਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਇਸ ਕੈਦੀ ਨੇ ਜੇਲ੍ਹ ਅਧਿਕਾਰੀਆਂ ਉੱਪਰ ਇੱਕ ਕਾਮਨ ਏਰੀਏ ਵਿੱਚ ਹਮਲਾ ਕਰਕੇ ਨੁਕਸਾਨ ਪਹੁੰਚਾਇਆ। ਕੈਦੀ ਦੁਆਰਾ ਹਮਲਾ ਕੀਤੇ ਜਾਣ ਦੇ ਬਾਅਦ ਅਧਿਕਾਰੀਆਂ ਨੂੰ ਮਿਸ਼ੀਗਨ ਸਿਟੀ ਦੇ ਸੇਂਟ ਐਂਥਨੀ  ਹਸਪਤਾਲ ਲਿਜਾਇਆ ਗਿਆ, ਜਿੱੱਥੇ ਇਕ ਨੂੰ ਮ੍ਰਿਤਕ ਘੋਸ਼ਿਤ ਕੀਤਾ ਗਿਆ ਅਤੇ ਦੂਸਰੇ ਦੀ ਹਾਲਤ ਗੰਭੀਰ ਦੱਸੀ ਗਈ।  ਇੰਡੀਆਨਾ ਸਟੇਟ ਪੁਲਿਸ ਲੋਵਲ ਪੋਸਟ ਦੇ ਅਧਿਕਾਰੀ ਦ ਜੇਲ੍ਹ ਵਿੱਚ ਹੋਏ ਇਸ ਹਾਦਸੇ ਦੀ ਜਾਂਚ ਵਿੱਚ ਸਹਾਇਤਾ ਕਰ ਰਹੇ ਸਨ।