ਓਕਲਾਹੋਮਾ ‘ਚ ਇੱਕ ਵਿਅਕਤੀ ‘ਤੇ ਲੱਗੇ 6 ਹੱਤਿਆਵਾਂ ਦੇ ਦੋਸ਼

ਫਰਿਜ਼ਨੋ (ਕੈਲੀਫੋਰਨੀਆ), 4 ਫਰਵਰੀ (ਗੁਰਿੰਦਰਜੀਤ ਨੀਟਾ ਮਾਛੀਕੇ / ਕੁਲਵੰਤ ਧਾਲੀਆਂ) – ਓਕਲਾਹੋਮਾ ਦੇ ਮਸਕੋਗੀ ਵਿੱਚ ਪਿਛਲੇ ਦਿਨੀ ਇੱਕ ਘਰ ਵਿੱਚ ਹੋਈ ਗੋਲੀਬਾਰੀ ਦੌਰਾਨ ਪੰਜ ਬੱਚਿਆਂ ਸਮੇਤ ਹੋਈਆਂ 6 ਮੌਤਾਂ ਦੇ ਮਾਮਲੇ ਵਿੱਚ ਇੱਕ ਵਿਅਕਤੀ ਉੱਪਰ ਦੋਸ਼ ਲਗਾਏ ਗਏ ਹਨ। ਇਸ ਮਾਮਲੇ ਬਾਰੇ ਪੁਲਿਸ ਨੇ ਦੱਸਿਆ ਕਿ ਇੱਕ 25 ਸਾਲਾ ਓਕਲਾਹੋਮਾ ਵਿਅਕਤੀ ਉੱਤੇ ਬੁੱਧਵਾਰ ਨੂੰ ਉਸਦੇ ਭਰਾ ਅਤੇ ਪੰਜ ਛੋਟੇ ਬੱਚਿਆਂ ਦੇ ਕਤਲ ਦਾ ਇਲਜ਼ਾਮ ਲਗਾਇਆ ਗਿਆ ਹੈ। ਅਦਾਲਤੀ ਰਿਕਾਰਡ ਦੇ ਅਨੁਸਾਰ ਪਤਾ ਚੱਲਦਾ ਹੈ ਕਿ ਮਸਕੋਗੀ ਦੇ ਜੈਰੌਨ ਡੀਜੋਨ ਪ੍ਰਿਜਿਨ ਉੱਤੇ ਪਹਿਲੀ ਡਿਗਰੀ ਕਤਲ ਦੇ ਛੇ ਮਾਮਲਿਆਂ,  ਮਾਰਨ ਦੇ ਇਰਾਦੇ ਨਾਲ ਗੋਲੀ ਚਲਾਉਣ ਅਤੇ ਹਥਿਆਰਾਂ ਦੇ ਕਬਜ਼ੇ ਆਦਿ ਦੇ ਦੋਸ਼ ਲਗਾਏ ਗਏ ਹਨ। ਪੁਲਿਸ ਅਨੁਸਾਰ ਪ੍ਰੀਜਿਨ ਦੁਆਰਾ 24 ਸਾਲਾ ਜੇਵਰਿਅਨ ਲੀ ਅਤੇ ਬੱਚਿਆਂ ਨੂੰ  ਗੋਲੀ ਮਾਰਨ ਦੇ ਕਾਰਨ ਅਜੇ ਅਣਜਾਣ ਹਨ ਅਤੇ ਮ੍ਰਿਤਕ ਬੱਚਿਆਂ ਵਿੱਚੋਂ ਸਭ ਤੋਂ ਵੱਡੇ ਦੀ ਉਮਰ 9 ਸਾਲ ਸੀ। ਇਸਦੇ ਇਲਾਵਾ ਬੱਚਿਆਂ ਦੀ ਮਾਂ ਬ੍ਰਿਟਨੀ ਐਂਡਰਸਨ ਵੀ ਮੰਗਲਵਾਰ ਤੜਕੇ ਹੋਈ ਇਸ ਗੋਲੀਬਾਰੀ ਵਿੱਚ ਜ਼ਖ਼ਮੀ ਹੋ ਗਈ ਸੀ , ਜਿਸਨੂੰ ਤੁਲਸਾ ਦੇ ਹਸਪਤਾਲ ਵਿੱਚ ਦਾਖਲ ਕਰਵਾਇਆ ਗਿਆ ਸੀ। ਮਸਕੋਗੀ ਪੁਲਿਸ ਨੇ ਦੱਸਿਆ ਕਿ ਪ੍ਰੀਜਿਨ ਅਤੇ ਮ੍ਰਿਤਕ ਇੱਕ ਹੀ ਘਰ ਵਿੱਚ ਰਹਿੰਦੇ ਸਨ, ਜਿੱਥੇ ਕਿ ਗੋਲੀਬਾਰੀ ਹੋਈ ਸੀ। ਇਸ ਮਾਮਲੇ ਦੇ ਦੋਸ਼ੀ ਪ੍ਰੀਜਿਨ ਨੇ ਅਦਾਲਤ ਦੇ ਰਿਕਾਰਡਾਂ ਦੇ ਅਨੁਸਾਰ 2019 ਵਿੱਚ ਇੱਕ ਔਰਤ ‘ਤੇ ਹਮਲਾ ਕਰਨ ਦੇ ਦੋਸ਼ ‘ਚ  ਵੀ ਸਜ਼ਾ ਦਾ ਸਾਹਮਣਾ ਕੀਤਾ ਸੀ।