ਨਿਊਯਾਰਕ ਵਿੱਚ ਗੈਸ ਧਮਾਕੇ ਨਾਲ ਹੋਏ 9 ਜ਼ਖਮੀ, 2 ਬੱਚਿਆਂ ਦੀ ਹਾਲਤ ਗੰਭੀਰ

ਫਰਿਜ਼ਨੋ (ਕੈਲੀਫੋਰਨੀਆ), 19 ਫਰਵਰੀ (ਗੁਰਿੰਦਰਜੀਤ ਨੀਟਾ ਮਾਛੀਕੇ / ਕੁਲਵੰਤ ਧਾਲੀਆਂ) – ਨਿਊਯਾਰਕ ਦੇ ਇੱਕ ਅਪਾਰਟਮੈਂਟ ਵਿੱਚ ਵੀਰਵਾਰ ਦੇ ਦਿਨ ਹੋਏ ਜ਼ਬਰਦਸਤ ਗੈਸ ਧਮਾਕੇ ਵਿੱਚ 9 ਲੋਕਾਂ ਦੇ ਜਖਮੀ ਹੋਣ ਦੀ ਘਟਨਾ ਵਾਪਰੀ ਹੈ। ਇਸ ਹਾਦਸੇ ਸੰਬੰਧੀ ਪੁਲਿਸ ਅਤੇ ਫਾਇਰ ਵਿਭਾਗ ਦੇ ਅਧਿਕਾਰੀਆਂ ਨੇ ਦੱਸਿਆ ਕਿ ਨਿਊਯਾਰਕ ਦੇ ਬ੍ਰੋਂਕਸ ‘ਚ ਇੱਕ ਅਪਾਰਟਮੈਂਟ ਵਿੱਚ ਹੋਏ  ਗੈਸ ਧਮਾਕੇ ਵਿੱਚ 9 ਵਿਅਕਤੀ ਜ਼ਖਮੀ ਹੋਏ ਹਨ, ਜਿਨ੍ਹਾਂ ਵਿੱਚੋਂ ਦੋ ਬੱਚੇ ਗੰਭੀਰ ਹਾਲਤ ਵਿੱਚ ਹਨ।ਪੁਲਿਸ ਅਨੁਸਾਰ ਜ਼ਖਮੀ ਹੋਏ  ਨੌਂ ਲੋਕਾਂ ਵਿੱਚੋਂ ਛੇ ਬੱਚੇ ਹਨ, ਜਿਹਨਾਂ ਵਿੱਚੋਂ ਸਭ  ਤੋਂ ਛੋਟੇ ਦੀ ਉਮਰ 5 ਸਾਲ ਹੈ। ਪੁਲਿਸ ਨੇ ਜਾਣਕਾਰੀ ਦਿੱਤੀ ਕਿ ਇਹ ਧਮਾਕਾ ਬ੍ਰੋਂਕਸ ਦੇ ਇੱਕ ਅਪਾਰਟਮੈਂਟ ਦੀ ਦੂਸਰੀ ਮੰਜ਼ਲ ‘ਤੇ ਹੋਇਆ ਜੋ ਕਿ ਇੰਨਾ ਜ਼ਬਰਦਸਤ ਸੀ ਕਿ ਘਰ ਦਾ ਦਰਵਾਜ਼ਾ ਕੁੱਝ ਦੂਰੀ ਤੱਕ ਉੱਡ ਕੇ ਦਰੱਖਤ ਉੱਤੇ ਜਾ ਡਿੱਗਿਆ।ਨਿਊਯਾਰਕ ਫਾਇਰ ਵਿਭਾਗ ਨੇ ਦੱਸਿਆ ਕਿ ਇਸ ਹਾਦਸੇ ਦੀ ਸੂਚਨਾ ਮਿਲਣ ਦੇ ਤਿੰਨ ਮਿੰਟਾਂ ਵਿੱਚ ਸਹਾਇਤਾ ਯੂਨਿਟਾਂ ਘਟਨਾ ਸਥਾਨ ‘ਤੇ ਪਹੁੰਚੀਆਂ ,ਜਿੱਥੇ ਕਿ ਗੈਸ ਧਮਾਕੇ ਨੇ ਕਾਫੀ ਨੁਕਸਾਨ ਕੀਤਾ ਸੀ।ਵਿਭਾਗ ਦੇ ਕਰਮਚਾਰੀਆਂ ਨੇ ਕਾਰਵਾਈ ਕਰਦਿਆਂ ਜਖਮੀਆਂ ਨੂੰ ਬਾਹਰ ਕੱਢਿਆ ਜਿਨ੍ਹਾਂ ਵਿਚੋਂ ਦੋ ਦੀ ਹਾਲਤ ਗੰਭੀਰ ਸੀ।