ਹੁਣ ਪਿੰਡ ਬਣਨਗੇ ਓ.ਡੀ.ਐਫ. ਪਲਸ -ਡਿਪਟੀ ਕਮਿਸ਼ਨਰ ਫਾਜ਼ਿਲਕਾ

ਫਾਜ਼ਿਲਕਾ, 3 ਦਸੰਬਰ (ਸੁਰਿੰਦਰਜੀਤ ਸਿੰਘ) – ਡਿਪਟੀ ਕਮਿਸ਼ਨਰ ਸ. ਅਰਵਿੰਦ ਪਾਲ ਸਿੰਘ ਸੰਧੂ ਦੀ ਅਗਵਾਈ ਹੇਠ ਸਵਛ ਭਾਰਤ ਮਿਸ਼ਨ ਤਹਿਤ ਜ਼ਿਲੇ੍ਹ ਦੇ ਵੱਖ-ਵੱਖ ਅਧਿਕਾਰੀਆਂ ਨਾਲ ਅਹਿਮ ਮੀਟਿੰਗ ਹੋਈ। ਉਨ੍ਹਾਂ ਕਿਹਾ ਕਿ ਸਵੱਛ ਭਾਰਤ ਮਿਸ਼ਨ ਤਹਿਤ ਪਹਿਲੇ ਪੜਾਅ ਵਿਚ ਹਰੇਕ ਘਰ ਵਿਚ ਪਖਾਣੇ ਬਣਾਉਣ ਦਾ ਟੀਚਾ ਮਿਥਿਆ ਗਿਆ ਸੀ ਜਿਸ ਤਹਿਤ ਲੋਕਾਂ ਅੰਦਰ ਬਾਹਰ ਪਖਾਣੇ ਜਾਣ ਦੀ ਬਜਾਏ ਘਰ ਅੰਦਰ ਹੀ ਟੁਆਇਲਟ ਜਾਣ ਦਾ ਸੁਭਾਅ ਪੈਦਾ ਕਰਨਾ ਸੀ। ਉਨ੍ਹਾਂ ਦੱਸਿਆ ਕਿ ਹੁਣ ਮਿਸ਼ਨ ਦੇ ਦੂਜੇ ਪੜਾਅ ਓਪਨ ਡੈਫੀਕੇਸ਼ਨ ਫਰੀ ਪਲਸ (ਓ.ਡੀ.ਐਫ. ਪਲਸ) ਨੂੰ ਸ਼ੁਰੂ ਕੀਤਾ ਜਾ ਰਿਹਾ ਹੈ। ਇਸ ਪੜਾਅ ਵਿਚ ਕਮਿਉਨਿਟੀ ਟੁਆਇਲਟ, ਟੋਭਿਆਂ ਦਾ ਨਵੀਨੀਕਰਨ, ਸੋਲੀਡ ਤੇ ਲਿਕਵਡ ਵੇਸਟ ਮੈਨੇਜਮੈਂਟ, ਪਿੰਡਾਂ ਦੀ ਸਾਫ-ਸਫਾਈ ਆਦਿ ਕੰਮਾਂ ਨੂੰ ਕੀਤਾ ਜਾਣਾ ਹੈ।
ਮੀਟਿੰਗ ਦੌਰਾਨ ਡਿਪਟੀ ਕਮਿਸ਼ਨਰ ਨੇ ਓ.ਡੀ.ਐਫ. ਪਲਸ ਪਿੰਡ `ਚ ਮਾਪਦੰਡਾਂ ਬਾਰੇ ਦੱਸਦਿਆਂ ਕਿਹਾ ਕਿ ਹਰੇਕ ਘਰ ਕੋਲ ਪਖਾਣਾ ਲਾਜ਼ਮੀ ਹੋਣਾ ਚਾਹੀਦਾ ਹੈ, ਪਬਲਿਕ ਥਾਂ `ਤੇ ਪਖਾਣਿਆਂ ਦੀ ਸੁਵਿਧਾ ਲਾਜ਼ਮੀ ਹੋਵੇ ਅਤੇ ਪਲਾਸਟਿਕ ਡੰਪ ਨਾ ਹੋਵੇ। ਇਹ ਸਾਰੀਆਂ ਸੁਵਿਧਾਵਾਂ ਹੋਣ `ਤੇ ਹੀ ਪਿੰਡ ਨੂੰ ਓ.