ਅਮਰੀਕਾ : ਕਤਲ ਦੇ ਮਾਮਲੇ ਵਿੱਚ ਲੋੜੀਂਦੇ 70 ਸਾਲਾ ਵਿਅਕਤੀ ਦੀ ਦਲਦਲ ਵਿੱਚੋਂ ਲਾਸ਼ ਹੋਈ ਬਰਾਮਦ

ਫਰਿਜ਼ਨੋ (ਕੈਲੀਫੋਰਨੀਆ), 31  ਜਨਵਰੀ (ਗੁਰਿੰਦਰਜੀਤ ਨੀਟਾ ਮਾਛੀਕੇ / ਕੁਲਵੰਤ ਧਾਲੀਆਂ) – ਅਮਰੀਕਾ ਦੇ ਸੂਬੇ ਟੈਨੇਸੀ ਵਿੱਚ ਪਿਛਲੇ ਦਿਨੀ ਦੋ ਵਿਅਕਤੀਆਂ ਨੂੰ ਗੋਲੀ ਮਾਰ ਕੇ ਮੌਤ ਦੇ ਘਾਟ ਉਤਾਰਨ ਵਾਲੇ 70 ਸਾਲਾਂ ਬਜੁਰਗ ਦੀ ਲਾਸ਼ ਦਲਦਲ ਵਿੱਚੋਂ ਬਰਾਮਦ ਕੀਤੀ ਗਈ ਹੈ । ਇਸ ਮਾਮਲੇ ਦੇ ਸੰਬੰਧ ਵਿੱਚ ਟੈਨੇਸੀ ਬਿਊਰੋ ਆਫ ਇਨਵੈਸਟੀਗੇਸ਼ਨ ਨੇ ਦੱਸਿਆ ਕਿ ਡੇਵਿਡ ਵੋਵੇਲ (70) ਨਾਮਕ ਵਿਅਕਤੀ, ਜੋ ਇਸ ਹਫਤੇ ਦੇ ਸ਼ੁਰੂ ਵਿੱਚ ਪੇਂਡੂ ਟੈਨੇਸੀ ‘ਚ ਦੋ  ਬੱਤਖਾਂ ਦਾ ਸ਼ਿਕਾਰ ਕਰਨ ਵਾਲੇ ਵਿਅਕਤੀਆਂ ਦਾ ਕਤਲ ਕਰਨ ਲਈ ਦੋਸ਼ੀ ਸੀ, ਨੂੰ ਸ਼ਨੀਵਾਰ ਦੇ ਦਿਨ ਰੀਲਫੁੱਟ ਝੀਲ ਵਿੱਚ ਮ੍ਰਿਤਕ ਪਾਇਆ ਗਿਆ ਸੀ, ਜਿੱਥੇ ਸੋਮਵਾਰ ਨੂੰ ਦੋਵਾਂ ਵਿਅਕਤੀਆਂ ਨੂੰ ਜਾਨ ਤੋਂ ਮਾਰ ਦਿੱਤਾ ਗਿਆ ਸੀ। ਜ਼ਿਲ੍ਹਾ ਅਟਾਰਨੀ ਟੌਮੀ ਥਾਮਸ ਅਨੁਸਾਰ ਚਾਂਸ ਬਲੈਕ (26) ਅਤੇ ਜ਼ੈਕਰੀ ਗਰੂਮਜ਼(25) ਜੋ ਕਿ ਸੋਮਵਾਰ ਸਵੇਰੇ ਉੱਤਰ ਪੱਛਮੀ ਟੈਨੇਸੀ ਦੀ ਰੀਲਫੁੱਟ ਝੀਲ ‘ਤੇ ਸਨ ਅਤੇ  ਝਗੜਾ ਕਰਨ ਦੇ ਬਾਅਦ ਵੋਵੇਲ ਨੇ ਕਥਿਤ ਤੌਰ ‘ਤੇ ਗੋਲੀਬਾਰੀ ਕਰਕੇ ਬਲੈਕ ਅਤੇ ਗਰੂਮਜ਼ ਦੋਵਾਂ ਨੂੰ ਮਾਰ ਦਿੱਤਾ ਸੀ। ਇਸਦੇ ਬਾਅਦ ਘਟਨਾ ਸਥਾਨ ਤੋਂ ਭੱਜ ਜਾਣ ਵਾਲੇ ਵੋਵੇਲ ਨੂੰ ਕਤਲ ਦੇ ਇਲਜਾਮਾਂ ਤਹਿਤ ਲੱਭਣ ਲਈ ਪੁਲਿਸ ਵੱਲੋਂ ਇਸ ਖੇਤਰ ਵਿੱਚ ਇੱਕ ਤਲਾਸ਼ੀ ਅਭਿਆਨ ਸ਼ੁਰੂ ਕੀਤਾ ਗਿਆ ਸੀ ਅਤੇ ਅਧਿਕਾਰੀਆਂ ਅਨੁਸਾਰ ਵੋਵੇਲ ਦੀ ਲਾਸ਼ ਕਰੀਬ 3 ਵਜੇ ਪ੍ਰਾਪਤ ਹੋਈ।ਟੈਨੇਸੀ ਬਿਊਰੋ ਆਫ ਇਨਵੈਸਟੀਗੇਸ਼ਨ ਨੇ ਦੱਸਿਆ ਕਿ ਅਧਿਕਾਰੀਆਂ ਦੁਆਰਾ ਮ੍ਰਿਤਕ ਦੀ ਪਛਾਣ ਕਰ ਲਈ ਗਈ ਹੈ, ਜਦਕਿ ਲਾਸ਼ ਦਾ ਪੋਸਟਮਾਰਟਮ ਕਰਵਾਇਆ ਜਾਵੇਗਾ। ਇਸਦੇ ਇਲਾਵਾ ਪੁਲਿਸ ਦੁਆਰਾ ਅਜੇ ਵੋਵੇਲ  ਦੀ ਮੌਤ ਦੇ ਕਾਰਨਾਂ ਦੀ ਘੋਸ਼ਣਾ ਨਹੀਂ ਕੀਤੀ ਗਈ ਹੈ।