ਜਲੰਧਰ, 30 ਜੂਨ – ਫੋਕਲ ਪੁਆਇੰਟ ਚੌਕ ਕੋਲ ਸੈਨਾ ਦੀ ਜਿਪਸੀ ਅਤੇ ਸਵਿਫਟ ਕਾਰ ਵਿਚ ਟੱਕਰ ਹੋ ਗਈ। ਦੁਰਘਟਨਾ ਵਿਚ ਜਿਪਸੀ ’ਤੇ ਸਵਾਰ ਲੈਫਟੀਨੈਂਟ ਕਰਨਲ ਇੰਦਰਜੀਤ ਸਿੰਘ ਜ਼ਖ਼ਮੀ ਹੋ ਗਿਆ ਅਤੇ ਉਨ੍ਹਾਂ ਦਾ ਡਰਾਈਵਰ ਕੁਲਵੰਤ ਵੀ ਮਾਮੂਲੀ ਜ਼ਖ਼ਮੀ ਹੋਇਆ ਹੈ। ਸਵਿਫਟ ਕਾਰ ਵਿਚ ਸਵਾਰ ਪਰਿਵਾਰ ਵਾਲ ਵਾਲ ਬਚ ਗਿਆ।
ਦੁਰਘਟਨਾ ਤੋਂ ਬਾਅਦ ਦੋਵੇਂ ਚਾਲਕਾਂ ਨੇ ਇਕ ਦੂਜੇ ’ਤੇ ਦੁਰਘਟਨਾ ਦੇ ਦੋਸ਼ ਆਏ ਅਤੇ ਇਸ ਦੌਰਾਨ ਖੂਬ ਹੰਗਾਮਾ ਕੀਤਾ। ਚੌਕ ਕੋਲ ਦੁਰਘਟਨਾ ਹੋਣ ਕਾਰਨ ਲੰਬਾ ਜਾਮ ਲੱਗ ਗਿਆ। ਸੂਚਨਾ ਮਿਲਦੇ ਹੀ ਥਾਣਾ ਡਿਵੀਜ਼ਨ ਨੰਬਰ ਇਕ ਦੀ ਪੁਲਿਸ ਅਤੇ ਟਰੈਫਿਕ ਪੁਲਿਸ ਨੇ ਦੋਵੇਂ ਵਾਹਨਾਂ ਨੂੰ ਸਾਈਡ ’ਤੇ ਕਰਕੇ ਜਾਮ ਖੁਲ੍ਹਵਾਇਆ।
ਜਿਪਸੀ ਸਵਾਰ ਲੈਫਟੀਨੈਂਟ ਕਰਨਲ ਇੰਦਰਜੀਤ ਸਿੰਘ ਨੇ ਦੱਸਿਆ ਕਿ ਉਹ ਅੰਮ੍ਰਿਤਸਰ ਦੇ ਰਹਿਣ ਵਾਲੇ ਹਨ ਅਤੇ ਸੋਮਵਾਰ ਨੂੰ ਉਨ੍ਹਾਂ ਦੀ ਡਿਊਟੀ ਜਲੰਧਰ ਵਿਚ ਸੀ।
ਮੰਗਲਵਾਰ ਦੁਪਹਿਰ ਨੂੰ ਘਰ ਵਾਪਸ ਜਾ ਰਹੇ ਸਨ। ਫੋਕਲ ਪੁਆਇੰਟ ਚੌਕ ’ਤੇ ਪਹੁੰਚੇ ਤਾਂ ਇਸ ਦੌਰਾਨ ਪਿਛੋਂ ਆ ਰਹੀ ਸਵਿਫਟ ਕਾਰਨ ਨੇ ਉਨ੍ਹਾਂ ਵਿਚ ਟੱਕਰ ਮਾਰ ਦਿੱਤੀ। ਗੱਡੀ ਬੇਕਾਬੂ ਹੋ ਕੇ ਖੰਭੇ ਨਾਲ ਟਕਰਾ ਗਈ। ਉਥੇ ਕਾਰ ਸਵਾਰ ਅੰਮ੍ਰਿਤਸਰ ਵਾਸੀ ਅੰਮ੍ਰਿਤਪਾਲ ਨੇ ਦੱਸਿਆ ਕਿ ਉਹ ਨਵਾਂਸ਼ਹਿਰ ਆਪਣੇ ਪਰਿਵਾਰ ਨਾਲ ਗਏ ਹੋਏ ਸੀ ਘਰ ਵਾਪਸ ਜਾ ਰਹੇ ਸਨ ਕਿ ਫੋਕਲ ਪੁਆਇੰਟ ਚੌਕ ਕੋਲ ਪਹੁੰਚੇ ਤਾਂ ਜਿਪਸੀ ਨੇ ਇਕਦਮ ਬ੍ਰੇਕ ਲਾ ਦਿੱਤੀ, ਜਿਸ ਕਾਰਨ ਉਸ ਦੀ ਗੱਡੀ ਜਿਪਸੀ ਨਾਲ ਟਕਰਾ ਗਈ। ਪੁਲਿਸ ਦੋਵੇਂ ਵਾਹਨਾਂ ਨੂੰ ਥਾਣੇ ਲੈ ਗਈ ਅਤੇ ਜਾਂਚ ਸ਼ੁਰੂ ਕਰ ਦਿੱਤੀ।