ਡੀ.ਐਫ. ਪਲਸ ਘੋਸ਼ਿਤ ਕੀਤਾ ਜਾਵੇਗਾ।ਉਨ੍ਹਾਂ ਕਿਹਾ ਕਿ ਇਹ ਸਾਰੀ ਮੁਹਿੰਮ ਨੂੰ ਪੰਚਾਇਤੀ ਰਾਜ ਦੇ ਸਹਿਯੋਗ ਨਾਲ ਸਫਲਤਾਪੂਰਵਕ ਲਾਗੂ ਕੀਤਾ ਜਾਵੇਗਾ।
ਡਿਪਟੀ ਕਮਿਸ਼ਨਰ ਨੇ ਦੱਸਿਆ ਕਿ ਜ਼ਿਲ੍ਹੇ ਦੇ ਬਲਾਕਾਂ ਵਿਚ 34 ਕਮਿਉਨਿਟੀ ਪਖਾਣੇ ਬਣਾਏ ਜਾਣਗੇ।ਉਨ੍ਹਾਂ ਕਿਹਾ ਕਿ 34 ਲੱਖ ਦੀ ਲਾਗਤ ਨਾਲ ਕਮਿਉਨਿਟੀ ਪਖਾਣਾ ਬਣਾਇਆ ਜਾਵੇਗਾ। ਉਨ੍ਹਾਂ ਦੱਸਿਆ ਕਿ ਹਰੇਕ ਪਿੰਡ ਵਿਚ 2-2 ਸੋਲਿਡ ਤੇ ਲਿਕਵਡ ਵੇਸਟ ਮੈਨੇਜਮੈਂਟ ਯੁਨਿਟ ਸਥਾਪਿਤ ਕੀਤੇ ਜਾਣਗੇ। ਉਨ੍ਹਾਂ ਕਿਹਾ ਕਿ ਪਲਾਸਟਿਕ ਮੈਨੈਜਮੈਂਟ ਯੁਨਿਟ ਦੀ ਸਥਾਪਿਤ ਕਰਨ ਦੀ ਯੋਜਨਾ ਬਣਾਈ ਗਈ ਹੈ। ਉਨ੍ਹਾਂ ਦੱਸਿਆ ਕਿ ਪਲਾਸਟਿਕ ਮੈਨੇਜਮੈਂਟ ਯੁਨਿਟ ਸਥਾਪਿਤ ਕਰਨ ਲਈ 16 ਲੱਖ ਦੀ ਗ੍ਰਾਂਟ ਪ੍ਰਾਪਤ ਹੋ ਸਕਦੀ ਹੈ। ਉਨ੍ਹਾਂ ਅਧਿਕਾਰੀਆਂ ਨੂੰ ਪਹਿਲਾਂ ਤੋਂ ਬਣੇ ਅਸਾਸਿਆਂ ਦੀ ਜੀ.ਓ. ਟੈਗਿੰਗ ਕਰਨ ਦੇ ਆਦੇਸ਼ ਦਿੱਤੇ।
ਇਸ ਮੌਕੇ ਵਧੀਕ ਡਿਪਟੀ ਕਮਿਸ਼ਨਰ (ਵਿ) ਸ੍ਰੀ ਨਵਲ ਰਾਮ, ਜ਼ਿਲ੍ਹਾ ਵਿਕਾਸ ਤੇ ਪੰਚਾਇਤ ਅਫਸਰ ਸ. ਸੁਖਪਾਲ ਸਿੰਘ, ਸਮੂਹ ਬਲਾਕਾਂ ਦੇ ਬੀ.ਡੀ.ਪੀ.ਓਜ਼, ਮਿਸ ਸੈਵਿਆ ਸ਼ਰਮਾ ਅਤੇ ਹੋਰ ਵਿਭਾਗਾਂ ਦੇ ਅਧਿਕਾਰੀ ਤੇ ਕਰਮਚਾਰੀ ਮੌਜੂਦ ਸਨ।