ਫਰਿਜ਼ਨੋ (ਕੈਲੀਫੋਰਨੀਆਂ), 17 ਦਸੰਬਰ (ਗੁਰਿੰਦਰਜੀਤ ਨੀਟਾ ਮਾਛੀਕੇ / ਕੁਲਵੰਤ ਧਾਲੀਆਂ) – ਅਮਰੀਕਾ ਦੇ ਇੰਡੀਆਨਾ ਵਿੱਚ ਕਤਲ ਦੇ ਇੱਕ ਮਾਮਲੇ ਦਾ ਸ਼ੱਕੀ ਵਿਅਕਤੀ ,ਉਸ ਵੇਲੇ ਪੁਲਿਸ ਨੂੰ ਚਕਮਾ ਦੇ ਕੇ ਫਰਾਰ ਹੋ ਗਿਆ ਜਦੋਂ ਅਧਿਕਾਰੀ ਉਸਨੂੰ ਸੋਮਵਾਰ ਵਾਲੇ ਦਿਨ ਇੱਕ ਵੈਨ ਰਾਹੀ ਹਿਰਾਸਤ ਵਿੱਚ ਲੈ ਕੇ ਜਾ ਰਹੇ ਸਨ। ਅਧਿਕਾਰੀਆਂ ਅਨੁਸਾਰ 22 ਸਾਲਾ ਲਿਓਨ ਟੇਲਰ ‘ਤੇ ਪੂਰਬੀ ਸ਼ਿਕਾਗੋ, ਵਿੱਚ 19 ਨਵੰਬਰ ਨੂੰ 52 ਸਾਲਾ ਡੈਨੀਅਲ ਨਿਤਸ਼ੇ ਦੀ ਹੱਤਿਆ ਦਾ ਸ਼ੱਕ ਹੈ ਅਤੇ ਟੇਲਰ ਨੂੰ ਇੱਕ ਪ੍ਰਾਈਵੇਟ ਠੇਕੇਦਾਰ ਦੁਆਰਾ ਚਲਾਈ ਜਾ ਰਹੀ ਵੈਨ ਰਾਹੀ ਟੈਕਸਾਸ ਤੋਂ ਹੂਸੀਅਰ ਸਟੇਟ ਲਿਜਾਇਆ ਜਾ ਰਿਹਾ ਸੀ। ਇਸ ਦੌਰਾਨ ਰਾਸਤੇ ਵਿੱਚ ਉਹ ਲੱਗਭਗ 2:10 ਵਜੇ ਇੰਡੀਆਨਾ ਦੇ ਗੈਰੀ ਸਥਿਤ ਮੈਕਡੋਨਲਡ ਫਾਸਟ-ਫੂਡ ਕਾਰਨਰ ਤੇ ਰੁਕਣ ਦੌਰਾਨ ਭੱਜ ਗਿਆ। ਅਧਿਕਾਰੀਆਂ ਅਨੁਸਾਰ ਟੇਲਰ ਨੇ ਬਲੈਕ ਹੁੱਡੀ, ਕਾਲੀ ਜੁੱਤੀ ਅਤੇ ਕਾਲੀ ਜੀਨਸ ਪਾਈ ਹੋਈ ਸੀ। ਇਸ ਦੌਰਾਨ ਵੈਨ ਦੇ ਰੁਕਣ ਮੌਕੇ ਟੇਲਰ ਨੇ ਡਰਾਈਵਰ ਨੂੰ ਇੱਕ ਵਿੰਡੋ ਨੂੰ ਹੇਠਾਂ ਕਰਨ ਲਈ ਕਿਹਾ, ਅਤੇ ਡਰਾਈਵਰ ਦੇ ਅਜਿਹਾ ਕਰਨ ਤੇ ਦੋਸ਼ੀ ਖੁੱਲੀ ਖਿੜਕੀ ਵਿੱਚੋਂ ਛਾਲ ਮਾਰ ਕੇ ਭੱਜਣ ਵਿੱਚ ਕਾਮਯਾਬ ਹੋ ਗਿਆ। ਇਸ ਮਾਮਲੇ ਵਿੱਚ ਅਧਿਕਾਰੀਆਂ ਦੁਆਰਾ ਪ੍ਰਾਪਤ ਕੀਤੀ ਗਈ ਫੁਟੇਜ ਦੇ ਅਨੁਸਾਰ, ਵੈਨ ਦੇ ਡਰਾਈਵਰ ਨੇ ਟੇਲਰ ਨੂੰ ਭੱਜਣ ਤੋਂ ਬਾਅਦ ਫੜਨ ਦੀ ਨਾਕਾਮਯਾਬ ਕੋਸ਼ਿਸ਼ ਵੀ ਕੀਤੀ ਸੀ ਅਤੇ ਇਸ ਸ਼ੱਕੀ ਵਿਅਕਤੀ ਦੀ ਭਾਲ ਪੁਲਿਸ ਵੱਲੋਂ ਜਾਰੀ ਹੈ।