ਲੱਖਾਂ ਅਮਰੀਕੀ ਵਾਸੀਆਂ ਨੇ ਕੀਤਾ ਬੇਰੁਜ਼ਗਾਰੀ ਕਲੇਮ ਦਾ ਦਾਅਵਾ

ਕੈਲੀਫੋਰਨੀਆਂ  16  ਨਵੰਬਰ (ਗੁਰਿੰਦਰਜੀਤ ਨੀਟਾ ਮਾਛੀਕੇ ) – ਇਸ ਸਾਲ ਸ਼ੁਰੂ ਹੋਈ ਕੋਰੋਨਾਂ ਮਹਾਂਮਾਰੀ ਨੇ ਸੰਸਾਰ ਵਿੱਚ ਲੱਖਾਂ ਜਾਨਾਂ ਲੈਣ ਦੇ ਨਾਲ ਵੱਡੀਆਂ ਆਰਥਿਕ ਵਿਵਸਥਾਵਾਂ ਨੂੰ ਵੀ ਹਿਲਾ ਦਿੱਤਾ ਹੈ। ਅਮਰੀਕਾ ਵਿੱਚ ਵੀ ਇਸਦਾ ਅਸਰ ਵੇਖਣ ਨੂੰ ਮਿਲਿਆ ਹੈ। ਆਰਥਿਕ ਤੰਗੀ ਦੇ ਚਲਦਿਆਂ ਸੈਂਕੜੇ ਕਾਰੋਬਾਰ ਬੰਦ ਹੋ ਜਾਣ ਕਰਕੇ ਲੱਖਾਂ ਵਿਅਕਤੀ ਬੇਰੁਜ਼ਗਾਰ ਹੋ ਗਏ ਹਨ ਅਤੇ ਸਰਕਾਰ ਵੱਲੋਂ ਅਜਿਹੇ ਲੋਕਾਂ ਦੀ ਮੱਦਦ ਕੀਤੀ ਜਾਂਦੀ ਹੈ।  ਇਸੇ ਸੰਬੰਧ ਵਿੱਚ ਲਗਭੱਗ 709,000 ਅਮਰੀਕੀਆਂ ਨੇ ਪਿਛਲੇ ਹਫਤੇ ਮੌਸਮੀ ਤੌਰ ‘ਤੇ ਐਡਜਸਟ ਕੀਤੇ ਗਏ ਅਧਾਰ’ ਤੇ ਬੇਰੁਜ਼ਗਾਰੀ ਦੇ ਲਾਭ ਲਈ ਦਾਅਵੇ ਦਾਖਲ ਕੀਤੇ ਹਨ। ਲੇਬਰ ਵਿਭਾਗ ਨੇ ਵੀਰਵਾਰ ਨੂੰ ਇਹਨਾਂ ਅਧਿਕਾਰਤ ਅੰਕੜਿਆਂ ਦੀ ਜਾਣਕਾਰੀ ਦਿੱਤੀ ਹੈ। ਇਹਨਾਂ ਵਿੱਚ ਲਗਭੱਗ 300,000 ਮਹਾਂਮਾਰੀ ਨਾਲ ਹੋਈ ਬੇਰੁਜ਼ਗਾਰੀ ਲਈ ਸਹਾਇਤਾ ਸੰਬੰਧੀ ਨਵੀਆਂ ਫਾਈਲਾਂ ਵੀ ਸਨ। ਇਹ ਪ੍ਰੋਗਰਾਮ ਉਨ੍ਹਾਂ ਲੋਕਾਂ ਨੂੰ ਲਾਭ ਦਿੰਦਾ ਹੈ ਜੋ ਆਮ ਤੌਰ ਤੇ ਰਾਜ ਦੀ ਸਹਾਇਤਾ ਲਈ ਯੋਗ ਨਹੀਂ ਹੁੰਦੇ ਜਿਹਨਾਂ ਵਿੱਚ ਸਵੈ-ਰੁਜ਼ਗਾਰ ਵਾਲੇ ਲੋਕ ਸ਼ਾਮਿਲ ਹਨ। ਇਸ ਸਮੇਂ  ਦੇਸ਼  ਵਿੱਚ ਨੌਕਰੀਆਂ ਦੀ ਘਾਟ ਹੋਣ ਕਰਕੇ ਜਿਆਦਾ ਲੋਕ ਬੇਰੁਜ਼ਗਾਰੀ ਕਲੇਮ ਦੇ ਦਾਅਵੇ ਦਾਖਲ ਕਰ ਰਹੇ ਹਨ ਜਦਕਿ ਇਸ ਤੋਂ ਪਹਿਲਾਂ ਸੀਜ਼ਨਲ ਉਤਾਰ ਚੜਾਅ ਤੋਂ ਬਿਨਾਂ ਲਗਭੱਗ 1 ਮਿਲੀਅਨ ਦਾਅਵੇ ਕੀਤੇ ਗਏ ਸਨ। ਹਾਲਾਂਕਿ ਬਹੁਤ ਸਾਰੇ ਲੋਕ ਕੰਮ ਤੇ ਵਾਪਸ ਚਲੇ ਵੀ ਗਏ ਹਨ ਪਰ ਲੱਖਾਂ ਅਜੇ ਵੀ ਰੁਜ਼ਗਾਰ ਪ੍ਰਾਪਤ ਨਹੀਂ ਕਰ ਸਕੇ ਹਨ।