ਅਬੋਹਰ, 22 ਜਨਵਰੀ (ਰਿਤਿਸ਼) – ਬਾਗਬਾਨੀ ਵਿਭਾਗ ਵੱਲੋਂ ਸਿਟਰਸ ਅਸਟੇਟ ਅਬੋਹਰ ਰਾਹੀਂ ਦਾਣਾ ਮੰਡੀ ਅਬੋਹਰ ਵਿਖੇ ਨਿੰਬੂ ਜਾਤੀ ਫਲਾਂ ਦੀ ਕਾਸ਼ਤ ਸਬੰਧੀ ਇਕ ਦਿਨਾਂ ਸੈਮੀਨਾਰ ਲਗਾਇਆ ਗਿਆ ਜਿਸ ਵਿਚ ਜ਼ਿਲ੍ਹਾ ਫਾਜ਼ਿਲਕਾ ਦੇ 100 ਦੇ ਕਰੀਬ ਬਾਗਬਾਨਾ ਨੇ ਭਾਗ ਲਿਆ। ਸੈਮੀਨਾਰ ਦੌਰਾਨ ਪੀ.ਏ.ਯੂ ਖੇਤਰੀ ਫਲ ਖੋਜ਼ ਕੇਂਦਰ ਅਬੋਹਰ ਦੇ ਸਾਇੰਸਦਾਨਾਂ ਵੱਲੋਂ ਨਿੰਬੂ ਜਾਤੀ ਫਲਾਂ ਦੀ ਕਾਂਟ-ਛਾਂਟ, ਬੋਰਡੋ ਮਿਸ਼ਰਣ ਬਣਾਉਣ ਅਤੇ ਵਰਤੋਂ ਕਰਨ, ਫਲਾਂ ਦੇ ਖੁਰਾਕੀ ਤੱਤਾਂ, ਕਿੰਨੂ ਫਲ ਦੀ ਤੁੜਾਈ ਉਪਰੰਤ ਸਾਂਭ-ਸੰਭਾਲ ਅਤੇ ਪਤਛੜ ਫਲਦਾਰ ਬੂਟਿਆਂ ਦੀ ਕਾਂਟ-ਛਾਟ ਤੇ ਸੁਧਾਈ ਬਾਰੇ ਵੱਖ-ਵੱਖ ਮਾਹਰਾਂ ਡਾ. ਕ੍ਰਿਸ਼ਨ ਕੁਮਾਰ, ਡਾ. ਮਨਦੀਪ ਰਹੇਜਾ, ਡਾ. ਸ਼ਸ਼ੀ ਪਠਾਨੀਆ, ਡਾ. ਮਨਵੀਰ ਕੌਰ ਅਤੇ ਡਾ. ਅਨਿਲ ਸਾਗਵਾਨ ਵੱਲੋਂ ਤਕਨੀਕੀ ਜਾਣਕਾਰੀ ਮੁਹੱਈਆ ਕਰਵਾਈ ਗਈ।
ਇਸ ਮੌਕੇ ਵਿਸ਼ੇਸ਼ ਤੌਰ `ਤੇ ਪਹੁੰਚੇ ਬਾਗਬਾਨੀ ਵਿਕਾਸ ਅਫਸਰ ਸ੍ਰੀ ਵਿਪੇਸ਼ ਕੁਮਾਰ ਵੱਲੋਂ ਨਿੰਬੂ ਜਾਤੀ ਫਲਾਂ ਦੀ ਕੇਰ ਜਾਂ ਰਹਿੰਦ-ਖੂਹੰਦ ਵਾਲੇ ਫਲਾਂ ਤੋਂ ਬਾਓ ਐਨਜਾਈਮ (ਸਿਰਕਾ) ਬਣਾਉਣ ਦੀ ਵਿਧੀ ਬਾਰੇ ਬਾਗਬਾਨਾਂ ਨੂੰ ਜਾਣੂੰ ਕਰਵਾਇਆ, ਜਿਸ ਨਾਲ ਕਈ ਤਰ੍ਹਾਂ ਦੇ ਘਰੇਲੂ ਉਤਪਾਦ ਜਿਵੇਂ ਕਿ ਫਰਸ਼ ਅਤੇ ਟੁਆਇਲਟ ਕਲੀਨਰ, ਹੈਂਡ ਸੈਨੇਟਾਈਜਰ ਆਦਿ ਵਰਤੋਂ ਕਰਨ ਬਾਰੇ ਅਹਿਮ ਜਾਣਕਾਰੀ ਦਿੱਤੀ ਗਈ।
ਸਿਟਰਸ ਅਸਟੇਟ ਅਬੋਹਰ ਦੇ ਮੁੱਖ ਕਾਰਜਕਾਰੀ ਅਫਸਰ ਡਾ. ਜਗਤਾਰ ਸਿੰਘ ਵੱਲੋਂ ਬਾਗਬਾਨਾਂ ਨੂੰ ਸੈਮੀਨਾਰ ਵਿਚ ਭਾਗ ਲੈਣ ਲਈ ਧੰਨਵਾਦ ਕੀਤਾ ਅਤੇ ਸਿਟਰਸ ਅਸਟੇਟ ਅਬੋਹਰ ਵੱਲੋਂ ਦਿੱਤੀਆਂ ਜਾ ਰਹੀਆਂ ਸਹੂਲਤਾਂ ਬਾਰੇ ਜਾਣੂੰ ਕਰਵਾਇਆ। ਡਿਪਟੀ ਡਾਇਰੈਕਟਰ ਬਾਗਬਾਨੀ ਅਬੋਹਰ ਡਾ. ਤੇਜਿੰਦਰ ਸਿੰਘ ਵੱਲੋਂ ਬਾਗਬਾਨੀ ਫਸਲਾਂ ਦੀ ਕਾਸ਼ਤ ਸਬੰਧੀ ਜਾਣਕਾਰੀ ਦੇਣ ਲਈ ਵੱਧ ਤੋਂ ਵੱਧ ਸੈਮੀਨਾਰ ਲਗਾਉਣ ਬਾਰੇ ਯਕੀਨੀ ਬਣਾਇਆ ਗਿਆ।ਇਸ ਮੌਕੇ ਸਟੇਜ਼ ਸੰਚਾਲਕ ਦੀ ਭੂਮਿਕਾ ਡਾ. ਹਰਮਨਪ੍ਰੀਤ ਸਿੰਘ ਬਾਗਬਾਨੀ ਵਿਕਾਸ ਅਫਸਰ ਵੱਲੋਂ ਨਿਭਾਈ ਗਈ।
ਇਸ ਮੌਕੇ ਸਿਟਰਸ ਅਸਟੇਟ ਅਬੋਹਰ ਦੀ ਕਾਰਜਕਾਰਨੀ ਕਮੇਟੀ ਦੇ ਮੈਂਬਰ ਸ੍ਰੀ ਅਜੀਤ ਸਹਾਰਣ, ਸ. ਰਾਜਿੰਦਰ ਸਿੰਘ ਸੇਖੋ, ਸ੍ਰੀ ਬਾਲ ਕ੍ਰਿਸ਼ਨ, ਸਹਾਇਕ ਡਾਇਰੈਕਟਰ ਬਾਗਬਾਨੀ ਡਾ. ਲਛਮਣ ਸਿੰਘ ਤੇ ਡਾ. ਮਨਦੀਪ ਸਿੰਘ ਤੋਂ ਇਲਾਵਾ ਹੋਰ ਅਧਿਕਾਰੀ ਤੇ ਕਰਮਚਾਰੀ ਮੌਜੂਦ ਸਨ।