ਕਿਸਾਨਾਂ ਲਈ ਖ਼ੁਸ਼ਖ਼ਬਰੀ : ਕੇਂਦਰ ਸਰਕਾਰ ਨੇ ਵਧਾਈ ਗੰਨੇ ਦੀ ਕੀਮਤ

ਨਵੀਂ ਦਿੱਲੀ, 19 ਅਗਸਤ – ਦੇਸ਼ ਦੇ ਗੰਨਾ ਕਿਸਾਨਾਂ ਨੂੰ ਬੁੱਧਵਾਰ ਨੂੰ ਖੁਸ਼ਖ਼ਬਰੀ ਮਿਲੀ ਜਦੋਂ ਕੇਂਦਰ ਸਰਕਾਰ ਨੇ ਗੰਨੇ ਦੇ ਖ਼ਰੀਦ ਮੁੱਲ ਨੂੰ ਵਧਾਉਣ ਦਾ ਫ਼ੈਸਲਾ ਲਿਆ। ਸਰਕਾਰ ਨੇ ਗੰਨੇ ਦੇ ਖਰੀਦ ਮੁੱਲ (FRP) ‘ਚ ਪ੍ਰਤੀ ਕੁਇੰਟਲ 10 ਰੁਪਏ ਦਾ ਇਜ਼ਾਫ਼ਾ ਕੀਤਾ। ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਪ੍ਰਧਾਨਗੀ ਹੇਠ ਬੁੱਧਵਾਰ ਨੂੰ ਹੋਈ ਕੈਬਨਿਟ ਦੀ ਬੈਠਕ ‘ਚ ਇਹ ਫ਼ੈਸਲਾ ਕੀਤਾ ਗਿਆ।ਦੇਸ਼ ਦੇ ਸ਼ੱਕਰ ਦੇ ਲਿਹਾਜ਼ ਤੋਂ ਸਾਲ (Sugar year) 1 ਅਕਤੂਬਰ ਤੋਂ 30 ਸਤੰਬਰ ਤਕ ਚੱਲਦਾ ਹੈ। ਇਸ ਦੇ ਲਈ ਚੀਨੀ ਮਿੱਲ ਮਾਲਕ ਕਿਸਾਨਾਂ ਤੋਂ ਜਿਸ ਭਾਅ ‘ਤੇ ਗੰਨਾ ਖਰਦੀਦੇ ਹਨ ਉਸੇ ਨੂੰ ਖ਼ਰੀਦ ਮੁੱਲ (FRP) ਕਿਹਾ ਜਾਂਦਾ ਹੈ। ਪਿਛਲੇ ਸਾਲ ਗੰਨੇ ਦੇ ਖਰੀਦ ਮੁੱਲ ‘ਚ ਕੋਈ ਇਜ਼ਾਫ਼ਾ ਨਹੀਂ ਕੀਤਾ ਗਿਆ ਸੀ, ਜਿਸ ਨੂੰ ਲੈ ਕੇ ਗੰਨਾ ਕਿਸਾਨਾਂ ‘ਚ ਨਰਾਜ਼ਗੀ ਸੀ। ਸਰਕਾਰ ਨੇ 2018-19 “ਚ ਜੋ FRP ਸੀ, ਉਸੇ ਨੂੰ ਹੀ 2019-20 ਲਈ ਬਰਕਰਾਰ ਰੱਖਿਆ ਸੀ। ਅਸਲੀਅਤ ਇਹ ਹੈ ਕਿ ਗੰਨਾ ਕਿਸਾਨਾਂ ਦੇ 20 ਹਜ਼ਾਰ ਕਰੋੜ ਰੁਪਏ ਚੀਨੀ ਮਿੱਲਾਂ ਵੱਲ ਬਕਾਇਆ ਖੜ੍ਹੇ ਹਨ। ਇਸ ਦੇ ਮੱਦੇਨਜ਼ਰ FRP ਵਧਾਉਣ ਦਾ ਕਿਸਾਨਾਂ ਨੂੰ ਕਿੰਨਾ ਅਤੇ ਕਦੋਂ ਲਾਭ ਮਿਲੇਗਾ, ਇਹ ਦੇਖਣ ਵਾਲੀ ਗੱਲ ਹੋਵੇਗੀ। ਹੁਣ ਗੰਨੇ ਦਾ ਖਰੀਦ ਮੁੱਲ 285 ਰੁਪਏ ਪ੍ਰਤੀ ਕੁਇੰਟਲ ਹੋ ਗਿਆ ਹੈ।ਦੇਸ਼ ਵਿਚ FRP ਤੋਂ ਇਲਾਵਾ ਸੂਬਾ ਸਰਕਾਰਾਂ ਵੀ ਆਪਣੇ ਪੱਧਰ ‘ਤੇ ਕਿਸਾਨਾਂ ਲਈ ਗੰਨੇ ਦਾ ਖਰੀਦ ਮੁੱਲ ਤੈਅ ਕਰਦੀਆਂ ਹਨ।