ਬਠਿੰਡਾ, 4 ਅਗਸਤ (ਰਾਮ ਸਿੰਘ ਗਿੱਲ) – ਬਠਿੰਡਾ ਦੇ ਨਵੇਂ ਐਸਐਸਪੀ ਭੁਪਿੰਦਰਜੀਤ ਸਿੰਘ ਵਿਰਕ, ਜਿਨ੍ਹਾਂ ਨੇ ਸ਼ੁੱਕਰਵਾਰ ਨੂੰ ਚਾਰਜ ਸੰਭਾਲਦਿਆਂ ਹੀ ਗੈਰ ਅਨਸਰਾਂ ਤੇ ਸਖਤ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ। ਵੱਖ ਵੱਖ ਥਾਵਾਂ ਤੇ ਰੇਡਾਂ ਕਰਵਾ ਕੇ ਸੋਮਵਾਰ ਤੱਕ ਕੋਈ 31 ਮੁਕੱਦਮੇ ਦਰਜ ਕਰਕੇ 27 ਦੋਸ਼ੀਆਂ ਨੂੰ ਗ੍ਰਿਫਤਾਰ ਕੀਤਾ । ਜਿਨ੍ਹਾਂ ਪਾਸੋਂ ਹੱਥਕੱਢੀ ਸ਼ਰਾਬ, ਗੈਰ ਕਾਨੂੰਨੀ ਅੰਗਰੇਜ਼ੀ ਸ਼ਰਾਬ, ਲਾਹਣ ਤੋਂ ਇਲਾਵਾ ਕੋਈ ਸਾਢੇ 18 ਕਿਲੋ ਸੁੱਖਾ ਵੀ ਬਰਾਮਦ ਕੀਤਾ । ਉਥੇ ਹੀ ਐਨਡੀਪੀਐਸ ਐਕਟ ਦੇ ਸਮਗਲਰਾਂ ਖਿਲਾਫ਼ ਕਾਰਵਾਈ ਕਰਦੇ ਹੋਏ 7 ਮੁੱਕਦਮੇ ਦਰਜ ਕਰਕੇ 12 ਦੋਸ਼ੀਆਂ ਨੂੰ ਗ੍ਰਿਫਤਾਰ ਕੀਤਾ ਗਿਆ ਹੈ, ਜਿਨ੍ਹਾਂ ਕੋਲੋਂ ਡੇਢ ਕਿਲੋ ਅਫੀਮ, 5 ਕਿਲੋ ਭੁੱਕੀ ਤੇ ਕੋਈ 15000 ਨਸ਼ੀਲੀਆਂ ਗੋਲੀਆਂ ਤੇ ਕੈਪਸੂਲ ਬਰਾਮਦ ਕੀਤੇ ਹਨ। ਐਸਐਸ ਪੀ ਨੇ ਰੇਡੀਓ ਪੰਜਾਬ ਟੁਡੇ ਨਾਲ ਗੱਲਬਾਤ ਕਰਦੇ ਹੋਏ ਦੱਸਿਆ ਕਿ ਡਿਊਟੀ ਵਿੱਚ ਕੋਤਾਹੀ ਕਰਨ ਅਤੇ ਸਹੀ ਜਾਣਕਾਰੀ ਨਾ ਦੇਣ ਦੇ ਦੋਸ਼ਾਂ ਹੇਠ 2 ਥਾਣੇਦਾਰਾਂ ਨੂੰ ਵੀ ਮੁੱਅਤਲ ਕਰ ਦਿੱਤਾ ਗਿਆ ਹੈ ‘ਤੇ ਵਿਭਾਗੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ ।
ਦੱਸਣਾ ਬਣਦਾ ਹੈ ਕਿ ਭੁਪਿੰਦਰਜੀਤ ਸਿੰਘ ਵਿਰਕ ਜੋ 1980 ਬੈਚ ਦੇ ਪੁਲਿਸ ਅਧਿਕਾਰੀ ਹਨ, ਦੀ ਬਠਿੰਡਾ ਜਿਲੇ ਵਿੱਚ ਇਹ ਪਹਿਲੀ ਤਾਇਨਾਤੀ ਹੈ ।