ਜੰਮੂ, 29 ਅਗਸਤ – ਜੰਮੂ-ਕਸ਼ਮੀਰ ਦੇ ਪੁਲਵਾਮਾ ‘ਚ ਸੁਰੱਖਿਆ ਬਲਾਂ ਨੂੰ ਵੱਡੀ ਸਫ਼ਲਤਾ ਮਿਲੀ ਹੈ। ਪੁਲਵਾਮਾ ਦੇ ਜਦੂਰਾ ਇਲਾਕੇ ‘ਚ ਸ਼ੁੱਕਰਵਾਰ ਰਾਤ ਸ਼ੁਰੂ ਹੋਏ ਮੁਕਾਬਲੇ ‘ਚ ਸੁਰੱਖਿਆ ਬਲਾਂ ਨੇ ਤਿੰਨ ਅੱਤਵਾਦੀਆਂ ਨੂੰ ਮਾਰ ਦਿੱਤਾ। 24 ਘੰਟਿਆਂ ‘ਚ ਇਥੇ ਕੁੱਲ ਸੱਤ ਅੱਤਵਾਦੀ ਮਾਰੇ ਗਏ ਹਨ। ਮਾਰੇ ਗਏ ਅੱਤਵਾਦੀਆਂ ਦੀ ਪਛਾਣ ਆਦਿਲ ਹਾਫ਼ਿਜ਼ ਵਾਸੀ ਡਾਲੀਪੋਰਾ ਪੁਲਵਾਮਾ, ਰਾਓਫ ਵਾਸੀ ਮੁਸਪੁਨਾ, ਅਰਸ਼ਿਦ ਵਾਸੀ ਦਰਬਗਾਮ ਦੇ ਤੌਰ ‘ਤੇ ਹੋਈ ਹੈ। ਆਦਿਲ ਸਾਲ 2019 ਤੋਂ ਕਸ਼ਮੀਰ ‘ਚ ਸਰਗਰਮ ਸੀ ਜਦਕਿ ਰਾਓਫ ਅਤੇ ਅਰਸ਼ਿਦ ਇਕ ਹਫ਼ਤੇ ਪਹਿਲਾਂ ਹੀ ਸੰਗਠਨ ‘ਚ ਸ਼ਾਮਿਲ ਹੋਏ ਸਨ। ਜਨ ਸੰਪਰਕ ਅਧਿਕਾਰੀ ਰੱਖਿਆ, ਸ਼੍ਰੀਨਗਰ ਤੋਂ ਮਿਲੀ ਜਾਣਕਾਰੀ ਅਨੁਸਾਰ ਪੁਲਵਾਮਾ ਦੇ ਜਦੂਰਾ ਇਲਾਕੇ ‘ਚ ਕੱਲ੍ਹ ਰਾਤ ਸ਼ੁਰੂ ਹੋਏ ਮੁਕਾਬਲੇ ‘ਚ ਗੰਭੀਰ ਰੂਪ ਨਾਲ ਜ਼ਖ਼ਮੀ ਹੋਣ ਤੋਂ ਬਾਅਦ ਇੱਕ ਫ਼ੌਜੀ ਦੇ ਸ਼ਹੀਦ ਹੋਣ ਦੀ ਵੀ ਖ਼ਬਰ ਹੈ।
ਪੁਲਵਾਮਾ ਦੇ ਜ਼ਦੂਰਾ ਇਲਾਕੇ ‘ਚ ਕੱਲ੍ਹ ਰਾਤ ਸ਼ੁਰੂ ਹੋਏ ਮੁਕਾਬਲੇ ‘ਚ ਇਕ ਜਵਾਨ ਦੇ ਗੋਲੀ ਲੱਗਣ ਤੋਂ ਬਾਅਦ ਗੰਭੀਰ ਰੂਪ ਨਾਲ ਜ਼ਖ਼ਮੀ ਹੋ ਗਿਆ ਸੀ, ਜਿਸਤੋਂ ਬਾਅਦ ਉਸਨੂੰ 92 ਬੇਸ ਹਸਪਤਾਲ ਲੈ ਜਾਇਆ ਗਿਆ, ਜਿਥੇ ਉਸਨੇ ਦਮ ਤੋੜ ਦਿੱਤਾ।ਮਿਲੀ ਜਾਣਕਾਰੀ ਅਨੁਸਾਰ ਸ਼ੁੱਕਰਵਾਰ ਰਾਤ ਨੂੰ ਪੁਲਿਸ ਦੀ ਇਕ ਸੰਯੁਕਤ ਟੀਮ, 50RR ਅਤੇ CRPF ਨੇ ਜਦੂਰਾ ‘ਚ ਇਕ ਘਿਰਾਓ ਅਤੇ ਖੋਜ ਮੁਹਿੰਮ ਸ਼ੁਰੂ ਕੀਤੀ। ਜਿਵੇਂ ਹੀ ਸੰਯੁਕਤ ਦਲ ਨੇ ਸ਼ੱਕੀ ਸਥਾਨ ਦਾ ਘਿਰਾਓ ਕੀਤਾ, ਲੁਕੇ ਹੋਏ ਅੱਤਵਾਦੀਆਂ ਨੇ ਉਨ੍ਹਾਂ ‘ਤੇ ਗੋਲੀਬਾਰੀ ਕਰਨੀ ਸ਼ੁਰੂ ਕਰ ਦਿੱਤੀ। ਸੰਯੁਕਤ ਦਲ ਦੁਆਰਾ ਇਕ ਮੁਕਾਬਲਾ ਸ਼ੁਰੂ ਕਰਦੇ ਹੀ ਅੱਤਵਾਦੀਆਂ ਨੇ ਵੀ ਜਵਾਬੀ ਹਮਲਾ ਕੀਤਾ।
