ਸ਼ਾਹਕੋਟ ਤਹਿਸੀਲ ਦੇ ਪਿੰਡ ਦਾਨੇਵਾਲ ਦਾ ਇੱਕ ਨੌਜਵਾਨ ਦਬਈ ਦੀ ਕੇਂਦਰੀ ਜੇਲ੍ਹ ਵਿੱਚ ਬੰਦ ਹੈ । ਨੌਜਵਾਨ ਪਰਵਿੰਦਰ ਸਿੰਘ ਦੇ ਪਿਤਾ ਨੇ ਜਾਣਕਾਰੀ ਦਿੰਦਿਆ ਹੋਇਆ ਦੱਸਿਆ ਕਿ ਉਹਨਾਂ ਦਾ ਲੜਕਾ ਰੋਜ਼ੀ ਰੋਟੀ ਕਮਾਉਣ ਦੇ ਲਈ 2006 ‘ਚ ਦਬਈ ਗਿਆ ਸੀ । ਜਿੰਨੀ ਵੀ ਜਾਣਕਾਰੀ ਉਹਨਾਂ ਨੂੰ ਮਿਲੀ ਹੈ , ਉਸ ਮੁਤਾਬਿਕ ਕੰਪਨੀ ਵਲੋਂ ਦਿੱਤੀ ਰਿਹਾਇਸ਼ ਵਿੱਚ ਪੰਜਾਬ ਤੋਂ ਗਏ ਹੋਰ ਵੀ ਮੁੰਡੇ ਰਹਿੰਦੇ ਸਨ ਅਤੇ ਉਹਨਾਂ ਦਾ ਹੋਰ ਮੁੰਡਿਆ ਨਾਲ ਝਗੜਾ ਹੋ ਗਿਆ , ਜਿਸ ਵਿੱਚ ਇੱਕ ਬੰਦਾ ਮਾਰਿਆ ਗਿਆ ਸੀ । ਉਨ੍ਹਾਂ ਦਾ ਲੜਕਾ 16 ਹੋਰ ਪੰਜਾਬੀਆ ਨਾਲ ਦਬਈ ਪੁਲਿਸ ਵਲੋਂ ਗ੍ਰਿਫਤਾਰ ਕਰ ਲਿਆ ਗਿਆ ਸੀ ਅਤੇ ਸਜਾ ਸੁਣਾਉਣ ਮਗਰੋਂ ਦਬਈ ਦੀ ਜੇਲ੍ਹ ਵਿੱਚ ਬੰਦ ਕਰ ਦਿੱਤਾ ਗਿਆ ਸੀ । ਲੜਕੇ ਦੇ ਪਿਤਾ ਸ਼ਿੰਦਾ ਸਿੰਘ ਨੇ ਦੱਸਿਆ ਕਿ ਬਾਕੀ ਮੁੰਡੇ ਕਿਵੇਂ ਨਾ ਕਿਵੇਂ ਕਰ ਕੇ ਵਾਪਿਸ ਪੰਜਾਬ ਆ ਗਏ ਹਨ , ਪਰ ਉਹਨਾਂ ਦਾ ਲੜਕਾ ਅਜੇ ਵੀ ਜੇਲ੍ਹ ਵਿੱਚ ਬੰਦ ਹੈ । ਪਰਿਵਾਰ ਵਲੋਂ ‘ਸਰਬੱਤ ਦਾ ਭਲਾ ‘ ਟਰੱਸਟ ਦੇ ਮੁੱਖੀ ਐੱਸ ਉਬਰਾਏ ਅਤੇ ਸਰਕਾਰ ਨੂੰ ਗੁਹਾਰ ਲਈ ਹੈ ਕਿ ਜਿਵੇ ਕਿਵੇਂ ਵੀ ਉਹਨਾਂ ਦਾ ਪੁੱਤਰ ਵਾਪਿਸ ਮੰਗਵਾਇਆ ਜਾਵੇ ।
ਉਹਨਾਂ ਨੇ ਅੱਗੇ ਕਿਹਾ ਕਿ ਪਰਿਵਾਰ ਪਹਿਲਾਂ ਹੀ ਗਰੀਬੀ ਦੀ ਮਾਰ ਝੱਲ ਰਿਹਾ ਹੈ ਅਤੇ ਦਬਈ ਵਿੱਚਲੇ ਅਦਾਲਤਾਂ ਦੇ ਖਰਚੇ ਉਹਨਾਂ ਲਈ ਸਹਿਣੇ ਮੁਸ਼ਕਿਲ ਨੇ । ਇੱਕ ਸਵਾਲ ਦਾ ਜਵਾਬ ਦਿੰਦਿਆ ਲੜਕੇ ਦੇ ਬਾਪ ਨੇ ਦੱਸਿਆ ਕਿ ਉਹਨਾਂ ਨੂੰ ਇਹ ਨਹੀ ਪਤਾ ਕਿ ਉਹ ਕਿਹੜੇ 16 ਨੌਜਵਾਨ ਪੰਜਾਬੀ ਹਨ , ਜੋ ਉਹਨਾਂ ਦੇ ਲੜਕੇ ਨਾਲ ਜੇਲ੍ਹ ਵਿੱਚ ਬੰਦ ਸਨ । ਨਾ ਹੀ ਉਹਨਾਂ ਨੂੰ ਪਤਾ ਕਿ ਉਹਨਾਂ ਦੇ ਪਿੰਡ ਕਿਹੜੇ ਹਨ , ਨਹੀ ਤਾਂ ਉਹ ਹੋਰ ਵੀ ਵਿਸਥਾਰ ਨਾਲ ਜਾਣਕਾਰੀ ਕਰ ਦਿੰਦੇ ।