ਫਿਰੋਜ਼ਪੁਰ : ਹਥਿਆਰਾਂ ਦੀ ਨੋਕ ‘ਤੇ ਸਕਿਉਰਿਟੀ ਗਾਰਡ ਤੋਂ 12 ਬੋਰ ਦੀ ਬੰਦੂਕ ਖੋਹੀ

ਫਿਰੋਜ਼ਪੁਰ 26 ਜੂਨ (ਗੁਰਦਰਸ਼ਨ ਸਿੰਘ ਸੰਧੂ ) – ਫਿਰੋਜ਼ਪੁਰ ਦੇ ਕਸਬਾ ਤਲਵੰਡੀ ਭਾਈ ਦੇ ਪਿੰਡ ਹਰਾਜ ਤੋਂ ਸੁਲਹਾਣੀ ਰੋਡ ‘ਤੇ ਇਕ ਪ੍ਰਾਈਵੇਟ ਬੈਂਕ ਦੇ ਸਕਿਉਰਿਟੀ ਗਾਰਡ ਤੋਂ ਹਥਿਆਰਾਂ ਦੀ ਨੋਕ ‘ਤੇ ਮੋਟਰਸਾਈਕਲ ਸਵਾਰ 3 ਜਣਿਆਂ ਵੱਲੋਂ 12 ਬੋਰ ਦੀ ਬੰਦੂਕ ਹੋਣ ਦੀ ਖਬਰ ਮਿਲੀ ਹੈ। ਜਾਣਕਾਰੀ ਦਿੰਦੇ ਹੋਏ ਹਰਪ੍ਰੀਤ ਸਿੰਘ ਪੁੱਤਰ ਨਿਰਭੈ ਸਿੰਘ ਵਾਸੀ ਸੁਲਹਾਣੀ ਨੇ ਦੱਸਿਆ ਕਿ ਉਹ ਪਾਲ ਮਰਚੈਂਟ ਬੈਂਕ ਵਿਚ ਬਤੌਰ ਸਕਿਉਰਿਟੀ ਗਾਰਡ ਦੀਆ ਸੇਵਾਵਾਂ ਦੇ ਰਿਹਾ ਹੈ। ਅੱਜ ਉਹ ਤਲਵੰਡੀ ਭਾਈ ਬੈਂਕ ‘ਚੋਂ ਡਿਊਟੀ ਕਰਕੇ ਵਾਪਸ ਆਪਣੇ ਪਿੰਡ ਸੁਲਹਾਣੀ ਨੂੰ ਜਾ ਰਿਹਾ ਸੀ ਕਿ ਪਿੰਡ ਹਰਾਜ ਦੇ ਸ਼ੈਲਰ ਨੇੜੇ ਮੋਟਰਸਾਈਕਲ ਸਵਾਰ 3 ਜਣਿਆਂ ਨੇ ਉਸ ਨੂੰ ਰੁਕਣ ਦਾ ਇਸ਼ਾਰਾ ਕੀਤਾ। ਜਦੋਂ ਉਸ ਨੇ ਮੋਟਰਸਾਈਕਲ ਰੋਕਿਆ ਤਾਂ ਇਹ ਤਿੰਨੇ ਜਾਣੇ ਜੋ ਪਿਸਤੌਲ ਅਤੇ ਡਾਂਗਾ ਨਾਲ ਲੈੱਸ ਸਨ, ਉਸ ‘ਤੇ ਹਮਲਾ ਕਰਨ ਲੱਗੇ, ਇਸ ਦੌਰਾਨ ਕੁਝ ਸਮੇਂ ਲਈ ਹੱਥੋਂਪਾਈ ਵੀ ਹੋਈ, ਜਦੋਂ ਉਸ ਨੇ ਬੰਦੂਕ ਨਾ ਛੱਡੀ ਤਾਂ ਇਕ ਵਿਅਕਤੀ ਨੇ ਪਿਸਤੌਲ ਉਸ ‘ਤੇ ਤਾਣ ਲਈ ਅਤੇ ਬੰਦੂਕ ਖੋਹ ਕੇ ਉਥੋਂ ਫਰਾਰ ਹੋ ਗਏ। ਪੀੜਤ ਘਟਨਾ ਦੀ ਇਤਲਾਹ ਸਥਾਨਕ ਪੁਲਿਸ ਨੂੰ ਦਿੱਤੀ ਹੈ। ਪੁਲਿਸ ਦੇ ਐੱਸਐੱਚਓ ਹਰਦੇਵਪ੍ਰੀਤ ਸਿੰਘ ਨੇ ਸਮੇਤ ਪੁਲਿਸ ਪਾਰਟੀ ਘਟਨਾ ਵਾਲੀ ਜਗ੍ਹਾ ‘ਤੇ ਪਹੁੰਚ ਕੇ ਲੁਟੇਰਿਆਂ ਦੀ ਭਾਲ ਸ਼ੁਰੂ ਕਰ ਦਿੱਤੀ ਹੈ।