ਬਠਿੰਡਾ,20 ਮਾਰਚ – ਕੇਂਦਰੀ ਫੂਡ ਪ੍ਰੋਸੈਸਿੰਗ ਇੰਡਸਟਰੀਜ਼ ਮੰਤਰੀ ਬੀਬਾ ਹਰਸਿਮਰਤ ਕੌਰ ਬਾਦਲ ਨੇ ਅੱਜ ਸੂਬਾ ਸਰਕਾਰ ਨੂੰ ਬਠਿੰਡਾ ਹਲਕੇ ਦੀਆਂ ਚਾਰ ਸੜਕਾਂ ਨੂੰ ਪ੍ਰਧਾਨ ਮੰਤਰੀ ਗਰਾਮ ਸੜਕ ਯੋਜਨਾ (ਪੀਐਮਜੀਐਸਵਾਈ) ਤਹਿਤ ਚੌੜਾ ਕਰਨ ਲਈ ਆਖਿਆ ਹੈ। ਇਹ ਯੋਜਨਾ ਦਿਹਾਤੀ ਵਿਕਾਸ ਮੰਤਰਾਲੇ ਵੱਲੋਂ ਚਲਾਈ ਜਾ ਰਹੀ ਹੈ।
ਇੱਥੇ ਇੱਕ ਪ੍ਰੈਸ ਬਿਆਨ ਜਾਰੀ ਕਰਦਿਆਂ ਕੇਂਦਰੀ ਮੰਤਰੀ ਨੇ ਕਿਹਾ ਕਿ ਉਹਨਾਂ ਨੇ ਪੀਡਬਲਿਊਡੀ-ਬੀ ਐਡ ਆਰ ਪਟਿਆਲਾ, ਪੰਜਾਬ ਨੂੰ ਹਾਲ ਹੀ ਵਿਚ ਇੱਕ ਚਿੱਠੀ ਲਿਖ ਕੇ ਬਠਿੰਡਾ ਹਲਕੇ ਦੀਆਂ ਚਾਰ ਸੜਕਾਂ ਨੂੰ ਚੌੜਾ ਕਰਨ ਦੀ ਸਿਫਾਰਿਸ਼ ਕੀਤੀ ਹੈ। ਉਹਨਾਂ ਦੱਸਿਆ ਕਿ ਮੈਂ ਸੰਬੰਧਿਤ ਮਹਿਕਮੇ ਨੂੰ ਸੀਯੂਸੀਪੀਐਲਜ਼ ਦੀਆਂ ਦਸਤਖ਼ਤਾਂ ਵਾਲੀਆਂ ਕਾਪੀਆਂ ਭੇਜਦੇ ਹੋਏ ਕਿਹਾ ਹੈ ਕਿ ਮੇਰੇ ਹਲਕੇ ਦੀਆਂ ਚਾਰ ਸੜਕਾਂ ਨੂੰ ਪੀਐਮਜੀਐਸਵਾਈ-3 ਤਹਿਤ ਤੁਰੰਤ ਬਣਵਾਇਆ ਜਾਵੇ।
ਇਸ ਪ੍ਰਸਤਾਵ ਬਾਰੇ ਵਿਸਥਾਰ ਵਿਚ ਜਾਣਕਾਰੀ ਦਿੰਦਿਆਂ ਬੀਬਾ ਬਾਦਲ ਨੇ ਕਿਹਾ ਕਿ ਉਹਨਾਂ ਨੇ ਨਾਹੀਆਵਾਲਾ ਤੋਂ ਮਹਿਮਾ ਸਿਰਜਾ ਤੋਂ ਅਬੂ ਸੜਕ, ਘੁੱਦਾ ਤੋਂ ਨੰਦਗੜ੍ਹ ਕੋਟਗੁਰੂ ਸੜਕ,ਬੱਲੂਆਣਾ ਤੋਂ ਝੁੰਬਾ ਸੜਕ ਅਤੇ ਰਾਮਾਂ ਤੋਂ ਪੀਰੋਂ ਸੜਕ ਵਾਇਆ ਤਿਓਣਾ-ਬਹਿਮਣ ਜੱਸਾ ਸਿੰਘ ਨੂੰ ਚੋੜਾ ਕਰਨ ਦੀ ਸਿਫਾਰਿਸ਼ ਕੀਤੀ ਹੈ। ਉਹਨਾਂ ਕਿਹਾ ਕਿ ਇਹਨਾਂ ਸੜਕਾਂ ਨੂੰ ਤੁਰੰਤ ਚੌੜਾ ਕਰਨ ਦੀ ਲੋੜ ਹੈ, ਕਿਉਂਕਿ ਪਿਛਲੇ ਕਈ ਸਾਲਾਂ ਦੌਰਾਨ ਇਹਨਾਂ ਸੜਕਾਂ ਉੱਤੇ ਟਰੈਫਿਕ ਕਈ ਗੁਣਾ ਵਧ ਚੁੱਕਿਆ ਹੈ। ਉਹਨਾਂ ਕਿਹਾ ਕਿ ਸੂਬਾ ਸਰਕਾਰ ਨੂੰ ਇਸ ਪ੍ਰਾਜੈਕਟ ਨੂੰ ਲਟਕਾਉਣਾ ਨਹੀਂ ਚਾਹੀਦਾ ਅਤੇ ਤੁਰੰਤ ਇਸ ਉੱਤੇ ਕੰਮ ਸ਼ੁਰੂ ਕਰ ਦੇਣਾ ਚਾਹੀਦਾ ਹੈ।
ਪਿਛਲੀ ਅਕਾਲੀ-ਭਾਜਪਾ ਸਰਕਾਰ ਵੱਲੋਂ ਸੂਬੇ ਅੰਦਰ ਸੜਕੀ ਨੈਟਵਰਕ ਨੂੰ ਮਜ਼ਬੂਤ ਕਰਨ ਸੰਬੰਧੀ ਕੀਤੀਆਂ ਪਹਿਲਕਦਮੀਆਂ ਬਾਰੇ ਦੱਸਦਿਆਂ ਬੀਬਾ ਬਾਦਲ ਨੇ ਕਿਹਾ ਕਿ ਸਰਦਾਰ ਪਰਕਾਸ਼ ਸਿੰਘ ਬਾਦਲ ਦੀ ਅਗਵਾਈ ਵਿਚ ਪੰਜਾਬ ਅੰਦਰ ਸੜਕਾਂ ਦੀ ਕਾਇਆ ਕਲਪ ਹੋ ਗਈ ਸੀ। ਉਹਨਾਂ ਦੱਸਿਆ ਕਿ ਬਠਿੰਡਾ ਜ਼ਿਲ੍ਹੇ ਅੰਦਰ ਜ਼ਿਆਦਾ ਸੜਕਾਂ ਦੀ ਉਸਾਰੀ ਅਕਾਲੀ-ਭਾਜਪਾ ਸਰਕਾਰ ਦੌਰਾਨ ਖਾਸ ਕਰਕੇ 2009-10 ਵਿਚ ਹੀ ਹੋਈ ਸੀ।
