ਫਿਰੋਜ਼ਪੁਰ 22 ਜੂਨ (ਗੁਰਦਰਸ਼ਨ ਸਿੰਘ ਸੰਧੂ) – ਫਿਰੋਜ਼ਪੁਰ ਦੇ ਪਿੰਡ ਦਰਬਾਰ ਸਿੰਘ ਵਾਲਾ ਵਿਖੇ ਖਾਲ ਢਾਹੁਣ ਦੇ ਸਬੰਧ ਵਿਚ ਮੌਕੇ ਤੇ ਪਹੁੰਚੇ ਏਐੱਸਆਈ ਅਤੇ ਸਿਪਾਹੀ ਦੀ ਕੁੱਟਮਾਰ ਕਰਨ ਅਤੇ ਝਪਟ ਮਾਰ ਕੇ ਮੋਬਾਇਲ ਫੋਨ ਖੋਹਣ ਦੇ ਦੋਸ਼ ਵਿਚ ਥਾਣਾ ਗੁਰੂਹਰਸਹਾਏ ਦੀ ਪੁਲਿਸ ਨੇ 7 ਲੋਕਾਂ ਖਿਲਾਫ 353, 186, 332, 323, 379-ਬੀ, 148, 149 ਆਈਪੀਸੀ ਤਹਿਤ ਮਾਮਲਾ ਦਰਜ ਕਰਕੇ ਤਿੰਨ ਲੋਕਾਂ ਨੂੰ ਗ੍ਰਿਫਤਾਰ ਕੀਤਾ ਹੈ। ਪੁਲਿਸ ਨੂੰ ਦਿੱਤੇ ਬਿਆਨਾਂ ਵਿਚ ਏਐੱਸਆਈ ਗੁਰਚਰਨ ਸਿੰਘ ਸਮੇਤ ਸਿਪਾਹੀ ਅਰਪਨਪ੍ਰੀਤ ਸਿੰਘ ਦਰਖਾਸਤ ਨੰਬਰ 1215 ਲੋਕਲ ਵੱਲੋਂ ਜਗਦੀਸ਼ ਸਿੰਘ ਪੁੱਤਰ ਕੇਹਰ ਸਿੰਘ ਵਾਸੀ ਝੁੱਗੇ ਦਰਬਾਰਾ ਸਿੰਘ ਵਾਲਾ ਬਰਖਿਲਾਫ ਜਰਨੈਲ ਸਿੰਘ ਵਗੈਰਾ ਬਾਬਤ ਖਾਲ ਢਾਹਣ ਸਬੰਧੀ ਸਮੇਤ ਅਵਿਨਾਸ਼ ਸਿੰਘ ਪੁੱਤਰ ਕੇਹਰ ਸਿੰਘ ਵਾਸੀ ਦਰਬਾਰਾ ਸਿੰਘ ਵਾਲਾ ਨੂੰ ਹਮਰਾਹ ਲੈ ਕੇ ਮੌਕੇ ‘ਤੇ ਪੁੱਜਾ ਤਾਂ ਦੋਸ਼ੀਅਨ ਕਸ਼ਮੀਰ ਸਿੰਘ ਪੁੱਤਰ ਕਰਤਾਰ ਸਿੰਘ, ਜਰਨੈਲ ਸਿੰਘ ਫੌਜ਼ੀ, ਹਰਮੇਸ਼ ਸਿੰਘ, ਮਨਜੀਤ ਸਿੰਘ, ਗੁਰਵਿੰਦਰ ਸਿੰਘ ਪੁੱਤਰ ਕਸ਼ਮੀਰ ਸਿੰਘ, ਸੁਰਜੀਤ ਕੌਰ ਪਤਨੀ ਕਸ਼ਮੀਰ ਸਿੰਘ, ਸ਼ਿੰਦਰ ਕੌਰ ਉਰਫ ਜਿੰਦੋ ਪਤਨੀ ਹਰਮੇਸ਼ ਸਿੰਘ ਵਾਸੀਅਨ ਦਰਬਾਰਾ ਸਿੰਘ ਵਾਲਾ ਨੇ ਹਮਮਸ਼ਵਰਾ ਹੋ ਕੇ ਮੁੱਸਲਾ ਹੋ ਕੇ ਉਸ ਦੇ ਅਤੇ ਸਿਪਾਹੀ ਅਰਪਨਪ੍ਰੀਤ ਸਿੰਘ ਦੇ ਸੱਟਾਂ ਮਾਰੀਆਂ ਤੇ ਝਪਟ ਮਾਰ ਕੇ ਮੋਬਾਇਲ ਫੋਨ ਖੋਹ ਲਿਆ ਤੇ ਕੁੱਟਮਾਰ ਕੀਤੀ। ਗੁਰਚਰਨ ਸਿੰਘ ਨੇ ਦੱਸਿਆ ਕਿ ਜਦ ਅਵਿਨਾਸ਼ ਸਿੰਘ ਉਕਤ ਛੁਡਾਉਣ ਲੱਗਾ ਤਾਂ ਉਸ ਦੇ ਵੀ ਸੱਟਾਂ ਮਾਰੀਆਂ। ਇਨ੍ਹਾਂ ਵੱਲੋਂ ਰੌਲਾ ਪਾਉਣ ਤੇ ਆਸ ਪਾਸ ਦੇ ਲੋਕਾਂ ਦਾ ਇਕੱਠ ਹੁੰਦਾ ਵੇਖ ਦੋਸ਼ੀਅਨ ਮੌਕੇ ਤੋਂ ਫਰਾਰ ਹੋ ਗਏ ਤੇ ਜਾਂਦੇ ਸਮੇਂ ਅਵਿਨਾਸ਼ ਸਿੰਘ ਦੇ ਗਲ ਪਾਈ ਸੋਨੇ ਦੀ ਚੈਨ ਝਪਟ ਮਾਰ ਕਰੇ ਖੋਹ ਕੇ ਲੈ ਗਏ। ਗੁਰਚਰਨ ਸਿੰਘ ਨੇ ਦੱਸਿਆ ਕਿ ਉਸ ਦਾ ਅਤੇ ਸਿਪਾਹੀ ਅਰਮਨਪ੍ਰੀਤ ਸਿੰਘ ਤੇ ਅਵਿਨਾਸ਼ ਸਿੰਘ ਦਾ ਇਲਾਜ ਸਿਵਲ ਹਸਪਤਾਲ ਗੁਰੂਹਰਸਹਾਏ ਵਿਖੇ ਚੱਲ ਰਿਹਾ ਹੈ। ਇਸ ਮਾਮਲੇ ਦੀ ਜਾਂਚ ਕਰ ਰਹੇ ਏਐੱਸਆਈ ਦਰਸ਼ਨ ਸਿੰਘ ਨੇ ਦੱਸਿਆ ਕਿ ਪੁਲਿਸ ਨੇ ਸ਼ਿਕਾਇਤਕਰਤਾ ਦੇ ਬਿਆਨਾਂ ‘ਤੇ ਦੋਸ਼ੀਆਂ ਖਿਲਾਫ ਮਾਮਲਾ ਦਰਜ ਕਰਕੇ ਦੋਸ਼ੀ ਕਸ਼ਮੀਰ ਸਿੰਘ, ਸਿੰਦਰ ਕੌਰ ਅਤੇ ਸੁਰਜੀਤ ਕੌਰ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ ਹੈ।