ਸਵੈ-ਰੁਜ਼ਗਾਰ ਲਈ ਬੈਂਕ ਲੋਨ ਦਾ ਅਰਜੀਦਾਤਾ ਹੁਣ ਨਹੀਂ ਹੋਵੇਗਾ ਇੱਕਲਾ, ਵਿਭਾਗ ਬੈਂਕ ਵਿਚ ਲੋਨ ਕੇਸਾਂ ਦੀ ਕਰਨਗੇ ਪੈਰਵਾਈ

ਫਾਜ਼ਿਲਕਾ, 31 ਜੁਲਾਈ(ਸੁਰਿੰਦਰਜੀਤ ਸਿੰਘ) – ਜ਼ਿਲੇ ਦੇ ਡਿਪਟੀ ਕਮਿਸ਼ਨਰ ਸ. ਅਰਵਿੰਦ ਪਾਲ ਸਿੰਘ ਸੰਧੂ ਨੇ ਅੱਜ ਇਥੇ ਪੰਜਾਬ ਸਰਕਾਰ ਦੇ ਘਰ-ਘਰ ਰੋਜ਼ਗਾਰ ਪ੍ਰੋਗਰਾਮ ਤਹਿਤ ਰੋਜਗਾਰ ਸਿਰਜਣ ਨਾਲ ਜੁੜੇ ਵਿਭਾਗਾ ਅਤੇ ਬੈਂਕਾਂ ਨਾਲ ਬੈਠਕ ਦੌਰਾਨ ਸਾਰੀਆਂ ਧੀਰਾਂ ਨੂੰ ਹਦਾਇਤ ਕੀਤੀ ਕਿ ਸਵੈ ਰੋਜ਼ਗਾਰ ਲਈ ਕਰਜ ਲੈਣ ਲਈ ਆਈਆਂ ਅਰਜੀਆਂ ਦਾ ਸਮਾਂਬੱਧ ਨਿਪਟਾਰਾ ਕੀਤਾ ਜਾਵੇ।
ਡਿਪਟੀ ਕਮਿਸ਼ਨਰ ਨੇ ਕਿਹਾ ਕਿ ਸਵੈ ਰੋਜ਼ਗਾਰ ਲਈ ਲੋਨ ਲੈਣ ਦੇ ਇਛੁੱਕ ਸਾਡੇ ਨੌਜਵਾਨ ਉਦਮੀ ਇਕਲੇ ਨਹੀਂ ਹੋਣਗੇ ਬਲਕਿ ਉਨਾਂ ਦਾ ਕੇਸ ਸਪਾਂਸਰ ਕਰਨ ਵਾਲੇ ਵਿਭਾਗ ਬੈਂਕ ਵਿਚ ਉਨਾਂ ਦੇ ਕੇਸ ਦੀ ਪੈਰਵਾਈ ਕਰਨਗੇ। ਉਨਾਂ ਨੇ ਬੈਂਕਾਂ ਨੂੰ ਹਦਾਇਤ ਕੀਤੀ ਕਿ ਸਾਰੇ ਬਕਾਇਆ ਪਏ ਅਜਿਹੇ ਕੇਸਾਂ ਦਾ ਤੁਰੰਤ ਨਿਪਟਾਰਾ ਕੀਤਾ ਜਾਵੇ। ਉਨਾਂ ਚੇਤਾਵਨੀ ਦਿੱਤੀ ਕਿ ਜੇਕਰ ਕਿਸੇ ਬੈਂਕ ਨੇ ਬਿਨਾਂ ਯੋਗ ਕਾਰਨ ਦੇ ਅਰਜੀ ਰਦ ਕੀਤੀ ਤਾਂ ਸਬੰਧਤ ਖਿਲਾਫ ਭਾਰਤੀ ਰਿਜਰਵ ਬੈਂਕ ਨੂੰ ਲਿੱਖ ਦਿੱਤਾ ਜਾਵੇਗਾ।
ਉਨਾਂ ਨੇ ਸਾਰੇ ਵਿਭਾਗਾਂ ਤੇ ਬੈਂਕਾਂ ਨੂੰ ਇਸ ਤਰਾਂ ਦੇ ਕੇਸਾਂ ਲਈ ਬਿਹਤਰ ਤਾਲਮੇਲ ਕਰਨ ਲਈ ਆਪੋ-ਆਪਣਾ ਨੋਡਲ ਅਫਸਰ ਤਾਇਨਾਤ ਕਰਨ ਦੇ ਹੁਕਮ ਦਿੱਤੇ। ਉਨਾਂ ਸਾਰੇ ਵਿਭਾਗਾਂ ਨੂੰ ਕਿਹਾ ਕਿ ਉਹ ਸਰਕਾਰ ਦੀਆਂ ਵੱਖ-ਵੱਖ ਸਕੀਮਾਂ ਤਹਿਤ ਰੋਜਗਾਰ ਦੇ ਮੌਕਿਆਂ ਦੀ ਸਿਰਜਣਾ ਕਰਕੇ ਨੌਜਵਾਨਾਂ ਨੂੰ ਰੋਜ਼ਗਾਰ ਦਿਵਾਉਣ।
ਉਨਾਂ ਨੇ ਦੱਸਿਆ ਕਿ ਸਤੰਬਰ ਮਹੀਨੇ ਦੌਰਾਨ ਮੈਗਾ ਰੋਜਗਾਰ ਮੇਲੇ ਦਾ ਆਯੋਜਨ ਵੀ ਕੀਤਾ ਜਾਵੇਗਾ। ਇਸ ਲਈ ਨੌਜਵਾਨ ਜਿਲਾ ਰੋਗਜਾਰ ਤੇ ਕਾਰੋਬਾਰ ਬਿਊਰੋ ਫਾਜ਼ਿਲਕਾ ਨਾਲ ਫੋਨ ਨੰਬਰ 89060-22220 ਤੇ ਕਾਲ ਕਰਕੇ ਸਲਾਹ ਲੈ ਸਕਦੇ ਹਨ ਜਾਂ .71.3 ਤੇ ਆਪਣੀ ਰਜਿਸਟਰੇਸ਼ਨ ਕਰਵਾ ਸਕਦੇ ਹਨ।
ਇਸ ਮੌਕੇ ਵਧੀਕ ਡਿਪਟੀ ਕਮਿਸ਼ਨਰ (ਜ) ਅਭਿਜੀਤ ਕਪਲਿਸ਼, ਵਧੀਕ ਡਿਪਟੀ ਕਮਿਸ਼ਨਰ (ਵਿ) ਨਵਲ ਰਾਮ, ਸਹਾਇਕ ਕਮਿਸ਼ਨਰ ਕੰਵਰਜੀਤ ਸਿੰਘ, ਜ਼ਿਲਾ ਵਿਕਾਸ ਤੇ ਪੰਚਾਇਤ ਅਫਸਰ ਸ ਸੁਖਪਾਲ ਸਿੰਘ, ਲੀਡ ਬੈਂਕ ਮੈਨੇਜਰ ਕੁਲਦੀਪ ਕੁਮਾਰ ਮੌਜੂਦ ਸਨ।