ਤੁਲਸਾ ਨਸਲੀ ਕਤਲੇਆਮ ਦੇ 99 ਸਾਲਾਂ ਬਾਅਦ ਪੀੜਤਾਂ ਦੀ ਭਾਲ ਵਿੱਚ ਮਿਲੀ ਵਿਸ਼ਾਲ ਕਬਰ

ਕੈਲੀਫੋਰਨੀਆਂ 23 ਅਕਤੂਬਰ (ਗੁਰਿੰਦਰਜੀਤ ਨੀਟਾ ਮਾਛੀਕੇ)   –  ਮਾਨਵਤਾ ਵਿੱਚ ਨਸਲੀ ਹਿੰਸਾ ਪੁਰਾਣੇ ਸਮਿਆਂ ਤੋਂਂ ਹੀ ਚੱਲੀ ਆ ਰਹੀ ਹੈ ਹਾਲਾਂ ਕਿ ਅੱਜਕਲ੍ਹ ਇਹ ਭੇਦਭਾਵ ਘੱਟ ਜਰੂਰ ਹੋ ਗਿਆ ਹੈ ਪਰ ਪੂਰੀ ਤਰ੍ਹਾਂ ਖਤਮ ਨਹੀਂ ਹੋਇਆ ਹੈ।ਅਮਰੀਕਾ ਵਿੱਚ ਵੀ ਦਹਾਕਿਆਂ ਪਹਿਲਾਂ ਨਸਲੀ ਭੇਦਭਾਵ ਦੀਆਂ ਘਟਨਾਵਾਂ ਨੂੰ ਅੱਖੋਂ ਓਹਲੇ ਨਹੀਂ ਕੀਤਾ ਜਾ ਸਕਦਾ। ਇੱਕ ਕਤਲੇਆਮ ਜੋ ਨਸਲੀ ਭੇਦਭਾਵ ਕਰਕੇ 1921 ਵਿੱਚ ਅਮਰੀਕਾ ਦੇ ਤੁਲਸਾ ਵਿੱਚ ਹੋਇਆ ਸੀ ਦੇ ਸੰਬੰਧ ਵਿੱਚ ਓਕਲਾਹੋਮਾ ਰਾਜ  ਦੇ ਅਧਿਕਾਰੀ ਨੇ ਬੁੱਧਵਾਰ ਨੂੰ ਦੱਸਿਆ ਕਿ 1921 ਵਿੱਚ ਹੋਏ ਨਸਲੀ ਹੱਤਿਆਕਾਂਡ  ਦੇ ਪੀੜਤਾਂ ਦੀ ਭਾਲ ਕਰ ਰਹੇ ਮਾਹਰਾਂ ਨੂੰ ਲਗਭੱਗ 10 ਲਾਸ਼ਾਂ ਮਿਲੀਆਂ ਹਨ। ਓਕਲਾਹੋਮਾ ਰਾਜ ਦੀ ਪੁਰਾਤੱਤਵ ਵਿਗਿਆਨੀ ਕੈਰੀ ਸਟੈਕਲਬੇਕ ਨੇ ਕਿਹਾ ਕਿ ਉਨ੍ਹਾਂ ਨੂੰ ਇੱਕ ਵਿਸ਼ਾਲ ਕਬਰ ਮਿਲੀ ਹੈ ਜਿੱਥੇ ਕਈ ਵਿਅਕਤੀ ਦਫਨਾਏ ਗਏ ਸਨ। ਇੱਥੇ 99 ਸਾਲਾਂ ਬਾਅਦ 10 ਤਾਬੂਤ ਮਿਲੇ ਹਨ ਜਿਨ੍ਹਾਂ ਵਿੱਚੋਂ ਹਰ ਤਾਬੂਤ ਵਿੱਚ ਇੱਕ ਵਿਅਕਤੀ ਮੰਨਿਆ ਜਾਂਦਾ ਹੈ। ਫੋਰੈਂਸਿਕ ਵਿਗਿਆਨੀ ਫੋਬੀ ਸਟੱਬਲਫੀਲਡ ਦੇ ਅਨੁਸਾਰ, ਅਵਸ਼ੇਸ਼ਾਂ ਦੀ ਪਛਾਣ ਕਰਨ ਅਤੇ ਉਹ ਪੀੜਿਤ ਹਨ ਜਾਂ ਨਹੀਂ ਨਿਰਧਾਰਤ ਕਰਨ ਵਿੱਚ ਸਮਾਂ ਲੱਗੇਗਾ। ਜਿਕਰਯੋਗ ਹੈ ਕਿ ਇਹ ਹਿੰਸਾ 31 ਮਈ ਅਤੇ 1 ਜੂਨ 1921 ਨੂੰ ਵਾਪਰੀ ਸੀ, ਜਦੋਂ  ਚਿੱਟੇ ਲੋਕਾਂ ਦੀ ਭੀੜ ਨੇ ਤੁਲਸਾ ਦੀ ਬਲੈਕ ਵਾਲ ਸਟ੍ਰੀਟ ‘ਤੇ ਹਮਲਾ ਕੀਤਾ, ਜਿਸ ਵਿਚ ਲਗਭਗ 300 ਲੋਕ ਮਾਰੇ ਗਏ ਅਤੇ 800 ਜਖਮੀ ਹੋ ਗਏ ਸਨ । ਇਹਨਾਂ ਲੋਕਾਂ ਵਿੱਚ ਜ਼ਿਆਦਾਤਰ ਕਾਲੇ ਮੂਲ ਦੇ ਲੋਕ ਸਨ ਅਤੇ ਇਸਦੇ ਨਾਲ ਹੀ  ਕਈ ਕਾਰੋਬਾਰ, ਘਰ ਅਤੇ ਚਰਚਾਂ ਨੂੰ ਸਾੜਦੇ ਹੋਏ ਲੁੱਟਿਆ ਵੀ ਗਿਆ ਸੀ। ਮਾਹਰਾਂ ਅਨੁਸਾਰ ਅਵਸ਼ੇਸ਼ਾਂ ਦੀ ਜਾਂਚ ਤੋਂ ਬਾਅਦ ਉਨ੍ਹਾਂ ਨੂੰ ਤਾਬੂਤ ਵਿਚ ਵਾਪਸ ਰੱਖ ਦਿੱਤਾ ਜਾਵੇਗਾ ਅਤੇ ਪਰੀਖਣ ਦੀ ਖੁਦਾਈ ਵਿੱਚ ਇੱਕ ਹਫ਼ਤਾ ਲੱਗਣ ਦੀ ਉਮੀਦ ਹੈ।