ਫਰਿਜ਼ਨੋ (ਕੈਲੀਫੋਰਨੀਆਂ), 9 ਦਸੰਬਰ (ਗੁਰਿੰਦਰਜੀਤ ਨੀਟਾ ਮਾਛੀਕੇ / ਕੁਲਵੰਤ ਧਾਲੀਆਂ) – ਫਰਿਜ਼ਨੋ ਸਿਟੀ ਕੌਂਸਲ ਦੀ ਮੈਂਬਰ ਐਸਮੇਰਲਡਾ ਸੋਰੀਆ ਨੂੰ ਕੋਰੋਨਾਂ ਵਾਇਰਸ ਨੇ ਆਪਣੀ ਲਪੇਟ ਵਿੱਚ ਲਿਆ ਹੈ ।ਸੋਰੀਆ ਨੇ ਇਸ ਸੰਬੰਧੀ ਸੋਮਵਾਰ ਰਾਤ ਨੂੰ ਘੋਸ਼ਣਾ ਕੀਤੀ ਹੈ ਕਿ ਉਸਨੇ ਕੋਵਿਡ -19 ਲਈ ਸਕਾਰਾਤਮਕ ਟੈਸਟ ਕੀਤਾ ਹੈ। ਕੌਂਸਲ ਮੈਂਬਰ ਸੋਰੀਆ ਨੇ ਇਹ ਐਲਾਨ ਇੱਕ ਨਿਊਜ਼ ਰੀਲੀਜ਼ ਰਾਹੀਂ ਕੀਤਾ, ਜਿਸ ਅਨੁਸਾਰ ਉਸ ਨੇ ਵਾਇਰਸ ਦੇ ਲੱਛਣ ਮਹਿਸੂਸ ਕਰਨ ਨਾਲ ਸਾਰੇ ਜਨਤਕ ਕੰਮਾਂ ਨੂੰ ਰੱਦ ਕਰ ਦਿੱਤਾ ਹੈ। ਸੋਰੀਆ ਨੇ ਦੱਸਿਆ ਕਿ ਉਹ ਆਪਣੇ ਡਾਕਟਰ ਦੇ ਆਦੇਸ਼ਾਂ ਦੀ ਪਾਲਣਾ ਕਰਦੀ ਹੋਈ ਸਵੈ-ਕੁਆਰੰਟੀਨ ਵਿੱਚ ਰਹੇਗੀ। ਇਹ ਕੌਂਸਲ ਮੈਂਬਰ ਸੋਰੀਆ ਫਰਿਜ਼ਨੋ ਵਿੱਚ ਵਾਇਰਸ ਦਾ ਸਕਾਰਾਤਮਕ ਟੈਸਟ ਕਰਨ ਵਾਲੀ ਇਸ ਸਮੇਂ ਦੀ ਨਵੀਂ ਏਰੀਆ ਲੀਡਰ ਹੈ। ਇਸ ਤੋਂ ਲਗਭੱਗ ਇੱਕ ਮਹੀਨਾ ਪਹਿਲਾਂ ਫਰਿਜ਼ਨੋ ਦੇ ਚੁਣੇ ਗਏ ਮੇਅਰ ਜੈਰੀ ਡਾਇਰ ਅਤੇ ਫਰਿਜ਼ਨੋ ਕਾਉਂਟੀ ਸੁਪਰਵਾਈਜ਼ਰ ਸਟੀਵ ਬ੍ਰਾਂਡੋ ਨੇ ਇੱਕ ਡਿਨਰ ਪਾਰਟੀ ਵਿੱਚ ਸ਼ਾਮਲ ਹੋਣ ਤੋਂ ਬਾਅਦ ਸਕਾਰਾਤਮਕ ਟੈਸਟ ਲਿਆ ਸੀ। ਸੋਰੀਆ ਦੀ ਵਾਇਰਸ ਟੈਸਟ ਸੰਬੰਧੀ ਇਹ ਘੋਸ਼ਣਾ 15 ਤੋਂ ਵੱਧ ਲੋਕਾਂ ਦੇ ਨਿੱਜੀ ਇਕੱਠ ਨੂੰ ਜੁਰਮਾਨਾ ਕਰਨ ਲਈ ਹੋਣ ਵਾਲੀ ਮੀਟਿੰਗ ਤੋਂ ਪਹਿਲਾਂ ਕੀਤੀ ਗਈ ਹੈ।