ਨਵੀਂ ਦਿੱਲੀ, 22 ਜੂਨ – ਦਿੱਲੀ ਸਕੱਤਰੇਤ ‘ਚ 13 ਮੁਲਾਜ਼ਮਾਂ ਦੀ ਕੋਰੋਨਾ ਜਾਂਚ ਰਿਪੋਰਟ ਪਾਜ਼ਿਟਿਵ ਆਈ ਹੈ। ਇਨ੍ਹਾਂ ਵਿਚੋਂ ਕਿਸੇ ਨੂੰ ਕੋਈ ਪਰੇਸ਼ਾਨੀ ਨਹੀਂ ਸੀ ਤੇ ਨਾ ਹੀ ਕੋਰੋਨਾ ਦੇ ਲੱਛਣ ਹੀ ਦਿਖਾਈ ਦਿੱਤੇ ਸਨ। ਪਾਜ਼ੇਟਿਵ ਮਿਲੇ ਮੁਲਾਜ਼ਮਾਂ ‘ਚੋਂ ਦੋ ਸਿਹਤ ਮੰਤਰੀ ਸਤੇਂਦਰ ਜੈਨ ਦੇ ਦਫ਼ਤਰ ਦੇ ਹਨ।
ਕਾਬਿਲੇਗ਼ੌਰ ਹੈ ਕਿ ਦਿੱਲੀ ਦੇ ਸਿਹਤ ਮੰਤਰੀ ਸਤੇਂਦਰ ਜੈਨ ਦੇ ਕੋਰੋਨਾ ਪਾਜ਼ੇਟਿਵ ਆਉਣ ਤੋਂ ਬਾਅਦ ਸ਼ੁੱਕਰਵਾਰ ਨੂੰ ਸਕੱਤਰੇਤ ‘ਚ ਕਰੀਬ 100 ਲੋਕਾਂ ਦੀ ਕੋਰੋਨਾ ਜਾਂਚ ਕੀਤੀ ਗਈ ਸੀ। ਰਿਪੋਰਟ ‘ਚ 13 ਮੁਲਾਜ਼ਮ ਪਾਜ਼ੇਟਿਵ ਨਿਕਲੇ ਹਨ। ਇਨ੍ਹਾਂ ਸਾਰਿਆਂ ਨੂੰ ਹੋਮ ਕੁਆਰੰਟਾਈਨ ਕਰ ਦਿੱਤਾ ਗਿਆ ਹੈ।
ਸਤੇਂਦਰ ਜੈਨ ਦੇ ਇਕ ਨਿੱਜੀ ਸਕੱਤਰ ਸਮੇਤ ਉਨ੍ਹਾਂ ਦੇ ਦਫ਼ਤਰ ਨਾਲ ਸਬੰਧਤ 4 ਲੋਕ ਪਹਿਲਾਂ ਹੀ ਪਾਜ਼ੇਟਿਵ ਮਿਲ ਚੁੱਕੇ ਹਨ। ਉਸ ਵੇਲੇ ਸਤੇਂਦਰ ਜੈਨ ਨੇ ਵੀ ਆਪਣੀ ਜਾਂਚ ਕਰਵਾਈ ਸੀ, ਪਰ ਉਹ ਨੈਗੇਟਿਵ ਆਏ ਸਨ। ਸਕੱਤਰੇਤ ‘ਚ ਆਮ ਪ੍ਰਸ਼ਾਸਨ ਵਿਭਾਗ ਦੇ ਵੀ ਤਿੰਨ ਮੁਲਾਜ਼ਮ ਕੋਰੋਨਾ ਪਾਜ਼ੇਟਿਵ ਆ ਚੁੱਕੇ ਹਨ।
